حوار مع دينا نجم وسمر عبد الناصر مؤلفات مسلسل "لا ترد ولا تستبدل"

دينا وسمر بدأوا كلامهم معانا بـ إن "الفشل الكلوي" هو صندوق أسود ومعلومات الناس عنه محدودة جدًا، هما كمان مكنش عندهم معلومات كافية عنه، عشان كدة خاضوا رحلة بحث طويلة واستشارات وكلام كتير مع دكاترة في تخصصات مختلفة. 

دينا نجم قالت: "قررت أكتب عن "الفشل الكلوي وزراعة الكلى" بسبب صديق ليا اتشخص بالمرض ده من 4 سنين وزرع كلى وأنا عيشت معاه التجربة كاملة، اقترح عليا أتكلم عن الموضوع وبالصدفة كنت مقررة أنا كمان أعمل ده وكنت كاتبة في النوتس عندي إن من ضمن المواضيع اللي هكتب عنها هو ده، فـ شجعنا بعض وقررت أكتبه."

قالولنا كمان إنهم استبعدوا تمامًا فكرة البحث الأونلاين واتعاملوا في رحلة البحث مع مستشفيات ودكاترة وقعدوا مع مرضى الفشل الكلوي ومتبرعين عشان يسمعوا من وجهة نظرهم ليه بيقرروا يتبرعوا؟ جربوا كل السيناريوهات وخدوا من كل التجارب اللي سمعوها.

كمان وضحوا إن غسيل الكلى موضوع صعب جدًا، وإن مرضى الفشل الكلوي قدروا يتكلموا معاهم في كل جوانب المرض، لكن أول ما كانوا بيتسألوا عن الغسيل عنيهم كانت بتتغير ومش بيقدروا يتكلموا عنها بسبب قسوة الموضوع، ودينا وسمر أدركوا صعوبة الموضوع فـ أصرّوا يطلعوا مشاهد الغسيل بنفس قسوتها الحقيقية.

وسمر عبد الناصر كلمتنا أكتر عن شغلهم على بناء الشخصيات، وقالت: "هدفنا كان التركيز على الشخصيات والقصص الإنسانية، والمرض كان مجرد خلفية لـ ده، لكن خطوات الشخصيات ومصيرهم كانت هي اللي متصدرة المشهد واشتغلنا على تفاصيل طفولة كل شخصية بدايةً من "ريم" اللي اتربت مع راجل غريب"

والعلاقة اللي كلنا حبيناها "ريم" و"طه"، دينا كلمتنا أكتر عنها، وأكدت إنهم من البداية كانوا مقررين إنهم مش هيخلوها علاقة حقيقية، وماتأثروش بتعليقات الجمهور على السوشيال ميديا، وقالت: "ريم" و"طه" ماكناش بنعتبرهم علاقة حقيقية، وتعاطف الجمهور أو استنكارهم من أي علاقة في المسلسل مأثرتش على كتابتنا لأن ببساطة إحنا كنا خلصنا كتابة المسلسل بالنهاية من بدري، وإحنا صورنا مشهد النهاية وإن "ريم" و"طه" مش هيحبوا بعض مع تصوير أول حلقة في المنيا". 

والعلاقة الأغرب على الإطلاق، "أم أيمن" و"بعوضة"، كان لازم نسمع عنهم أكتر، علشان كدة سمر قالتلنا: العلاقة دي كان معيارها الأول هو إن ماتكونش "كليشيه"، ومكنش ليها مرجع حقيقي ولكن بنينا حسب المنطق، "بعوضة" والدته اتوفت وهو صغير فـ طبيعي يكون في السن ده بيدور على مشاعر الأم، وفي نفس الوقت "أم أيمن" مكنش ينفع تكون غير الشكل اللي شوفناه ده، عشان نبعد عن أي صور نمطية.

ودينا نجم حكت إن شخصية "مكة" اللي كانت في المسلسل بتمثل فئة ضعاف السمع، استوحتها من شخصية بنت حقيقية قابلتها، وقالت: "قررت أخلي "مكة" بنت "طه" في المسلسل تكون من ضعاف السمع لأن من 4 سنين قابلني سيدة وبنتها وطلبت مساعدتي في حالة بنتها اللي كانت بتعاني من ضعف السمع ومركبة قوقعة، وفضلت على تواصل معاهم وقررت أسلط الضوء على أصحاب المشكلة دي عشان مش كل الناس تعرف بيها".

وعن صعوبات المسلسل، دينا وسمر أكدوا إن ده أصعب مشروع عدى عليهم من أول رحلة البحث، غير إن المشروع كان يبدو كئيب وقاطم فـ إن يلاقوا مخرج وطاقم عمل ومنتج متحمس للموضوع ده مكنش سهل، كمان بناء الشخصيات أخد منهم تفكير كتير وكتابة المشاهد الطبية كمان، خصوصًأ إن أغلبنا يعتبر عنده معلومات عن مرض زي السرطان وغيره كتير من الأمراض، لكن تحديدًا الفشل الكلوي والغسيل هو اللي منعرفش عنه كتير.

كمان حبينا نسألهم على فكرة الكتابة الثنائية بينهم، مش أي حد هيعرف يفكر ويكتب ويبدع بدماغ غير دماغه، لكن دينا وسمر أثبتوا العكس، وده لأنهم خريجين نفس ورشة الكتابة "سرد" للكاتبة مريم نعوم، وعرفوا بعض أول مرة فيها. 

اشتغلوا مع بعض من 2019 على مسلسل "زي الشمس" اللي برضه كان بطولة دينا الشربيني وأحمد السعدني"، ومن وقتها حبوا الشغل مع بعض وقرروه في أكتر من عمل، لحد ما جه مشروع "لا ترد ولا تستبدل" وقربوا فيه من بعض وحسوا إن كل حد فيهم بيدي التاني من أفكاره وده بيضيف توازن أكبر. 

كنا حريصين نعرف إيه الفيد باك اللي وصل لـ دينا وسمر عن المسلسل، من مرضى حقيقين للفشل الكلوي، وقالولنا: "أكتر فيدباك مهم جالنا لما ناس بعتولنا إن أفراد أسرتهم كانوا بيعاونوا من المرض ده وهما مضايقين عشان مكانوش يعرفوا حجم المعاناة اللي بيمروا بيها، لكن بعد المسلسل كلهم أدركوا ده وبقوا يتعاملوا معاهم بشكل مختلف، وطبعا مرضى الكلى كانوا مبسوطين إن حد اتكلم عن أوجاعهم المسكوت عنها من زمان.