في عيد ميلاد "ابن البلد".. 7 أغاني لمحمد فؤاد من ألحانه

"كل المشوار اللي أنا مشيته -رغم إني قدمت حاجات مرضية بالنسبالي- بس حاسس إني لسه ماقُلتش كل حاجة"، ده اللي قاله محمد فؤاد في لقاء مع إسعاد يونس في برنامج صاحبة السعادة.

محمد فؤاد من الجيل الجميل اللي تفتح عينك على الدنيا أيًا كان سنك تسمع أغانيه في كل وقت وموقف بيعدي عليك، مبسوط، زعلان، بتحب، خارج من قصة حب فاشلة، عايز ترقص، مكتئب.

"فؤاد" نجاحه على مدار السنين اللي فاتت جه من اهتمامه الشديد باللي بيقدمه، تحسه بيحط كل تفكيره في كل مشاريعه، من قصص الأغاني لأفكار الكليبات والألحان. النهاردة عيد ميلاد "ابن البلد"، اللي قدم لون موسيقي مختلف عن غيره، وناس كتير ماتعرفش إن لِيه أغاني من ألحانه، ودي قايمة بالأغاني اللي عرفنا نوصلها.

حيران

أغنية الألبوم العاشر لفؤاد، وغناها في فيلم "إسماعيلية رايح جاي". الأغنية مش بس ألحانه لكن كمان كلماته، والألبوم ده لِيه غلاوة كبيرة عند كل اللي بيحبوا "فؤاد"، التعاون المشترك بين محمد فؤاد ومصطفى كامل اللي كتب أغلب كلمات الألبوم خلَّى الألبوم ده يحقق نجاح كبير ويمكن فيه ناس كتير اعتبرت الألبوم ده من أفضل الألبومات اللي عملها بسبب الاختلاف اللي قدمه فؤاد في الألبوم ده.

لا أظن

استكمالًا للكلام عن الدويتو العظيم اللي جمع فؤاد ومصطفى كامل، اللي كتب كلمات الأغنية، واللي لو حد سمعها ومايعرفش هي كلمات مين هيحس فيها ببصمة وشطارة مصطفى. الألبوم ده نجح تجاريًا بس كان من أضعف ألبومات فؤاد –حسب انتقادات كتير اتوجهت له-.  

تاني

مش أحسن ألحان فؤاد ولا أكتر أغانيه شهرة، بس هي من أكتر الأغاني المميزة اللي عملها الفؤش.

الله عليك

"رغم القسا.. رغم الدموع.. طالب من الليل الغميق لحظة شروق"
لو هنتكلم عن الأغنية دي يبقى لازم هنرجع لألبوم "كماننا" و"نفسك في إيه؟ كماننا".. واحد من أخف الألبومات اللي عملها فؤاد، ونجاحه الكبير انعكس على نجاح فيلم "إسماعيلية رايح جاي"، اللي حقق إيرادات كبيرة وقتها. أغاني الألبوم كانت أغلبها في الفيلم.

حبيبي يا 

الشكل المختلف للمزيكا اللي قدر فؤاد يقدمه في الأغنية دي كان ثورة في مسيرته، وده بعيدًا عن فيلم "غاوي حب" اللي غنى فيه الأغنية دي، بس افتكر إن الناس كلها كانت ماشية تغنيها بنفس اللحن والرتم بالظبط "الفُرقة عليا صعبة وإزاي يدارى شوقي وأنا اعمل إيه؟ لو أغمض عيني وأصحى ألاقيك هنا"

خدني الحنين 

أحلى أغنية اتكتبت عن الحنين للأماكن والصحاب والحب، اللحن نفسه بيحسسك بالحنين، "فؤاد" في أغلب لقاءاته بيحكي عن مدى ارتباطه بالأماكن اللي عاش فيها وبالذات حلوان اللي عاش فيها فترة طويلة بعد تهجير أهله من الإسماعيلية. 

الشمس

أقدم الأغاني في الليستة اللي لحنها فؤاد وتكاد تكون من أقدم الأغاني اللي لِيه، لحنها وغناها سنة 88 ونزلت في ألبوم "ياني".



أغاني تانية من ألحان فؤاد زي الدم، تاني، لا لا، ومحتار أنا، وطمني عليك اللي مكتوب في مواقع كتير إنها من ألحان فؤاد، لكن أقاويل كتير حوالين سرقة اللحن ده من أغنية تركي وليها توزيعات مختلفة. مافيش أي تأكيد إن فؤاد لحنها بنفسه.. وفي أول 2019  هينزل ألبوم جديد لِيه.