غرفة الملابس الجاهزة: شرا الهدوم هيبقى بالتقسيط

الشتا دخل زي ما أنت شايف، وأسعار الهدوم الشتوي زي ما أنت شايف برضه، لا خصومات نافعة ولا بلاك فرايداي نافع، طب إيه رأيك لو اشتريت هدوم الشتا بالتقسيط؟ الموضوع لسه ماحصلش بس ممكن. محمد عبد السلام، رئيس غرفة صناعة الملابس الجاهزة باتحاد الصناعات، قال إن الغرفة بتتفاوض حاليًا مع 3 بنوك مصرية علشان يطبقوا مبادرة بيع الملابس للمواطنين بالتقسيط، وأكد إن المبادرة عليها إقبال كبير من المصانع ومحلات الملابس.

حسب اللي قاله "عبد السلام" لليوم السابع، الشرا هيكون عن طريق فيزا بنكية، ولسه بيتم الاتفاق على مدة التقسيط، ممكن تكون 4 أو 6 شهور علشان الفايدة تبقى قليلة، وبيتوقع عبد السلام الوصول لاتفاق مع البنوك آخر الأسبوع ده.