عرض "ورقة شفرة" في سينما زاوية كافتتاح لبرنامج "عشرين سنة فيلم كلينك"

 سينما زاوية هتعرض فيلم "ورقة شفرة" يوم ٢٤ سبتمبر الحالي، كافتتاح لبرنامج "عشرين سنة فيلم كلينك"، وده بعد مرور حوالي 20 سنة على العرض الأول للفيلم. 

وبعد الفيلم هتكون في جلسة نقاش مع المنتج والسيناريست محمد حفظي، مؤسس ورئيس "فيلم كلينك"، واللي هيشارك الجمهور تفاصيل عن البدايات وكواليس "ورقة شفرة" وبيدير الحوار المخرج أحمد عبدالله.

الفيلم ده مش بس أول إنتاج للشركة، لكنه كمان علامة فارقة في بدايتها وكان بداية تعارف الجمهور مع الثلاثي شيكو وأحمد فهمي وهشام ماجد، وأخرج الفيلم أمير رمسيس، وشارك في البطولة أحمد الفيشاوي، سمية الجويني، وفرح يوسف.

"ورقة شفرة" بيدور في إطار تشويقي كوميدي حوالين ثلاثة أصحاب بيتغير مصيرهم بعد وفاة جد واحد منهم واكتشافهم لسر عنه، وبسبب السر ده بيتعرضوا لاختبار صعب ما بين الحفاظ على حياتهم أو التنازل عن الكنز اللي الجد سابه.

الفيلم اتصور ما بين القاهرة وسوريا، ووصلت تكلفته الإنتاجية وقتها لحوالي 5 ملايين جنيه، وكان خطوة جريئة في مشوار "فيلم كلينك" اللي خلتها بعد كده من أبرز شركات الإنتاج في المنطقة.