ليه الدرب بقى اسمه "الأحمر"؟

متحف آثار إسلامية مفتوح دروبه كتيرة

منطقة الدرب الأحمر من أقدم مناطق القاهرة التاريخية ومن أكبر المتاحف الإسلامية المفتوحة وبتضم 65 أثر إسلامي.شوارعها الكتيرة كانت سبب في تسميتها بالدرب، لكن ليه الأحمر ارتبط بيها وبقى اسمها "الدرب الأحمر"؟

دم المماليك غطى كل شوارع الدرب

حدوتة من الحواديت اللي اتحكت، إن التسمية بترجع للون الدم اللي سال من مذبحة القلعة، واللي من كترته لزق في الأرض وماخرجش، لكن الحدوتة دي نفاها محمد حسام الدين إسماعيل، أستاذ الآثار الإسلامية بجامعة عين شمس في كتابه "منطقة الدرب الأحمر... دراسة أثرية وثائقية"

باب أحمر صغير في العصر المملوكي

وقال "إسماعيل" إن المنطقة معروفة بالاسم ده من أيام العصر المملوكي، والأحمر في الحدوتة هنا مرتبط بالباب الأحمر اللي اتذكر في حجة السلطان حسن في القرن الـ 14 الميلادي، وهو عبارة عن باب صغير، مكانه دلوقتي أول حارة الروم من شارع الدرب الأحمر.

وصول أصحاب البشرة الحمراء للدرب

الحدوتة الأشهر للتسميةهي اللي حكاها المؤرخ أحمد شريف، المهتم بترميم منطقة الدرب الأحمر، وهي إن فيه مجموعة من الوافدين مع الفاطميين كانت بشرتهم حمرا وعاشوا في الدرب الأحمر فاتسمى الدرب باسمهم.

شوارع بتهمس بحكايات عن الحرف والمهن

كل شارع من شوارع الدرب الأحمر بيحكي حواديت عن ثراء الحرف والمهن في المنطقة؛ فكل شارع فيه متسمي على اسم مهنة، زي الكحكيين والفحامين والخيامية وغيرها.