يوسف ناصر أول مصري يفوز بالمركز الأول في مسابقة اليونسكو تحت 25 سنة

مسابقة اليونسكو للتصوير كل سنة ليها موضوع، والسنة دي كان موضوعها الاحتفالات والمناسبات الدينية، وعشان كده يوسف ناصر اختار يشارك في المسابقة من خلال توثيق تراث أوشك على الاختفاء وهو "المرماح"، وأخد صورته من عيون أولاد بيتسلقوا سور المدرسة عشان يتفرجوا على المولد. طلع "يوسف" على سور المدرسة زيهم وأخد الصورة، وكانت أشعة الشمس بتزين الأحصنة البيضا اللي بترقص على نغمات المزمار.

فوز يوسف بالمسابقة مكانش سهل، ودي مش أول مرة يقدم، دي التالتة، والتالتة جات تابتة وكسب!  "يوسف" أصر على التقديم في المسابقة للمرة التالتة رغم عدم توفيقه مرتين لأنه زي ما قالنا "مفيش حاجة اسمها مستحيل، كل حاجة بتحصل بس محتاجة وقت وصبر، ولو ماحصلتش فأكيد هستفيد من التجربة".

يوسف بيقولنا:" أحلامي من ساعة ما بدأت تصوير هي أني أكون ضمن أفضل المصورين في العالم وده مش بعيد؛ وقت ما كنت بحلم بده مكنتش أتخيل إني هكون أفضل مصور هاوي على مستوى العالم في بريطانيا لمدة سنتين ورا بعض، فمفيش حاجة مستحيلة".

مصر مصوريها المبدعين كتير، إبداعهم مش في تخليد اللحظات في صور وخلاص ولكن في إضافة رؤية مختلفة للمنظر اللي بتشوفه عنينا وإن كل جزء من الصورة بيحكي قصة مميزة لينا.