تفتكري كل الرجالة فعلًا توكسيك؟
طبعًا انتٍ عارفة وفاهمة إن "ضل راجل ولا ضل حيطة" ده مبدأ انتهى من زمان، وإن اختيارك الصح لراجل مناسب من الأول بيوفر عليكي مشاكل كتير ممكن تقابليها قدام، ولإن مسلسلات رمضان بتنقل جزء من واقعنا فلقينا فيها رجالة توكسيك كتير، لكن احنا قررنا نحارب المسلسلات بالمسلسلات ونجمعلك الصفات اللي لازم تدوري عليها في أي راجل تعرفيه، وأهمها:
- بيصون العشرة حتى لو سيبتوا بعض:
سيف - كامل العدد
الأخلاق الحقيقية بتبان وقت الخناق ووقت الانفصال، لأن في الحالتين الشخص بيكون حقيقي من غير ماسكات ولا أي محاولات إنه يجمل موقفه، فلو لاحظتي إن معاملته بتتغير معاكي وقت الخصام، أو حتى بيتكلم بشكل سيئ عن علاقته بالبنات اللي عرفهم قبلك، يبقى لازم تقلقي.
2- في المواقف الصعبة بيعرف يتصرف:
محمد عزت - قلبي ومفتاحه
مش مطلوب طبعًا من الراجل إنه يكون بلطجي أو مقطع بطاقته، كفايه أوي إنه يحسسك بالأمان معاه وتكوني عارفة وواثقة إن لو قابلتكم أي مشكلة هو هيعرف يتصرف، زي عزت كده في مسلسل "قلبي ومفتاحه" أنا وأنتِ وعم عبده البقال عارفين كويس إنه لو دخل في خناقة مع أسعد مليون في المية هيخسر، لكنه مع ذلك لما الخطر قرب من ميار اتصرف وماهموش حاجة.
3- لما بتحتاجيه بتلاقيه:
شرقاوي - منتهي الصلاحية
بيقولوا أي حاجة بتيجي متأخر مش بيكون ليها لازمة، عشان كده الفرصة التانية مش بيكون ليها طعم، فلو شريكك مش مستعد يسيب الدنيا كلها عشان يشوفك عايزة إيه، تفتكري هيفرق معاه انبساطك وزعلك أو أي حاجة تخصك؟
4- يجبلك الدنيا كلها لو يقدر:
مختار - 80 باكو
في مسلسل "80 باكو" بوسي كانت هتتبسط لو تيخا جابلها كشري أو جابلها إسلام كابونجا، فأحلام البنات شاملة كل المستويات والفئات السعرية عادي، فلو شريكك بيقولك الظروف صعبة وأحلامك بعيدة اعرفي إنه بيستسهل ومش مهتم بيكي أصلًا.
5- لما بتختلفوا بيتناقش مش بيتخانق:
مختار - كامل العدد
لغة الحوار مهمة جدًا عشان تعرفي تتعاملي مع أي حد، وأهميتها بتتضرب في ألف لما نكون بنتكلم عن طريقة لغة الحوار مع شريك حياتك، فلو طريقة تعامله معاكي لما بتقولي رأي مختلف إنه بيتقمص أو بيتخانق فأحب أقولك أنتِ داخلة على مرار.
6- بيحترم صاحبه وبيرد غيبته:
ولعة - ولاد الشمس
زي ما مهم إن هو يحترمك، مهم بردو إن صفة الاحترام تكون صفة أساسية فيه مش مجرد صفة بيتصنعها قدامك، فدوري على اللي يكون أصيل زي ولعة ومايقبلش يخون صاحبه أبدًا.
7- بيدعم قرارتك:
حمدي - أشغال شقة جدًا
هما كلمتين لو شايفك كمالة عدد، وتفكيرك ده تحصيل حاصل، يبقى اخلعي فورًا مفيش وقت للتفسير.
8- بيقدر الست وبيقدر مجهودها:
عابدين - إخواتي
الحياة مشاركة، فدوري على اللي شايف مجهودك ومقدره زي ما عابدين كان مقدر أحلام في مسلسل "إخواتي"، أما بقى اللي شايف إن شغل البيت ده كلام فاضي، والستات أصلًا بتدلع، سيبيه متحاوليش تفهميه حاجة هو ربنا يعينه على دماغه.
9- مصدق في اللي بتعمليه:
شريف - كامل العدد
فكري فيها أنتِ لو نجحتي ومليتي الدنيا انجازات، لكن أهم واحد في حياتك طلع مش مقتنع باللي بتعمليه من بابه هتقدري تتبسطي أو تحسي بطعم نجاحك؟ أكيد لأ، يبقى اختاري حد مصدق في كل اللي بتعمليه أنتِ مش قليلة عشان تقبلي بوضع زي ده.
10- بيقف قدام أي حد يجي عليكي:
فارس أبو العزم - وتقابل حبيب
افتكري كويس إن قيمتك من قيمته فلو هو مش مقدر قيمتك يبقى بردو مش مقدر قيمة نفسه، وأنتِ ماتستحقيش كده.
