ترميم عمارة "تيرينج" التاريخية في العتبة

دي عمارة تيرنج، اللي اتبنت في بداية القرن العشرين وكانت مبنى تجاري أو بمعنى أصح مول بالمعنى الحالي. سنين تعدي واحتلال يمشي وثورة تقوم وتاريخ بيتغير وفضل المبنى قائم وشاهد على كل ده، لكن في نفس الوقت للآسف كان بيتعرض للإهمال وشكله بيتغير. 

ودلوقتي اخيرًا بيحصل تجديد للمبنى وترميم عشان يرجع لشكله الأصلي كواحد من أشهر معالم القاهرة وشاهد على تحولاتها. 

اتكلمنا مع المهندس المعماري مصطفى سالم، المصمم والاستشاري لعملية الترميم وقالنا إن الترميم ماشي على أكمل وجه رغم كل العقبات اللي قابلتهم

"دلوقتي أنا متعاون مع التنسيق الحضاري اللي معاه مجموعة من الخبراء المعماريين والمرممين عشان نكمل ترميم مبنى تيرينج التاريخي في العتبة، وإن شاء الله نشوف الحلم بيتحقق!"  مصطفى سالم. 

التحديات كانت كبيرة خصوصًا مع مرور السنين واختلاف مُلاك العمارة والمحلات اللي ليها مُلاك لوحدهم لكن رغم كل ده بدأ الترميم بالتعاون مع محافظة القاهرة والجهاز القومي للتنسيق الحضاري ووزارتي التنمية المحلية والإسكان، بيقولنا المهندس مصطفى سالم: "قبل الترميم، كان شكل القبة بيظهر كأن فيه زخارف وناس افتكرت إنها اتشالت، لكن الحقيقة إن المبنى زمان كان عليه طبقة خارجية ومع الزمن الطبقة دي وقعت وبان الهيكل الخشبي الداعم تحتها، لكن دلوقتي القبة بعد الترميم رجعت للشكل الأصلي السادة". 

الترميم كان كمان فيه تحديات عشان الحاجات الحديثة اللي ماكنتش موجودة في التصميم الأصلي زي أماكن التكييفات وإزاي بيتم دمجها من غير ما يبوظ الشكل التاريخي وتفضل العمارة مميزة بنفس جمالها. 

المهندس مصطفى سالم قالنا إن المهم الوعي العام وإن الترميم والاهتمام بالمبنى يفضل مستمر عشان حسب وصفه "الناس لما بتتواصل مع تراثها بتنتج أحسن".