أمسية "الأرشيفات العائلية" يوم 1 مايو بمركز بُساط الثقافي

مين فينا ماوحشتهوش ضحكة جدته وهي بتحكي حكايات زمان واحنا متجمعين في البلكونة بنشرب الشاي، ولا ريحة الأكل في العزومات اللي كانت بتجمع كل العيلة. مافيش أحلى من الذكريات العائلية والقعدة مع الحبايب، بس جاهز تسترجع كل الذكريات دي؟

مبادرة "حكايات فلسطينية" و"بساط الثقافي" بيدعو كل اللي عنده أرشيف عائلي، صور، أو حكايات من أيام زمان يشاركنا قصته في أمسية مميزة بعنوان: "الأرشيفات العائلية بين البحث والإبداع"، يوم الخميس 1 مايو، الساعة 7 مساءً بمركز بساط الثقافي، في ٩ ش فتحي زغلول (من شارع مصر والسودان)، حدائق القبة.

برنامج الأمسية هيكون كالآتي:

- مداخلة مع  دكتور باسكال غزالة (أستاذة التاريخ بالجامعة الأمريكية بالقاهرة) عن سر قوة الأرشيفات العائلية كمصدر لا غنى عنه للمؤرخين.

- الكاتبة فيموني عكاشة هتحكيلنا عن رحلتها مع الأرشيف العائلي لحد ما نشرت روايتها الجديدة "الخواجاية" عن دار الشروق.

- استعراض إنجازات مبادرة "حكايات فلسطينية" على مدار 5 سنين من العطاء والتطوع.

- وأخيرًا، حكايات فلسطينية حيّة على خشبة المسرح مع ميسون محفوظ ومحمد خروات، مستوحاة من كنوز أرشيفنا العائلي.

وعلى الهامش، هيكون فيه معرض مصغر بيضم مقتنيات أصيلة من أرشيف "حكايات فلسطينية"، وكمان منتجات تراثية من إبداع فنانات اتحاد المرأة الفلسطينية.

خدوا معاكم صوركم وذكرياتكم، واجهزوا عشان تحييوا كل الذكريات دي، وترجعوا بالزمن لسنين كتير ورا.