"جروي".. أبلكيشن هيشوف عروسة لكلبك

موقع "مصراوي" اتكلم مع عمرو مرسي، طبيب الأسنان اللي بيحب الكلاب وقرر يساعدهم. "جروي" هو أبلكيشن هيكون متاح الشهر ده على الموبايلات، الهدف منه هو إنك تلاقي كل حاجة عن الكلاب، متاحة لكل الناس اللي بتحب الكلاب أو بتربيهم، كمان الأبلكيشن هيساعدك إنك تجوّز الكلب أو الكلبة بتاعتك وتلاقيله الشريك المناسب.

الأبلكيشن له صفحة على فيسبوك بتنشر معلومات عن عالم الكلاب، وبتجاوب على الاستفسارات. حسب كلام "مرسي" مع "مصراوي"، الأبلكيشن بيساعدك إنك تلاقي الكلب بتاعك لو تاه منك أو اتسرق. واحدة من أهم المزايا في التطبيق الجديد، هي مساعدة كلاب الشوارع، كل اللي عليك إنك لو شوفت كلب في الشارع عنده أي مشكلة أو مصاب، بتبعت تفاصيل واللوكيشن بتاعه، وساعتها يقدر كل المستخدمين إنهم يساعدوه.