اقرأ الخبر، الجيش انتصر.. 53 سنة على مانشيتات أكتوبر

في الوقت اللي العالم كله كان شايف إن الجيش الإسرائيلي "لا يُقهر"، كانت مصر وكالعادة بتحقق المستحيل، ومع شروق شمس 6 أكتوبر، العالم كله بيصحى على خبر واحد ، وهو "الحرب بدأت، مصر عبرت خط بارليف".

وعشان في الوقت ده كانت الصحافة هي اللي بتنقل الأخبار، فقررنا نفتح الأرشيف ونشوف ايه اللي اتكتب عن نصر أكتوبر من 53 سنة.

النصر في مانشيتات مصر:

في سنة 1973م، كانت الأهرام، والأخبار، والجمهورية أشهر الجرائد المصرية، وطبعًا مع بداية الحرب أخبار الجبهة بقت هي العنوان الأهم للمصريين.

في "الأهرام" واللي كان رئيس تحريرها وقتها محمد حسنين هيكل، كان المانشيت الرئيسي: "قوتنا عبرت القناة واقتحمت خط برليف" وده لأن الجريدة مش بس كانت بترصد أخبار الحرب على الجبهة ولكن كمان أوضاع السياسات الدولية اللي اتوترت في اللحظة دي.

أما جريدة "الأخبار" فاختارت مانشيت مباشر، وهو: "عبرنا القناة ورفعنا علم مصر" في تغطية بتبرز النجاحات المصرية من تقدم للقوات، وأسر عدد من ضباط وجنود الاحتلال.

وخلال تغطيتها للحرب، استخدمت "الأخبار" مجموعة من العناوين اللي وثّقت تفاصيل الحرب لحظة بلحظة، زي: "إسرائيل تعترف بنجاح العبور المصري وتدفق المدرعات المصرية في سيناء"، "استولت قواتنا على معظم الشاطئ الشرقي للقناة وتواصل القتال بنجاح"، "قواتنا البحرية تدمر الأهداف المهمة للعدو على ساحل سيناء الشمالي"، "المقاتلات المصرية تضرب مواقع العدو وتتصدى لهجوم جوي كبير"، "القوات السورية تقتحم مواقع العدو وتحرر جبل الشيخ وعدة مراكز بالجولان".

وجريدة "الجمهورية" اللي كان رئيس تحريرها وقتها الصحفي مصطفى بهجت، كتبت: "إسرائيل في ذهول" كلمتين اتنين بس كانوا قادرين ينقلوا الصورة الكاملة للي بيحصل على الجبهة، عشان تبان المفارقة والجيش اللي اتقال عنه لا يقهر يتحول في ظرف ساعات لجيش ضعيف عاجز، خسران المعركة من قبل ما يدخلها بفضل الضربات المصرية المتتالية.

ويوم 7 أكتوبر كان المانشيت الرئيسي للجريدة: "قواتنا تقاتل الآن فوق سيناء"، و"استسلموا بمدرعاتهم.. ضباط وجنود العدو يستسلمون لقواتنا بكامل أسلحتهم عقب معارك طاحنة بسيناء"

النصر المصري حديث العالم:

تأثير الحرب ماكنش بس مقتصر على مصر ودولة الاحتلال، هو كمان كان بيشغل الأمن العالمي، عشان كده مش هيكون غريب لما تعرف أنه سنة 1973 ورغم إن مفيش موبايلات ولا سوشيال ميديا زي دلوقتي لكن "نيويورك تايمز"، والجارديان"، وصحف الدول المختلفة كانت بتنقل الأخبار لحظة بلحظة.

في جريدة "نيويوك تايمز" الأمريكية كان المانشيت الرئيسي في الصفحة الأولى: "العرب والإسرائيليون يقاتلون على جبهتين.. المصريون يقيمون جسورًا عبر السويس.. والمعارك الجوية تتصاعد"

أما "الجارديان" البريطانية فكتبت: "السادات يتجه إلى الحرب" وصحيفة "دير شبيجل" الألمانية كتبت يوم 15 أكتوبر، يعني بعد مرور 10 أيام من ساعة بدء الحرب "أسطورة إسرائيل اهتزت بشدة" عشان تأكد التفوق العسكري والسياسي المصري على حساب دولة الاحتلال".

زي ما الصحافة كانت شاهدة على واحدة من أهم لحظات التاريخ المصري الحديث، فالأرشيف الصحفي النهارده بيدينا فرصة نشوف الحرب زي ما عاشها المصريون وقتها، خبر بخبر، ومانشيت بمانشيت. عشان يفضل نصر أكتوبر مش مجرد ذكرى بنفتكرها وخلاص، لكنها عقيدة مؤمنين بيها وبننقلها من جيل لجيل.