ليه شخصية “نادر” في “لا ترد ولا تستبدل” محيّرة؟

 لو اتفرجت على مسلسل “لا ترد ولا تستبدل” فـ أكيد دخلت في حيرة وتفكير في تركيبة شخصية “نادر" اللي بيجسدها صدقي صخر في المسلسل. 

“نادر” هو زوج “ريم” - دينا الشربيني في المسلسل، واللي بتعاني فشل كلوي خلاها تبدأ رحلة جلسات غسيل الكلى، وهنقولك ليه نادر شخصية مُحيّرة جدا في المسلسل ده.

ليه شخصية “نادر” في “لا ترد ولا تستبدل” محيّرة؟ 

1.بيخاف عليها بس بيكلمها بـ جفاف

نادر بيخاف على ريم مراته ونصحها في أول مشهد جمعهم، إنها ماتروحش الشغل عشان شكلها تعبان، لكن كان بيقول الكلام ده بطريقة جافة ومفيهاش مشاعر خليتها مش عارفة تحس الكلام ده من قلبها وقلبت خناقة. 

2.كان بيروح معاها جلسات الغسيل بس الموضوع مكملش كتير

نادر بادر في البداية إنه يروح مع ريم جلسات غسيل الكلى وفعلًأ راح معاها كام مرة بس، وهي عرضت عليه إن عشان شغله المتعطل تجيب سواق يوديها ويرجعها من الجلسات، فوافق نادر وماتمسكش باللي كان بيعمله للآخر. 

3.بيوصي السواق على عربيته الجديدة ومش بيوصيه عليها هي 

ريم طلبت من نادر إنها تاخد عربيته الجديدة لأنها أوسع، وتخلي السواق هو اللي يوديها ويجيبها بيها، رفض في البداية لكن وافق لكن حسسها بخوفه الكبير على العربية، وأول ما شاف السواق وصّاه على العربية وهي لأ. 

4.بيدورلها على متبرع بدل ما يعرض هو 

نادر عمّال يدوّر لـ ريم على متبرع بالكلى، لكن عمره ما عرض عليها إن هو اللي يتبرعلها عكس ما كل اللي في دايرتها عملوا كدة. 

آراء الناس اختلفت جدا في الموضوع ده وفي اللي أخد صف  نادر وفي اللي شايف إنه غلطان وزوج مش بيحب مراته، وكمان وصفوا علاقة ريم ونادر بالفتور والملل وقلة الحب.