فتح متحف عبد الوهاب ومتحف الآلات الموسيقية مجانًا للجمهور حتى 12 مارس

متحف محمد عبدالوهاب بيضم قاعة الذكريات، اللي بتضم جناح عن طفولة عبد الوهاب، والجناح التاني بيضم قطاعات من منزله زي أوضة نومه، ومكتبه الخاص، ومجموعة من قطع الأثاث، وبعض متعلقاته الشخصية اللى أهدتها للأوبرا أرملته السيدة نهلة القدسى.

وغير كده، المتحف بيضم قاعة للسينما فيها كل الأفلام اللى مثلها وبتتعرض للزائرين على شاشات خاصة، وقاعة للاستماع والمشاهدة بتضم مكتبة كاملة لأعماله من موسيقى وأغاني وألبومات صوره الخاصة، ومع الشخصيات العامة والفنانين.

أما متحف الآلات الموسيقية فبيعرض مجموعة من الآلات القديمة، اللى تم اكتشافها وقت ترميم المبنى، وجنب كل آلة معروضة في لوحة إرشادية، وجهاز يصدر صوتها.

والمتحف بيضم آلات نادرة زي بيانو الثلاثة أرباع تون للمعزوفات الشرقية، وآلة الكوتو اليابانية، وآلة السينتار الهندية وآلة السانتور وآلة المندولين المعدنية اللى عزف عليها محمد عبدالوهاب فى أغنية عاشق الروح بفيلم "غزل البنات".