"أنا" مسلسل جديد بطولة نيللي كريم وشريف سلامة فى رمضان 2026

المسلسل بينتمي لنوعية الدراما النفسية الاجتماعية، وبيحكي عن ست بتواجه أزمات وتقلبات صعبة في حياتها الزوجية، وده بيأثر على حالتها النفسية وبيكشف جوانب إنسانية وتوترات عاطفية كتير. 

العمل بيقدّم نظرة عميقة للعلاقات الزوجية وتأثيرها النفسي، خصوصًا على الست اللي بتحاول تفضل قوية رغم كل الضغوط.

المسلسل من تأليف مصطفى جمال هاشم، وإخراج خالد سعيد، وإنتاج سالي والي من خلال شركتها S Productions، ومن المقرر بدء التصوير في نوفمبر 2025 بعد التحضيرات اللي بدأت بالفعل.

سالي والي نشرت صور من التحضيرات على حسابها في إنستغرام، وكتبت:"في رمضان 2026، قصتنا هتكون مختلفة، مسلسل 30 حلقة من نوع دراما نفسية، مع النجوم الأعزاء على قلبي نيللي كريم وشريف سلامة، قصة وسيناريو وحوار مصطفى جمال هاشم، وإخراج خالد سعيد".

ده هيكون رابع عمل يجمع نيللي كريم وشريف سلامة بعد شغلهم سوا في أكتر من عمل ناجح:

-أول مرة اشتغلوا سوا كانت في مسلسل "فاتن أمل حربي" سنة 2022، واللي كسر الدنيا وقت عرضه.

-وبعدها فيلم "هابي بيرث داي" سنة 2023، اللي خد 3 جوايز مهمة في مهرجان ترايبيكا في نيويورك، واترشّح كمان يمثل مصر في الأوسكار 2026.

- وكمان خلصوا قريب تصوير فيلم "جوازة ولا جنازة" إخراج أميرة دياب، وبمشاركة عادل كرم، لبلبة، انتصار، دنيا ماهر، محمود البزاوي، وأمير صلاح الدين، وهو فيلم كوميدي اجتماعي خفيف.

نيللي قررت ترجع للأعمال الطويلة بعد ما قدّمت آخر سنتين مسلسلات قصيرة بـ15 حلقة، ، وقالت قبل كده في لقاءها مع لميس الحديدى :"بحب أكون حاضرة بمسلسل 30 حلقة، بس لازم الورق يكون مستحمل عشان كل حلقة تبقى أحسن من اللي قبلها".

وأضافت كمان:"رمضان عمره ما خوّفني، أهم حاجة الورق يكون قوي، ومسلسلي الجديد "أنا"متفائلة بيه جدًا".