السعودية هتبني أول دار أوبرا في تاريخها

الحكومة السعودية أعلنت النهاردة عن بداية بناء دار للأوبرا، علشان تبقى أول دار أوبرا في المملكة طول تاريخها. هيئة الترفيه السعودية كشفت في مؤتمر صحفي عن استثمار مبلغ 64 مليار دولار في الترفيه في ال10 سنين الجايين، وده تقريبًا ضعف الرقم اللي كانت توقعته وسائل الإعلام السعودية، ومن ضمن المشاريع اللي هتعملها الهيئة، هتكون دار الأوبرا.

رئيس هيئة الترفيه أحمد عقيل الخطيب، قال إن السعودية عاوزة السائح الخليجي يحضر الفعاليات السعودية، بعد ما كان السعودي هو اللي بيروح دول الخليج يحضر الإيفنتات بتاعتهم. الخطيب كمان أكد إن الهيئة هتعمل 5 آلاف فعالية متنوعة في 2018، وهتبقى حاجات متنوعة بين الفن والثقافة والموسيقى والتعليم.