وزير التموين: كيلو اللحمة بقى بـ 110 جنيه وهيوصل لـ 85 جنيه الفترة الجاية

في مداخلة لـ المتحدث الرسمي باسم وزير التموين محمد سويد في برنامج (90 دقيقة) قال إن أسعار اللحوم انخفضت من 150 و160 جنيه لـ 90 و110 جنيه، وإن وزارة التموين عملت إتفاقية مع السودان عشان توفر اللحوم بسعر 85 جنيه طول السنة، وبيأكد إن فيه خطة بتقوم بيها الحكومة في الفترة دي عشان تقدر توفر اللحمة بنسبة 100% خلال 2018 وده من خلال مشروع "البتلو والمليون راس" وده اللي بيتوقع معاه إنخفاض سعر اللحوم.
وبالنسبة لـ مشروع (جمعيتي)، أكد (سويد) إن المشروع عبارة عن تجربة خاصة للشباب بإن بيتم توفير أكبر عدد من منافذ بيع السلع التموينية، الشروط المطلوبة هي إن يكون الشاب عمره من 20 لـ 40 سنة، ويتقدم بالمشروع للشركة القابضة للسلع الغذائية. وأكد إن فيه 3.000 فرع (جمعيتي) تم تشغيلها وافتتاحها.
نجاح الفكرة دي ساعد على إن الوزارة عملت معاينات لـ 1200 فرع غيرهم وهيتم افتتاحهم قريب. الفكرة دي بتوفر فرص عمل وبتوفر منتجات للمواطنين.