وجبات مجانية طول السنة.. حوار مع ياسمين سلامة مؤسسة مطعم "سبيل مبروكة"

بيقولوا إن لازم تسيب باب موارب بينك وبين ربنا، تقدر تدخل منه في أي لحظة أنت محتاجاها، والحقيقة إن الأبواب كتير، بس هيفضل الباب الأهم هو "الخير" وخصوصًا "الإطعام". ناس كتير بتقرر إن يكون بابها الموارب بينها وبين ربنا هو "الإطعام" لأن بيبقى له مردود كبير وعظيم، وعشان المفروض إن الناس دايمًا للناس! 

ياسمين سلامة، مؤسسة مطعم وسبيل "مبروكة"، كانت ناجحة جدًا في شغلها بس في وقت قررت تستقيل منه عشان كان هدفها إنها تعمل مشروع يكون هدفه هو "الإطعام"، وبالفعل سنة 2023، عملت مطعم "سبيل مبروكة" في قلب الإسكندرية اللي أي حد يقدر يدخل وياكل فيه من غير ما يدفع أي فلوس طول السنة، والأهم إن الأكل مطبوخ بكل حب، لدرجة إنك مش هتحس خالص إن فيه فرق بينه وبين أي مطعم تاني. 

اتكلمنا مع ياسمين سلامة، مؤسسة مطعم "سبيل مبروكة" وسمعنا منها القصة الكاملة ورا المطعم، وعن هدفها الأساسي من المشروع ده، وعن أكتر اللحظات الإنسانية اللي بتشوفها في المطعم، وعن رحلتها اللي بدأت بأمل واحد، وهو إن مافيش أي حد يبقى جعان أبدًا.

مطعم أرباحه بتروح للإطعام 

سنة 2023، اتأسس مطعم "مبروكة"، ولكن الهدف الأساسي ورا تأسيسه ماكنش الربح، كان الإطعام. ياسمين سلامة المؤسسة، بتحكيلنا إنها فكرت تفتح مطعم يكون هدفه الربح بس مش علشان تكون غنية وتفتح فروع كتير، لكن علشان تقدر تاخد الربح ده تعمل بيه إطعام مجاني للمحتاجين واللي مش محتاجين طول السنة.


"رمضان 2023 كان بداية ولادة سبيل مبروكة" 

أول ما فتحنا مطعم مبروكة سنة 2023، كنا شغالين 6 أيام ومخصصين يوم للإطعام، كنا بنقفل للزباين العاديين، ونفتحه بس للمحتاجين، كنا بنعمل وجبات في المطعم وأي حد محتاج ياكل بيقدر يدخل وياكل من غير أي فلوس، بس في رمضان 2023، كانت الولادة الحقيقية لـ سبيل مبروكة، لأن وقتها حد جه وعرض علينا مكان صغير نعمله مائدة رحمن، وقتها قولت طيب ليه المكان ده مايبقاش مطعم زي أي مطعم الناس تدخل تاكل فيه، بس من غير ما تدفع فلوس، ومن هنا جت الفكرة.

ياسمين سلامة - مؤسسة مطعم "سبيل مبروكة"|

"حبي للإطعام هو السبب ورا فكرة سبيل مبروكة" 

قصة سبيل مبروكة بدأت بعد ما استقلت من شغلي، وقتها كان نفسي أعمل حاجة ليها علاقة بالإطعام، وأثناء ما كنت بشتغل كنت مخصصة يوم في الشهر، كنت بطبخ فيه وبنزل أوزع الأكل اللي أنا طبخته على الناس اللي موجودة حوالين المكان اللي أنا ساكنة فيه، ومن هنا بدأت أحس إن هي دي الحاجة اللي أنا عايزة أعملها.

ياسمين سلامة - مؤسسة مطعم "سبيل مبروكة"

دايرة الخير: السبب ورا اسم "سبيل مبروكة" 

كلنا عارفين إن الخير عبارة عن دايرة كبيرة، ومردودها أكيد هيرجعلك حتى لو بعد سنين. "ياسمين" بتقولنا إن السبب ورا اسم "سبيل مبروكة" هو دايرة الخير، لأن الزباين العاديين اللي بيدخلوا ياكلوا في المطعم بيدفعوا فلوس وبيساهموا في إطعام ناس محتاجة وهما مش عارفين، وحتى المتطوعين اللي بييجوا يساعدوا في طبخ الوجبات، فالدايرة دي كلها هي أكيد مبروكة.


3000 وجبة في رمضان 2025
من أول ما بدأ مطعم "سبيل مبروكة" كان بيوزع في اليوم من 20 لـ 30 وجبة في اليوم، وفي رمضان 2023، وزعوا أكتر من 5000 وجبة، أما رمضان السنة دي 2025 عملوا حوالي 3000 وجبة، و"سبيل مبروكة" بقى مفتوح للناس 3 أيام في الأسبوع بدل يوم، لأي حد يدخل ياكل فيه ببلاش، وفيه يومين مُخصصين لعزومة أي جمعية خيرية.



سواء في السبيل أو في المطعم.. الطعم واحد!

لو دخلت تاكل في "سبيل مبروكة" هتلاقي نفس جودة الأكل هي هي اللي بتتقدم في المطعم نفسه، "ياسمين" بتقولنا إنهم من أول يوم وهما مقررين إن مايبقاش فيه فرق في أي نوع من الخامات اللي بتتقدم أو اللي بيتم استخدامها في الطبخ، وحتى كمان المنيو هو هو سواء في السبيل أو في المطعم.


"سبيل مبروكة": بيت من غير باب 

لما بنحب نروح مطعم أو أي مكان جديد، بنميل دايمًا للأماكن الـ Cozy اللي تحس فيها كأنك قاعد في بيتك، قاعد مستريح ومش متكتف، هو ده بالظبط اللي هتحسه لما تدخل مطعم "سبيل مبروكة". "ياسمين" بتقولنا إن مطعمها هو بيت من غير باب، وكان هدفها الأول من المطعم هو إنها توزع وجبات على الناس اللي موجودة في الشارع اللي هي فيه، ولكن دلوقتي "سبيل مبروكة" مفتوح لكل الناس تقدر تدخل وتاكل فيه، "ياسمين" بتحكيلنا إن "سبيل مبروكة" هو بيت لأي حد سواء محتاج أو مش محتاج.


"أنا بعمل إطعام عشان أنا اللي محتاجة مش الناس"

أي حد بيعمل إطعام بشكل منتظم، بيعملوه عشان هما اللي محتاجين الفضل بتاعه مش الناس، لأن الناس كده كده موجودين كتير طول السنة، فالمساعدة أو العطاء أول حد بيبقى مُستفيد منها هو الشخص نفسه، الإطعام بيفهمك حاجات كتير وبيديلك دروس أكبر، زي إن كل حاجة في الدنيا هي رزق، يعني لما شخص الاقيه بيخبط على باب المطعم ده بيبقى رزق ربنا باعتهولي، والعطاء بالنسبة ليا هو مساعدة لنفسي إني ابقى أحسن. ياسمين سلامة - مؤسسة مطعم "سبيل مبروكة"


"الناس بتتعامل مع سبيل مبروكة كأنه خروجة" 

من أكتر المواقف اللي مأثرة فيا من ساعة ما بدأت، لما واحد من محافظة تانية كلمني وطلب يحجز عندنا في المطعم، لأنه قالي إن أولاده نفسهم يخرجوا وهو ماعندهوش القدرة المادية إنه يخرجهم، وساعتها عشان هو جاي من مكان بعيد حجزتله ترابيزة، لكن في العادي ماعندناش حجوزات، ففكرة سبيل مبروكة مش بس في الطبق اللي بيتقدم، لكن كفكرة إن الناس بقت تتعامل معاه كأنه خروجة، ودي أكتر حاجة بتبسطني.

ياسمين سلامة - مؤسسة مطعم "سبيل مبروكة"

الإطعام مش بس للناس.. ده كمان بيشحن روحك

لو شاركت قبل كده في أي وجبات إطعام للمحتاجين، فأنت كده بتشحن روحك وبتدي لنفسك طاقة قبل ما بتشبع الناس بالأكل. "ياسمين" بتقولنا إن الإطعام بيديها طاقة للحياة، وبيحسسها بقيمتها، وبيحسسها إن ليها فايدة وإنها بتعمل حاجة، فطاقة الخير اللي بتاخدها هي دايمًا اللي بتشحنها، وبتشحن أي حد بيعمل الإطعام.


"أنا مجرد أداة في الإطعام"

حصل معايا موقف عمري ما هنساه، وقت توزيع الوجبات قبل ما أعمل مطعم "سبيل مبروكة"، جه واحد قالي أنا محتاج وجبة وكنت أنا خلصت كل الوجبات اللي معايا، فقولتله مافيش، المهم مشيت وروحت بيتي وأنا نازلة من العربية لاقيت معايا وجبة ماوزعتهاش، واتفاجئت بنفس الراجل موجود بالصدفة في نفس المكان، فأنا مجرد أداة في الإطعام، واللي بيرزق هو ربنا وهو اللي بيستخدمك.

ياسمين سلامة - مؤسسة مطعم "سبيل مبروكة"


لو عايز اتطوع في سبيل مبروكة أعمل إيه؟ 

لو أنت بتحب فكرة الإطعام وعايز تطوع في "سبيل مبروكة"، فتقدر تبعت رسالة لصفحة مطعم مبروكة على انستجرام أو فيسبوك، وبعدها هيتم إضافتك على جروب واتساب خاص بالمتطوعين، وبيكون فيه جدول بالمواعيد في فرعين مبروكة سواء فرع شارع فؤاد أو بحري، وفي الأغلب هتاخد يومين بس تطوع.