"فوتوبيا": المصورين من المحافظات هيحضروا "أسبوع القاهرة للصورة" مجانًا

مدرسة "فوتوبيا"، بالتعاون مع الاتحاد الأوروبي واتحاد المعاهد الثقافية الأوروبية (يونيك) مصر، بيقدموا فرصة لـ 15 مصور مصري من كل محافظات مصر، باستثناء محافظات القاهرة الكبرى، للسفر والإقامة في القاهرة لمدة أسبوع لحضور فعاليات "أسبوع القاهرة للصورة"، اللي هيتم تنظيمه في وسط البلد في الفترة من 8 لـ 18 مايو. المشاركين هيتم اختيارهم بناءً على تقييم لجنة فنية، والبرنامج هيتكفل بتغطية تكاليف سفرهم من وإلى القاهرة والإقامة لمدة 7 أيام مع توفير بدل إعاشة رمزي، والمشاركين هيتوفر ليهم تذاكر لحضور فعاليات "أسبوع القاهرة للصورة" من الندوات، واللقاءات النقاشية، والمعارض، والعروض التجريبية، ومراجعة ملفات أعمالهم، والمشاركة في مجموعة من الورش التجريبية.

"أسبوع القاهرة للصورة" هو مهرجان للتصوير وصناعة الصورة، بتنظمه "فوتوبيا" بهدف تقديم تجربة تعليمية ومعرفية مفيدة لصناع الصور الناشئين من خلال المعارض والفعاليات المختلفة، بالتعاون مع الشريك الرئيسي للمهرجان: شركة الإسماعيلية للاستثمار العقاري. والمهرجان بيستهدف مجتمع التصوير المصري والأفريقي والشرق أوسطي، ويجذب مجتمعات إقليمية ودولية.

التقديم متاح لحد يوم 15 أبريل، وتقدر تقدم عن طريق صفحة "فوتوبيا" أو من هنا بشرط توافر مجموعة من المواصفات، وهي:

1- تكون فى بداية أو منتصف مسيرتك المهنية.

2-  تكون من سكان واحدة من محافظات جمهورية مصر العربية ما عدا القاهرة الكبرى (القاهرة، الجيزة، القليوبية).

3- الاستعداد لحضور أكتر من 75% من فعاليات المهرجان، وتقديم تقارير فنية للتعليق على النقاط اللي اتعلمتها خلال فترة المشاركة.