"سيكو سيكو" هيتعرض على يانغو بلاي في عيد الأضحى

منصة "يانغو بلاي" هتعرض فيلم "سيكو سيكو" بطولة عصام عمر وطه دسوقي، بشكل حصري في عيد الأضحى، وده بالتزامن مع عرضه في السينمات.

الفيلم من تأليف محمد الدباح، وإخراج عمر المهندس، وبيشارك "عصام" و"طه" في البطولة ممثلين زي: علي صبحي، وتارا عماد، وديانا هشام، وأحمد عبد الحميد، ومحمود صادق حدوتة، وده غير ضيوف الشرف اللي منهم باسم سمرة وخالد الصاوي.

الفيلم من إنتاج شركة Film Square، ومدعوم من صندوق Big Time والهيئة العامة للترفيه، وأحداثه بتدور في إطار كوميدي اجتماعي، عن شابين واحد بيشتغل في شركة شحن، والتاني لاعب ألعاب فيديو، وبيتورطوا في مشكلة هتدخلهم في مفاجآت كتير، فهيحاولوا يخرجوا منها بأقل الخسائر.

الجدير بالذكر إن فيلم "سيكو سيكو" حقق نجاح كبير بإيرادات قياسية وصلت لأكتر من ١٨١ مليون جنيه مصري، و٣.٥ مليون ريال سعودي، وده في خلال 8 أسابيع وحاليًا الفيلم بيحتل المركز الثاني في قائمة أعلى الأفلام إيرادات في تاريخ السينما المصرية.