أصل وفصل الأمثال الشعبية للشهور القبطية

من أكتر من 7000 سنة، أجدادنا المصريين القدماء، ماسبوش لينا آثار وبس، دول سابوا لينا تراث وعادات بنتوارثها من جيل لـ جيل، زي الشهور القبطية اللي تعتبر جزء مهم من تراثنا المصري، وده مش بس علشان الفلاحين بيعتمدوا عليها في الزراعة، لكن كمان علشان أجدادنا سابولنا أمثال شعبية للشهور القبطية بتختصر خبرتهم في الحياة والزراعة في جُمل صغيرة.

كل شهر قبطي له طابع مميز وأمثال بتوضح حالة الطقس أو الزرع أو حتى المزاج العام بتاع الشهر. في الموضوع ده هنعرفكم أكتر عن أصل وفصل الأمثال الشعبية للشهور القبطية.

توت: "اروي ولا تفوت"

شهر "توت" هو أول شهور السنة القبطية اللي بييجي في الفترة من 11 سبتمبر لـ 10 أكتوبر في التقويم الميلادي، وهو أول شهر في موسم الفيضان "اخيت" في مصر القديمة، لأن وقتها كان بيفيض النيل وبيغطي كل غيطان مصر. اسم الشهر جاي من "تهوت" إله الحكمة عند المصريين القدماء، وزمان كانوا بيحتفلوا برأس السنة القبطية في أول شهر "توت" في عيد اسمه "النيروز" يعني عيد السنة الجديدة، ويومها كان بيتعمل كرنفال كبير بيلف مصر كلها.

الشهر ده هو شهر الزراعة الأساسي، والمثل بيقول "توت اروي ولا تفوت" يعني الفلاح اللي مش هيقدر يروي أرضه في الشهر ده، مش هيستفيد من زراعتها. الفلاحين كانوا عارفين إن أي غلطة في بداية الزرعة كانت قادرة إنها تبوظ المحصول كله.

بابة: "ادخل وأقفل البوابة"

أول ما الجو بيبدأ يبقى ألطف شوية، تعرف إن احنا بقينا في شهر "بابة"، الشهر اللي بييجي في الفترة من 11 أكتوبر لـ 9 نوفمبر. اسم الشهر جاي من "آبه" وهو عيد الإله أمون في طيبة، ولو روحت أي أرض زراعية في الشهر ده، هتلاقيها كلها خُضرة.

الشهر بيكون فيه ريح وبرد خفيف، والفلاحين بيقولولك في المثل: "ادخل وأقفل البوابة" علشان تحمي نفسك من أي تغيير مفاجئ في الطقس. ده غير المثل التاني اللي بيقول: "إن صح زرع بابة يغلب النهّابة، وإن خاب زرع بابة مايجيبش ولا لبابة"، يعني لو المحصول كان كتير في شهر "بابة" بيكون مُربح للفلاح مهما اتاخد من محصوله، ولو الزرع في "بابة" ماكنش كتير أو قليل، مايجيبش ولا لبابة عيش.

هاتور: أبو الدهب المنتور  

لو روحت أي أرض زراعية في الفترة من 10 نوفمبر لـ 9 ديسمبر، ولاقيتها كلها قمح، هتعرف إننا في شهر "هاتور"، لأنه معروف بزراعة القمح، علشان كده اسمه "أبو الدهب المنتور". شهر "هاتور" اسمه جاي من "حتحور" وهو إله الحب والجمال والخصب والمحبة في مصر القديمة.

والفلاحين المصريين بيقولوا كمان في مثل تاني: "إن فاتك هاتور، اصبر لما السنة تدور"، يعني لو مازرعتش قمح في هاتور، اصبر للسنة الجاية علشان تزرع.

كيهك: شيل إيدك من غداك، وحطها في عشاك

لما نبدأ نلاقي إن النهار بقى قصير، والليل طويل، فنعرف إن شهر "كيهك" دخل علينا، اللي بيبدأ في الفترة من 10 ديسمبر لـ 8 يناير. شهر "كيهك" اسمه جاي من الإله "كا هاكا" وهو إله الخير، أو الثور المقدس المعروف بالعجل "أبيس". والفلاحين المصريين في الشهر ده، بيجهزوا الأرض للزراعة الصيفية، وبيجمعوا القصب ويشربوا عصيره، علشان يدفيهم من البرد.

الفلاحين في المثل بيقولوا: "شيل إيدك من غداك وحطها في عشاك"، لأن مجرد ما تيجي تتغدى هتلاقي على طول ميعاد العشا جه، فتشيل إيدك من الغدا وتحطها على طول في العشا مافيش وقت للتفسير. وفيه مثل تاني بيقول: "البهايم اللي ماتشبعش في كياك، ادعي عليها بالهلاك"، لأن البرسيم بيبقى كتير في الشهر ده.

طوبة: تخلي الصبية كركوبة

أول ما تحس إنك مش قادر تقوم من السرير، وقاعد منكمش من شدة البرد، فتعرف إننا بقينا في شهر "طوبة" اللي بيخلي الصبية كركوبة. الشهر بيبدأ في الفترة من 9 يناير لـ 7 فبراير. و"طوبة" اسمه جاي من الإله "أمسو أو طوبيا" وهو الإله الأسمى والأعلى وإله المطر.

الفلاح المصري بيقسم "طوبة" من حيث الطقس لـ 3 أجزاء وهما: "طوبة" وهي الـ 10 أيام الأولى من الشهر لأن البرد فيهم بيكون شديد. و"طبطب" لأن البرد فيهم بيخلي الإنسان "يطبطب" يعني يرتعش. وآخر 10 أيام "طباطب" لأن الجو بيتقلب فيهم 180 درجة وبيبقى مليان مطر.

أمشير: أبو الزعابيب الكتير

الفلاحين كانوا أول ما يلاقوا دوامات ترابية ورياح شديدة، كانوا يعرفوا إن شهر "أمشير" بدأ، اللي بييجي في الفترة من 8 فبراير لـ 10 مارس. شهر "أمشير" اسمه جاي من "مشير" وهو إله الرياح والعواصف المصري القديم.

الفلاح المصري قسم شهر "أمشير" لـ 3 أقسام وهما: "مشير" اللي بيتخدع فيهم الفلاح بالدفء، و"مشرشر" اللي بيرجع البرد فيهم يبقى شديد، وبتزيد الرياح، وبينزل المطر، و"شراشر" اللي العواجيز بيبدأوا يتحركوا فيه بعد ما الدنيا تبدأ تدفي.

وعلشان كده الفلاحين قالوا عنه في المثل "أمشير أبو الزعابيب الكتير ياخد العجوزة ويطير"، لأن أي حاجة ماكنتش متثبتة كويس في الشهر ده، كانت ممكن تطير.

برمهات: روح الغيط وهات

الفلاح المصري بيفرح بدخول شهر "برمهات" لأن فيه الحرارة بتزيد وبالتالي المحاصيل بتنضج. "برمهات" اسمه جاي من الإله "بامونت" إله الحرب والحرارة، والمصريين القدماء أطلقوا عليه شهر الشمس والحرارة الصغيرة.

الشهر بيبدأ في الفترة من 10 مارس لـ 8 أبريل، وقالوا عنه في المثل: "برمهات روح الغيط وهات قمحات وعدسات وبصلات"، علشان الأرض الزراعية بتكون مليانة بالمحاصيل، اللي جاهزة على طول للحصاد.

برمودة: دُق العامودة

في شهر "برمودة" الأرض بتبقى في أجمل حالاتها، مليانة زهور ومحاصيل، والفلاح بيحس بتعبه طول السنة في الزراعة. "برمودة" اسمه جاي من "رنودهه" أو "رئونه" وهو إله الحصاد، وبيرمز له بالأفعى المقدسة.

"برمودة" هو شهر الخير والوفرة، وبيبدأ في الفترة من 9 أبريل لـ 8 مايو، والفلاحين قالوا عنه في المثل: "برمودة دُق العامودة" يعني دُق سنابل القمح بعد نضجها.

بشنس: يكنس الأرض كنس

بعد موسم طويل من الشغل الشاق في الزراعة، بييجي شهر "بهنس"، وبيحس فيه الفلاح بالراحة النفسية لأنه شهر الحصاد اللي بيبدأ في الفترة من 9 مايو لـ 8 يونيو. شهر "بشنس" اسمه جاي من الإله "خنسو" وهو إله القمر عند المصريين القدماء.

الفلاحين كانوا بيحصدوا فيه المحاصيل الأساسية زي القمح، وقالوا عنه في المثل: "بشنس يكنس الأرض كنس"، لأن الأرض فيه بتكون خالية من المحاصيل بعد الحصاد، وكمان في "بشنس" النهار بيكون طويل والليل قصير.

بؤونة: خزن المؤونة

درجات الحرارة بدأت تزيد؟ يبقى احنا بدأنا في شهر "بؤونة" أبو الحرارة الملعونة، اللي بيبدأ في الفترة من 8 يونيو لـ 7 يوليو. الفلاحين قالوا أمثلة كتير على شهر "بؤونة" زي: "بؤونة خزن المؤونة" وده لأنه تاني شهر في حصاد المحصول، والفلاحين بيجمعوا المحصول فيه ويشيلوه على جمال علشان يخزنوه. ومثل زي " بؤونة معونة" لأن في الشهر ده الناس بتتعاون مع بعضها خصوصًا في أعمال الحصاد.

الفلاحين قالوا كمان على "بؤونة" إنه بيفلق الحجر، لأن المعادن والأحجار الكريمة بتستوي فيه بسبب شدة الحرارة. ده غير إن "بؤونة" هو أفضل توقيت لحصاد عسل النحل، لأنك في الشهر ده هتاخد عسل "قطفة أولى".

أبيب: فيه العنب يطيب

أول ما تلاقي العنب بقى طعمه حلو، تعرف على طول إننا بقينا في شهر "أبيب" لأن فيه العنب بيطيب، الشهر بيبدأ في الفترة من 8 يوليو لـ 9 أغسطس. شهر "أبيب" اسمه جاي من الإله "ابيفي" أو "أبيب" وهو الثعبان الكبير اللي اهلكه حورس. الفلاحين بيعتبروا شهر "أبيب" هو شهر الخير لأن بيحصدوا فيه الفواكه الصيفية المنعشة.

مسرى: تجري فيه كل ترعة عسرة

مسرى هو شهر الفيضان وآخر شهور السنة القبطية، اللي كان بيعتمد عليه المصري القديم اعتماد تام في الزراعة، الفيضان مش بس بيروي الأرض، لكن كمان كان بيجيب معاه خير كتير للبيوت. الشهر بيبدأ من 10 أغسطس لـ 5 سبتمبر، واسمه مشتق من "مس رع" ابن الشمس، لأن الشهر مخصص لولادة الشمس.

والفلاحين قالوا عليه في المثل: "مسرى تجري فيه كل ترعة عسرة"، يعني بتزيد فيه مياه الفيضان. الأمثال دي مش بس كلمات، لكنها حكايات وخبرات بتورثها الأجيال. الشهور القبطية هتفضل دايمًا شاهدة على ذكاء المصريين وحبهم للحياة والطبيعة.