"رحلة كفر الشوبك".. من فسحة لمعرض الكتاب كل سنة لحلم بيجمع أجيال

في محافظة القليوبية وتحديدًا في كفر الشوبك بمركز شبين القناطر، دكتور كمال سالم، بيعمل رحلة سنوية مع أسرته لمعرض الكتاب، وبيصادف إن دكتور سالم، أمين الصندوق بجمعية تنمية المجتمع المحلي بكفر الشوبك، وفي مرة من 5 سنين، اقترح عدد صغير من أهالي القرية إنهم يروحوا مع دكتور "كمال" لمعرض الكتاب. من هنا بتبتدي حكاية قرية في القليوبية بيسافر أهلها لمعرض الكتاب في رحلة بتحصل بشكل سنوي، وفي يوم محدد (الجمعة - أول يوم في أيام معرض الكتاب).

"الفكرة بدأت بمجهود شخصي مني، لإني بطبعي بحب القراءة وبروح معرض الكتاب من أيام لما كنت طالب، وبعدها بقيت باخد أسرتي معايا، لما أعضاء الجمعية عرفوا، ماكنش عندهم خلفية كاملة عن المعرض، فشرحتلهم الفكرة وعجبتهم، واقترحوا إننا نعمل رحلة لأهالي القرية ونروح كلنا المعرض".


بيقولنا "سالم" إن قرية الشوبك بيعيش فيها حوالي 50 ألف نسمة، وإن الجمعية في البداية كانت بتعمل أنشطة ثقافية، زي "يلا نحكي"، ودي فعالية بتتعمل كل يوم خميس من كل أسبوع، وفيها بيقرأ "سالم" لأطفال القرية كُتب توسع مداركهم وآفاقهم، وتكون فرصة مناسبة إنهم يبعدوا عن الموبايلات ويتم عزلهم ولو لمدة قصيرة من الوقت عن السوشيال ميديا، وفي آخر كل أمسية ثقافية، بيدوا كتاب هدية لكل طفل، بحيث تكون حصيلة كل طفل من الكتب، 52 كتاب في السنة!

"بما إننا جمعية أهلية، ولازم يكون لينا أكتر من فعالية في أنشطة مختلفة، بحيث مايبقاش دورنا فقط إننا نوزع وجبات إطعام في رمضان وما شابه من الأنشطة، فقررنا نرفع شعار "إطعام العقول بجانب إطعام البطون"، وننشر ثقافة القراءة ونرفع السلوك الحضاري". - بيحكيلنا "سالم".

من قرية كان بيروح منها عدد قليل جدًا من أهلها، حوالي 10 أفراد، لمعرض الكتاب، لقرية بقى بيروح مئات وآلاف منها، في واحدة من أكبر الرحلات اللي بتجمع أبناء القرية، بتبتدي الرحلة في 2021، لما أعلنت جمعية تنمية المجتمع المحلي بكفر الشوبك عن تنظيم الرحلة، وشارك وقتها 75 فرد من أهالي القرية، وكانت الرحلة مجانية تمامًا، الفكرة بدأ تنتشر في القرية، وفي 2022، شارك في الرحلة 250 فرد على 5 باصات رحلات، وبسعر رمزي 20 جنيه.

"الإقبال زاد أضعاف في 2023، وشارك في الرحلة 750 فرد من أبناء القرية، واتقسمنا على 15 أتوبيس.. وقتها الميديا والمواقع الصحفية بدأت تاخد بالها من اللي بنعمله وبدأوا يتكلموا عن المبادرة لدرجة أسعدت كل أهالي القرية، وشجعت أهالي أكتر ييجوا معانا السنة اللي بعدها".

بيحكيلنا "سالم" إن في 2024، الإقبال زاد فعلًا لحوالي الضعف، وشارك في الرحلة 1300 فرد من طلاب مدارس وجامعات وربات بيوت وأسر كاملة، واتقسموا على 30 أتوبيس، واتفاجئ دكتور كمال وأعضاء الجمعية بمشاركة العدد الكبير ده من أهالي القرية واهتمامهم بالقراءة وحرصهم على شراء كتب من معرض الكتاب، وتشجعيهم لبعض بينهم وبين بعضهم إنهم يشاركوا في الرحلة.

"أنا فاكر في 2024، شارك معانا في الرحلة حاج عنده 70 سنة، وخليناه قائد الرحلة وقتها تكريمًا وتقديرًا لِيه".

رحلة معرض الكتاب بتعملها الجمعية بأسعار رمزية جدًا بدأت بشكل مجاني، والسنة دي الاشتراك كان 75 جنيه، مقابل المواصلات ووجبة خفيفة بتتوزع على المشاركين في الرحلة، وبيشرف على الرحلة 2 متطوعين في كل باص، عشان يوجّهوا المشاركين، ويساعدوهم في اختيار الصالات وقاعات الكتب المخفضة ومكان سور الأزبكية، وفي أحيان كتير كانت الجمعية بتساعد في دفع تمن الكتب لغير القادرين ماديًا من أهالي القرية.

جمعية تنمية المجتمع المحلي بكفر الشوبك هي جمعية أهلية بتشرف عليها وزارة التضامن الاجتماعي وده سهّل على الجمعية، التنسيق مع الهيئة العامة للكتاب لدخول المشاركين المعرض بشكل مجاني، من خلال خطابات رسمية بتوجهها الوزارة للهيئة، واللي بتقدم كل التسهيلات للجمعية، ومع ذلك الجمعية بتبقى محتاجة للدعم المادي، وده واحد من أهم التحديات اللي بتواجه الجمعية وهو توفير المصاريف اللازمة اللي بيحتاجوها لإيجار باصات الرحلة، والوجبات الخفيفة.

"في سنة من السنين، واحد من أهالي القرية تبرع لنا بإيجار باص من الباصات، وقالنا إنه حابب إن الباص يكون موجه للأيتام وذوي الإعاقة وغير القادرين ماديًا من أهالي القرية".

السنة دي في 2025، الرحلة اللي بدأت بفكرة بسيطة لحلم مُلهم، كبرت لدرجة إن شارك فيها 1750 من أبناء القرية والقرى المجاورة لكفر الشوبك وتم توزعيهم على 45 أتوبيس!
وده أكبر عدد شهدته المبادرة من وقت ما بدأت، وواقع بيقول بالأرقام إزاي الفكرة أثرت في وعي أهالي القرية.

"السنة دي فيه 5 قرى في القليويبة وتحديدًا في مركز شبين القناطر، هيعملوا نفس الرحلة لمعرض الكتاب، وفيه بعض الجمعيات الأهلية في القرى المجاورة تواصلوا معايا عشان يسألوا عن تفاصيل خاصة بالرحلة، ويستعينوا بخبراتنا في المبادرة".

قد إيه فكرة ملهمة وجميلة ومليانة بالأمل خلتهم يستحقوا يفوزوا وبجدارة، بالمركز الأول في فئة المؤسسة التنويرية بالمشروع الوطني للقراءة في 2024، وبكلمات ملهمة من القائمين على المشروع الوطني للقراءة استلم دكتور كمال سالم الجايزة بالنيابة عن جمعية تنمية المجتمع المحلي بكفر الشوبك.


مشهد عظيم بيشهد على فرحة أهالي القرية اللي كانوا حاضرين حفلة استلام الجائزة، ودموع الفخر في عيونهم بتوصل للمشاهد قد إيه هما حاسين إنهم حققوا إنجاز وطني هيلهم ناس كتير في مصر، وهينشر فكرة ليها رسالة عظيمة وهي نشر الوعي بالقراءة، لإنهم أثبتوا إنهم زي ما بيقولوا عن نفسهم "رحلة جماعية في حب المعرفة".

يحكيلنا دكتور كمال في حواره معانا، إن من بين كل ردود الأفعال والقصص المؤثرة اللي قابلته في تنظيم الرحلة كل سنة، إلا إن هتفضل قصته المفضلة على الإطلاق، لما بنت صغيرة من أبناء القرية شاركت معاهم في الرحلة وبعتتله رسالة بعدها بتقوله فيها: "شكرًا ليكم عشان حققتولي حلم من أحلام حياتي".

من قرية بسيطة في القليوبية لفكرة كبرت مع الوقت، رحلة معرض الكتاب بقت أكتر من مجرد فسحة، بقت حلم بيتحقق كل سنة لناس كتير. مبادرة بدأت بخطوة صغيرة، وصلت إنها تجمع آلاف من أهل القرية، وتخلي القراءة جزء من حياتهم. الجميل إن الفكرة مش بس أثرت في اللي شاركوا فيها، لكنها كمان بتلهم قرى تانية تعمل نفس المبادرة، وده دليل إن الأحلام البسيطة ممكن تعمل فرق كبير لما تكون نابعة من حب وطموح