"مترو" EP جديد لخالد عصام بيضم 5 أغنيات

المغني وصانع الموسيقى خالد عصام بيقدم EP جديد اسمه "مترو"، بيضم 5 أغاني بتعبر عن الحب والاشتياق والتعلق، والتأمل في الحياة، بكل ما فيها من لحظات صعبة وجميلة، وصولًا للسخرية والتفاؤل.

ألبوم مترو من إنتاج وتوزيع The Basement Records، واللي فيها محمد الشاعر الشريك المؤسس والمنتج التنفيذي والمدير الإبداعي، والـ EP بيضم أغنيات "مترو" و"مكان تاني" و"ناوي" و"جميلة" و"رهيبة"، بالتعاون مع وزة منتصر وRiff (أحمد رأفت) وجلبة وبلال حسين.

والألبوم كمان بيضم 3 فيديو كليب، لأغنية "مترو" و"جميلة" و"ناوي"، أما أغنية "مكان تاني" و"رهيبة" فهيتم تقديمهم في مقاطع فيديو أبسط.

«مترو» هو الألبوم التاني لخالد عصام بعد ألبوم "كائن حي" اللي صدر في 2025، وبيكمل من خلاله تجربته اللي بتجمع بين الغناء وكتابة الأغاني والتلحين وصناعة الموسيقى.

وخلال مشواره، شارك خالد في أعمال لعدد من الفنانين، من بينها أغنيات في ألبومات حمزة نمرة، وأغنية "زمن" اللي جمعته بحمزة نمرة وزياد ظاظا. كمان كتب ولحن أغنية "زي كل مرة أجيلك" اللي غناها محمود العسيلي وبهاء سلطان ضمن إعلان بنك مصر، واللي كانت سبب في تريند "يا مصر بتعمليها إزاي؟"، وقدم أغنية "ده خطير" مع سمر طارق لصالح مستشفى 57357.