محمد سامي أعلن اعتزال إخراج الدراما التلفزيونية

المخرج محمد سامي أعلن اعتزال إخراج الدراما التلفزيونية، وقال "سامي" من خلال حسابه الشخصي على فيسبوك: "السنة دي كانت آخر أعمالي التلفزيونية، واللي فيها بودع المسلسلات، رحلة طويلة حوالي 15 سنة، قدمت فيهم كل اللي قدرت عليه لإسعاد الجمهور العربي، وحققت بفضل ربنا نجاحات مع نجوم كتير ومع شركات وقنوات كلها مهمة، وكان دايمًا الجمهور بيشجعني، سواء بردود الأفعال أو بتصويته ليا في الجوائز، وأي نجاح حققته كان بفضل ربنا و الجمهور، يمكن المقربين ليا عارفين إني واخد القرار ده من فترة وهو إعتزال الإخراج التلفزيوني ولكن كنت بنتهي من التزامات موقعة مع شركات ونجوم والحمد لله انتهيت منها وكان آخرها 2025".

وكمل "سامي": "ماعنديش حاجة أكتر أقدر أقدمها في التلفزيون، وخايف من تشبع الجمهور من أسلوبي ومن الوقوع في فخ التكرار ودائرة المتوقع والملل، الحمد لله آخر عملين ليا إش إش وسيد الناس حققوا نجاح أنا سعيد بيه، كل يوم بلدي العظيمة مصر بتطلع صناع جداد موهوبين ومثقفين ويقدروا يقدموا أفضل من اللي قبلهم وهنفضل طول الوقت بنقدم أعمال مصرية يلتف حولها الجمهور العربي، بشكر كل حد ساعدني في الرحلة و بشكر كل زميل منافسته كانت دافع للتميز، بعتذر عن أي مشهد قدمته أثناء الرحلة ولم يلقي استحسان الجمهور".

و"سامي" قال إن الفترة الجاية هيكون عنده سفر خارج مصر لمدة سنتين، هيتعلم فيهم حاجة جديدة هيدرسها، لأن دي الحاجة اللي كان نفسه يتعلمها من زمان، وقال إنه أجل الخطوة دي كتير لحد ما لقى نفسه بيكبر وخايف يفوت العمر قبل ما يعمل حاجة نفسه فيها.