نجاحات في الأفلام والإعلانات.. حوار مع موسى عيسى منتج فيلم "ولاد رزق 3

ورا كل فيلم أو إعلان ناجح حبيناه، نجوم كتير بيبنوا عوالم جديدة على الشاشة. واحد من النجوم دول هو المنتج "موسى عيسى"، اللي اسمه ارتبط بأعمال حبيناها زي "بنك الحظ" و"ولاد رزق"، وكمان إعلانات فضلنا نفتكرها زي إعلان "البريد المصري"، اتكلمنا معاه عن نجاح آخر أعماله "ولاد رزق 3" ورأيه في المشهد السينمائي الحالي.

"نجوم الساحل" و"السلم والثعبان 2".. محطات "موسى عيسى" الفنية الجاية

العمل السينمائي المتكامل بالنسبالي بيمزج بين الإثارة والدرامااتكلمنا معاه عن نوعية الأفلام اللي كان عاوز ينتجها أول ما بدأ، وقال "عيسى": "أول ما بدأت كنت حابب أقدم أفلام أكشن وسينما تشويقية، مع التركيز على القصص الإنسانية العميقة. كنت دايمًا مهتم بمزج الإثارة مع الدراما، بحيث يكون العمل السينمائي متكامل بين الحكاية والتشويق. وبالطبع، كنت حابب أساهم في تطوير السينما مصرية بحيث يكون ليها حضور قوي على المستوى العالمي".

"بعد نجاح ولاد رزق، بقي فيه قابلية أكبر من النجوم للمشاركة في مشاريع البطولة المشتركة”
التعاون بين النجوم بيخلق حالة مميزة بتساعد على تعدد المواهب وأكيد نجاح الفيلم، فسألنا "عيسى" ⁠هل بعد نجاح تجربة ولاد رزق بقى في قابلية أكتر من النجوم لمشاريع البطولة المشتركة؟ وقال: "أكيد، بعد نجاح ولاد رزق، بقي فيه قابلية أكبر من النجوم للمشاركة في مشاريع البطولة المشتركة. نجاح الفيلم أثبت إن التعاون بين النجوم مختلفين ممكن يحقق نتائج مذهلة، مش بس على المستوى الجماهيري، ولكن كمان على مستوى الإنتاج. النجوم بقى عندهم إيمان أكبر بالفكرة دي، والسينما بتستفيد من تعدد المواهب في نفس المشروع". 

دور التوازن بين العمل الفني والإنتاجي في تحقيق أعلى جودة للعمل الفني
بعد مشاهد الأكشن الخطيرة واختلاف الأماكن اللي اتصور فيها فيلم "ولاد رزق 3"، سألنا "عيسى" عن أصعب حاجة في إنتاج عمل زي ولاد رزق 3؟ وكان رده "أصعب حاجة في إنتاج ولاد رزق 3 كانت التنسيق بين المشاهد، خصوصًا مشاهد الأكشن اللي احتاجت وقت وجهد كبير لضمان دقتها وسلامتها. كمان كان لازم نخلق توازن بين العمل الفني والإنتاجي، بحيث نقدر نحقق أعلى جودة. وأكيد العمل مع فريق كبير من هوليوود كان بيتطلب تنسيق مستمر لضمان إن كل حاجة هتخرج بالشكل المطلوب".

السينما العربية في طريقها للتعافي
⁠وسمعنا حاليًا من ناس كتير عبارة إن السينما بتتعافى أو بترجع تاني، فسألنا "عيسى" هل شايف كده فعلا؟ وقال: "أكيد، أنا شايف إن السينما العربية في حالة تعافي وتطور مستمر. المشاريع الكبيرة زي ولاد رزق وغيرها من الأفلام اللي شوفناها مؤخرًا بتعكس هذا التطور. الجمهور بدأ يرجع بشكل أكبر إلى السينما، وده شيء بيشجعنا على الاستمرار في تقديم أفلام جديدة ومبتكرة. في تطور ملحوظ في الصناعة بشكل عام، سواء من حيث الإخراج أو الإنتاج أو التوزيع، والسينما العربية بتأخذ مكانة أكبر على المستوى العالمي".

فيلم "ولاد رزق 3: القاضية" فاز بجايزة أفضل فيلم في النسخة الخامسة من مهرجان الـ Joy Award، وحقق إيرادات كبيرة في السينما المصرية وصلت لأكتر من258.2 مليون جنيه، والفيلم اتصور بين مصر والسعودية.