نادي داجنهام الإنجليزي اعتذر رسميًا لـ سلمى مشهور

نادي داجنهام وريبريدج الإنجليزي، أصدر بيان رسمي للتعليق على واقعة إقالة سلمى مشهور مدير التطوير في النادي، بعد مرور 72 ساعة على قرار تعيينها، بسبب دعمها لـ القضية الفلسطينية.

وقال نادي داجنهام في بيان رسمي: "خلال الأسبوع اللي فات، حصل جدل عام واسع بخصوص قرار النادي الأخير بإنهاء ارتباطه بالدكتورة سلمى مشهور، واحنا مقدرين ردود الفعل القوية اللي أثارها القرار ده بين جماهيرنا، وفي وسائل الإعلام، وفي أوساط مجتمعاتنا الأوسع، سواء في المملكة المتحدة أو على الصعيد الدولي.

وأضاف النادي الإنجليزي: "في الوقت اللي بنواصل فيه وقوفنا ضد العنصرية والتمييز بكل أشكالهم، فبنأكد على حق الأفراد بصفتهم الشخصية في التعبير عن آرائهم السياسية، وبنعتذر عن أي ضرر ممكن يكون لحق بالدكتورة سلمى مشهور نتيجة لتصريحات منسوبة للنادي أو مرتبطة بيه، وقرار النادي بعزلها".

وكمل النادي في البيان: "بنرفض كل أشكال التمييز والعنصرية والكراهية، وبندعم التسامح والوحدة والاحترام، ونادينا ومجتمعنا بيلتزم بدعم القيم من خلال أفعالنا وأقوالنا، وملتزمين بالتعلم من اللحظة دي، واحنا نادي بيفخر بالشمولية والمساءلة وتمثيل مجتمع واسع ومتنوع، وبصفتنا منظمة رياضية مالناش أي موقف سياسي، وتركيزنا بيكون بس على تعزيز الشمولية من خلال اللعبة اللي بنحبها".

جدير بالذكر إن مروان سري أعلن في فيديو نهاية علاقته رسميًا بنادي داجنهام الإنجليزي، اللي استثمر فيه مؤخرًا، وده ردًا على قرار النادي بفصل سلمى مشهور من منصبها في النادي.

مروان فسر قرار النادي ضد سلمى بالعنصرية وإن الحملات اللي خرجت من جمهور النادي ضد سلمى، بسبب رأيها في أحداث ٧ أكتوبر، كانت بتحريض من إدارة النادي.

وشكر مروان الجمهور العربي على دعمهم، وأكد إنه اتخذ كل الإجراءات القانونية لحفظ حق سلمى.