تراجيدي وكوميدي واجتماعي.. مسلسلات رمضان 2026

رمضان شهر مختلف بكل حاجة فيه، بنستناه من السنة للسنة علشان تجمعات العيلة والصحاب والعادات الدينية والفطار والسحور، بس كمان المسلسلات بقت جزء مهم من الشهر بنستنى كل سنة نشوف هنتابع إيه ونتسحل مع أنهي مسلسل السنادي. 

علشان كدة جمعنالكم المسلسلات اللي هنشوفها في رمضان السنادي 2026، واللي معظم صناعها بدأوا تصويرها بالفعل. 

مسلسلات رمضان 2026 

مسلسل “اتنين غيرنا” بطولة دينا الشربيني وآسر ياسين وهيكون من تأليف رنا أبو الريش وإخراج خالد الحلفاوي، ومسلسل “المداح 6” بطولة حمادة هلال وتأليف أمين جمال ووليد أبو المجد وإخراج أحمد سمير فرج، ومسلسل “علي كلاي” بطولة أحمد العوضي وإخراج محمد السلام. 

ومن المسلسلات اللي هنستناها في رمضان ده، مسلسل “حب وحرب” بطولة منة شلبي وإياد نصار وإخراج بيتر ميمي، ومسلسل “فن الحرب” اللي هيكون عودة لـ يوسف الشريف بعد غياب سنين عن دراما رمضان، وهيكون  من إخراج محمود عبد التواب. 

كمان مسلسل “وننسى اللي كان” بطولة ياسمين عبد العزيز وكريم فهمي، وده مش هيكون أول تعاون بينهم، والمسلسل من إخراج محمد الخبيري، كمان مسلسل “عاليا” بطولة غادة عبد الرازق إخراج أحمد حسن، ومسلسل “الكينج” بطولة محمد إمام وإخراج شيرين عادل. 

أبطال مسلسلات رمضان 2026

ومصطفى شعبان عودنا كل سنة على وجوده في شهر رمضان بمسلسل أحداثه دايما مختلفة، والسنادي هيكون موجود بمسلسل “درش” إخراج أحمد خالد أمين، كمان أحمد داود هيكون موجود بمسلسل “بابا وماما جيران” من إخراج أحمد عبد الوهاب. 

ومن الثنائيات اللي حبيناها وهنشوفهم تاني مع بعض، أحمد مالك وهدى المفتي هيكونوا معانا السنادي بمسلسل “سوا سوا” تأليف مهاب طارق وإخراج عصام عبد الحميد، وثنائية نيللي كريم وشريف سلامة هيكونوا مع بعض السنادي في مسلسل “على قد الحب” إخراج خالد سعيد. 

وعمرو سعد هيقدم بطولة مسلسل بروح الحارة الشعبية اسمه “عباس” إخراج أحمد خالد موسى، ومي عمر هتكون موجودة بمسلسل “الست موناليزا” من إخراج محمد علي، وسلمى أبو ضيف بمسلسل “عرض وطلب” من إخراج عمرو موسى. 

ولأول مرة مع بعض، هنشوف ماجد الكدواني ويسرا اللوزي في مسلسل “سنة أولى طلاق” إخراج كريم العدل، ونفس الثنائيات الجديدة هنشوفها في مسلسل “بحجر واحد” اللي هيقدم بطولته مصطفى غريب ودياب وهيخرجه إسلام خيري. 

وبعد ما محمد فراج قدم كذا تجربة مختلفة من بطولته في الفترة الأخيرة، هيكمل على نفس الرتم وهيقدم في رمضان مسلسل “أب ولكن” لـ محمد فراج هيكون من إخراج ياسمين أحمد كامل، وهنشوف جزء تاني من مسلسل “النص” بطولة أحمد أمين إخراج حسام علي. 

وعصام عمر بأول بطولة مطلقة له في الدراما الرمضانية، هيقدم مسلسل “عين سحرية”، ويسرا هترجع تاني لدراما رمضان بمسلسل “حرم السفير”، ومحمد سعد كمان هيرجع بمسلسل “جراب الحاوي” من إخراج وائل إحسان، ولأول مرة روجينا هتشتغل مع بنتها مايا أشرف زكي وهتخرج لها مسلسلها في رمضان “حد أقصى”. 

وياسمين رئيس هتكون موجودة بمسلسل “اسأل روحك” من إخراج رضا عبد الرازق، وياسر جلال بمسلسل “كلهم بيحبوا مودي” من إخراج أحمد شفيق، وأحمد صلاح حسني ونسرين طافش هيقدموا مسلسل “أنا وهو وهم” إخراج زهير قنوع. 

وصانع المحتوى أحمد رمزي هيقدم أول بطولة مطلقة له في مسلسل “فخر الدلتا" إخراج هادي بسيوني، وماجد المصري هيقدم بطولة مسلسل “أولاد الراعي” إخراج محمود كامل، وريهام حجاج هتقدم مسلسل “توابع” إخراج يحيى إسماعيل، وأخيرًا مسلسل “نون النسوة” بطولة مي كساب وإخراج إبراهيم فخر.