في يوم الـ Galentine’s Day.. إزاي الستات مالهاش غير بعض؟

إيه أحلى حاجة في الحياة؟ 

شايفينك ياللي بتفكر في الإجابة! الستات والبنات طبعًا هما أحلى حاجة في الحياة، وهي دي محتاجة تفكير أصلًا؟ 

وعلشان الستات دايمًا لبعضيها، فكان لازم يبقى ليهم يوم يحتفلوا فيه كلهم مع بعض، ويعبروا لبعض عن حبهم من غير دوشة الرجالة. النهارده 13 فبراير هو يوم الـ Galentine’s Day، وده يوم كله Pink للبنات وبس، تقدري تخرجي فيه مع صحابك البنات، اللي عارفين عنك حاجات أكتر من نفسك، وتجيبوا لبعض هدايا كمان، ما هما بتوع الڤلانتين مش أحسن منكم في حاجة يعني! 

وبالمناسبة دي، حبينا نقولكم في الليست أكتر الأسباب اللي بتثبت إن البنات مالهاش غير بعض. قوليلنا بقى، ليه فعلًا البنات هما الدعم الحقيقي لبعض؟ وهتجيبي إيه لصاحبتك النهارده؟


حمام الشغل: مركز الدعم النفسي  

لو دخلتي حمام الشغل، هتلاقي بنت بتعيط أو بتحكي أي مشكلة وبنت تانية ماتعرفهاش واقفة بتواسيها وبتسمعها، لأن الستات لبعضيها مهما كانوا أغراب.


إكسك هو إكسنا كلنا

أول ما تبدأي تحكي قدام أي بنت عن الإكس بتاعك، هتلاقيهم كلهم واقفين في صفك مش في صفه حتى لو كانوا مايعرفوكيش، وكأنهم كانوا معاكي في العلاقة من أول يوم، وكأن الإكس بتاعك هو بتاعهم كلهم.


مش لوحدك أبدًا في البروفة

لو بتقيسي لبس في محل ومحتارة ومش معاكي حد، فأي بنت هتعدي جنبك هتقف وتقولك رأيها بكل حماس كأنك أختها أو بنت خالتها، وممكن كمان تديكي اقتراحات أحسن من اللي معاكي أصلًا.


جروبات البنات: جمهورك الوحيد  

في كل جروبات البنات، لو واحدة نزلت صورة ليها هتلاقي التعليقات كلها دعم وقلوب وكلام عن إنها قد إيه حلوة، وهما أصلًا ولا واحدة فيهم تعرف التانية، ويا ويلك لو أنت ولد وعامل أكونت Fake باسم بنت واكتشفوا فجأة.


خروجة البنات: جلسة علاج نفسي مجانية     

الخروجة مع صحابك البنات مش مجرد خروجة، دي جلسة علاج نفسي مجانية، أي قعدة بنات هتلاقيها بتبدأ بضحك غير مبرر، وتوصل لفضفضة واستشارات عاطفية ولا كأننا أسامة منير، وبعدين تنتهي بخطة مستقبلية لحياة كل واحدة فينا، وفي الأغلب مابتتنفذش.


بنلقط أسرع من البلوتوث

عندنا في دماغنا جهاز بلوتوث متحرك، بيلقط في أي وقت أو أي مكان مجرد بس ما نبص لبعض، بنعرف احنا عايزين نعمل إيه أو عايزين نقول إيه.


في كل شلة فيها بنت FBI   

لازم في أي شلة بنات، هتلاقي فيه بنت FBI بتجيبلك كل حاجة عن أي حد في 5 دقايق بس، يعني لو شوفتي حد في الشارع أو المواصلات أو في المترو عجبك، هتلاقيها عرفتلك اسمه بالكامل وهواياته وأكلته المفضلة.


دولابك هو دولابي              

لو عندك مناسبة معينة وحيرانة تلبسي فيها إيه أو ماعندكيش حاجة تلبسيها، وكلمتي صاحبتك وقولتيلها على المناسبة، هتلاقيها بتفتحلك دولابها عادي وبتقولك اختاري.


ماتشي.. ماتشي    

بتعرفوا تتطقموا مع بعض من غير ما تحسوا إنكم شكلكم غريب، ومابيهمكوش نظرات الناس اللي في المكان.