في الشتا بنحب نغير جو ونسافر، بس لازم نسافر في أماكن دافية علشان الجو سقعة وتدفى وتنبسط في نفس الوقت، حمستك تسافر مش كده؟ وطبعًا جه في بالك الأقصر وأسوان، الجو هناك حر مع نسمات هوا خفيفة من النيل ومعابد أثرية تزورها، بس مش بس الأقصر وأسوان اللي تقدر تسافرها في الشتا علشان تنبسط بكل الحاجات دي، مصر كلها جميلة وفي كل حتة فيها أماكن أثرية حلوة تزورها؛ علشان كده في الليست دي جمعنالك أماكن سياحية في أماكن مختلفة من مصر تقدر تزورها في الشتا وتكتشف جمال بلدنا، أو حتى لو مش قادر تسافر فيه منها قريب أو في القاهرة.

معبد دندرة - قنا

اتبنى المعبد لعبادة الإلهة حتحور، إلهة السماء، والرقص والموسيقى، والأمومة عند المصريين القدماء.

أعمدة المعبد مزينة بكتابات هيروغليفية وتماثيل محفورة، والنقوش الموجودة على الجدران الداخلية للمعبد للقياصرة الرومان "أغسطس" و"تبريوس" و"نيرو" وهما بيقدموا القرابين للمعبودات زي قدماء المصريين، وبيضم المعبد 12 سرداب وهما المكان المخصص للاحتفالات بالأعياد في مصر القديمة. الزيارة مفتوحة من الساعة 7 صباحًا لـ 5 مساءً، وسعر التذكرة للطلبة 10 جنيه، أما للكبار 20 جنيه، وبانوراما معبد دندرة 20 جنيه، وسراديب معبد دندرة 50 جنيه.

والمعبد بيتميز إنه لسه محتفظ بألوان رسوماته المبهرة.

قرية الشخلوبة - كفر الشيخ

"عروس البرلس" أو "فينيسيا مصر"، قرية الشخلوبة هي المكان المناسب ليك لو بتحب الهدوء والمناظر الطبيعية والتصوير، القرية موجودة في الساحل الجنوبي لبحيرة البرلس، وموقعها المميز وشواطئها الهادية والمراكب الملونة فيها كانت السبب في جذب المصورين الفوتوغرافيين ليها؛ فكان فيه صورة من قرية الشخلوبة حصلت على جائزة ويكيبيديا لأفضل صورة سنة 2017. والقرية اتسمت بـ "الشخلوبة" بسبب تجمع كميات من أسماك "الشخلوت" اللي بتيجي من البحر المتوسط وبتستقر في المكان.

قرية الشخلوبة فيها جزيرتين وسط بحيرة البرلس، وهما جزيرة جمال حلمي وجزيرة عبد الشافي مهيا، واللي كانوا حلقتين لبيع السمك لكن مع مرور الأيام اتنقلت الحلقتين للقرية والجزيرتين اتحولوا لمزار سياحي لتقضية وقت هادي بين الأشجار والمياه النقية والهواء النقي بعيدًا عن التلوث.

المسرح الروماني - الإسكندرية

المسرح موجود في منطقة كوم الدكة واتبنى في بداية القرن الرابع الميلادي، والأثريين أطلقوا عليه اسم المسرح الروماني لما اكتشفوا الدرجات الرخامية، البعثة البولندية اكتشفوه بالصدفة وهما بيدوروا على مقبرة الإسكندر الأكبر سنة 1960، وفي سنة 2002 اكتشفوا قاعات للدراسة بجوار المدرج، فالمدرج كان بيستخدم كقاعة محاضرة كبيرة للطلاب، وفي الاحتفالات استخدموه كمسرح. المدرج على شكل حدوة الحصان، وبيحتوي على 13 صف من المدرجات المصنوعة من الجرانيت الوردي، وسعر التذكرة للمصريين بـ 10 جنيه وللطلبة 5 بـ جنيه.

دير الأنبا بولا - البحر الأحمر

دير الأنبا بولا هو واحد من أقدم الأديرة في العالم كله، وبناه تلامذة الأنبا انطونيوس في القرن الرابع الميلادي. الدير بيضم 3 كنائس، كنيسة القديس مرقوريوس، وكنيسة الملاك ميخائيل، وكنيسة القديس بولا، وهى مبنية فوق المغارة اللى عاش فيها القديس بولا، والكنائس التلاتة كنائس أثرية، وأقدمهم كنيسة القديس بولا.

دير القديس سمعان الخراز - القاهرة

الدير محفور في جبل المقطم بمنطقة الأباجية في قلب القاهرة الفاطمية، واتسمى الدير نسبة إلى واحد من قديسي الكنيسة القبطية الأرثوذكسية، سمعان الخراز، واتعرف باسم "الدباغ"؛ لأنه امتهن دباغة الجلود وإصلاح الأحذية.

الدير وسط الجبل وفيه رسومات وآيات محفورة في الصخر بأشكال مبهرة وجميلة.

متحف الرمال - الغردقة

متحف الرمال موجود في جنوب الغردقة، وبيضم أكتر من 40 تمثال من المنحوتات بالرمال لشخصيات مهمة من العصر الحديث والقديم وبتمثل أغلب حضارات العالم من ضمنها الحضارات الفرعونية ومجسمات لعجائب الدنيا السبعة ومنطقة للتماثيل الكرتونية فى العصر الحديث زي باتمان وسبايدرمان، و متحف الرمال متحف فريد من نوعه في الشرق الأوسط ومفيش زيه في العالم غير في أمريكا واليابان. سعر تذكرة الدخول للكبار فوق 12 سنة 100 جنيه شاملة التصوير، أما تذكرة الأطفال الأقل من 12 سنة 50 جنيه، والدخول مجاني للأطفال الأقل من 3 سنين.

الدير الأحمر - سوهاج

الدير موجود غرب مدينة سوهاج، وهو من أهم الأديرة اللي اتبنت في العصور المسيحية المبكرة، واستخدموا الطوب الأحمر كمادة أساسية وده السبب اللي اتسمى علشانه بـ "الدير الحمر"، وتم استخدام حجر الجير الأبيض وبعض الأعمدة من الجرانيت الوردي والأسود.

الدير اتعرض للحرق مرتين أثناء حكم الرومان مرة وبفعل البرابرة مرة تانية، وماتبقاش منه غير الكنيسة والحصن الموجود في الجهة الجنوبية من الكنيسة، وفيه بقايا أجزاء معمارية إلى الشمال من الكنسية بيُقال إنها أنها أجزاء من مدينة صناعية.

الزيارة مفتوحة ليه كل أيام الأسبوع من الساعة 9 صباحًا لـ 5 مساءً.

مقابر بني حسن - المنيا

جبانة بني حسن من آثار الدولة الوسطى تحديدًا من عصر الأسرة الـ 11 و 12، وعمرها حوالي 4 آلاف سنة، وعدد المقابر 39 مقبرة، والمؤرخين بيقولوا إن أصحاب المقابر دي كانوا حكام أقاليم مش ملوك، وحكام الأقاليم كانوا بيتجوزوا من العائلة الملكية. والمناظر كلها مرسومة مش منحوتة، وجدران المقبرة تعتبر سجل كامل بيسجل مظاهر الحياة اليومية في مصر بعصر الدولة الوسطى، وبتضم المقابر كمان نقوش بتوضح عمليات صيد الأسماك والحيوانات والطيور والحروب والسفر والرياضات المختلفة زي المصارعة. الزيارة مفتوحة كل أيام الأسبوع من الساعة 8 صباحًا لـ 5 مساءً، وسعر التذكرة للكبار 20 جنيه وللطلبة 10 جنيه.

صان الحجر - الشرقية

اليونانيين سموها "تانيس" أما الفراعنة سموها "جعنت"، مدينة صان الحجر كانت عاصمة مصر السياسية خلال حكم الأسرتين الـ 21 و23، وكانت مدينة كبيرة خلال فترات التاريخ لحد نهاية العصر الروماني، والمدينة غنية بالآثار الفرعونية وآثار من العصر الروماني واليوناني وبتعتبر مدينة صان الحجر "أُقصر الوجه البحري" علشان المعابد الملكية والمسلات والآبار والقصور اللي فيها، وفيها معابد حجرية ضخمة أهمها معبد للإله أمون بتماثيله ومسلاته وآباره، ولحد دلوقتي لوحاته وتماثيله بأحجامها المختلفة موجودة هناك، والمعبد فيه البحيرة المقدسة اللي ليها اهمية كبيرة بعد بحيرة الكرنك بالأقصر. وتعتبر مدينة صان الحجر من أغنى المناطق في مصر في عدد المسلات، علشان فيها 20 مسلة وكلها منقوشة بأسماء وألقاب رمسيس التاني وانتصاراته، منها المسلة اللي تم نقلها لميدان التحرير بالقاهرة. ده غير التماثيل الضخمة للملك رمسيس.

مسجد عمرو بن العاص - دمياط

مسجد عمرو بن العاص في دمياط هو تاني مسجد اتبنى في مصر ، بناه المسلمين بعد فتح المدينة سنة 21 هـ على نفس طراز جامع عمرو بن العاص في الفسطاط بمصر القديمة؛ علشان كده هو معروف برضه باسم "مسجد الفتح" نسبة إلى الفتح العربي.

يعتبر المسجد من أكبر مساجد دمياط، تبلغ مساحته حوالي فدانين، والمسجد اتحول لكنيسة أكتر من مرة ومن كنيسة لمسجد برضه كتير؛ ففي حملة جان دى برين على مدينة دمياط سنة 1219، الفرنجة قعدوا في الجامع ليلة سيطرتهم على المدينة، وحولوا الجامع إلى كنيسة واستولوا على منبره، ولما خرج الصليبيين من دمياط سنة 1221 اتحول لمسجد، أما أثناء حملة لويس التاسع سنة 1249 على دمياط، حول المجامع إلى كاتدرائية، وكرسها لمريم العذراء، وأقام فيها حفلات دينية كبيرة كان بيحضرها نائب البابا، وبعد هزيمة لويس التاسع وخروج الصليبيين من دمياط رجع المسجد مرة تانية.

شجرة مريم - المطرية

شجرة مريم موجودة في المطرية بالقرب من مسلة سنوسرت وعمرها حوالي 3 آلاف سنة، بعد هروب العائلة المقدسة من ملك اليهود الروماني هيرودس، استخبوا تحت الشجرة دي وغطتهم بأغصانها، والمقريزي المؤرخ الإسلامي، قال إن العائلة المقدسة استراحت بجوار عين ماء ناحية المطرية، وغسلت فيها السيدة مريم لبس السيد المسيح، وصبت المياه على الأرض المحيطة بالبئر، فالأرض انبتت نبات البلسان اللي مش موجود غير هناك، وسنة 1656 سقطت الشجرة فمجموعة من الكهنة أخدوا فرع من فروع الشجرة وزرعوها في الكنيسة المجاورة لمنطقة الشجرة وهي "كنيسة الشجرة مريم" وكبرت الشجرة، ومن فترة قريبة تم زرع فرع الشجرة دي بجنب الشجرة الأصلية ودلوقتي هي بتطلع ثمرة الجميز.

ميت رهينة - الجيزة

اتعرفت زمان بمدينة "منف" وبيرجع تاريخها لعصر أوائل الأسر في الحضارة الفرعونية، أسسها الملك مينا موحد القطرين سنة 3200 قبل الميلاد وكانت عاصمة الشمال، وهي موجودة في منطقة البدرشين بمحافظة الجيزة، وهي متحف مفتوح بيضم آثار نادرة من عصور فرعونية مختلفة، وأشهر محتوياته هو تمثال ضخم للملك رمسيس التاني بطول 10 متر، وأغلب الآثار الموجودة في المتحف بتنتمي لرمسيس التاني، وبيضم تيجان الأعمدة اللي اتشهر استخدامها في المعابد المصرية، وكمان بيضم تمثال لقزم من الحجر الجيرى بيمثل الإله بس المسؤول عن حماية المرأة عند الولادة.

وادي الحيتان - الفيوم

من أشهر المحميات الطبيعية الموجودة في محافظة الفيوم، وفيها 10 هياكل كاملة لحيتان من 4 ملايين سنة كانت بتعيش في المنطقة علشان كانت جزء من محيط كبير بيشمل شمال أفريقيا، بحسب تقرير لهيئة الاستعلامات، ومنطقة وادي الحيتان اتصنفت كمنطقة تراث عالمي سنة 2005، واليونسكو اختارتها كأفضل مناطق التراث العالمي للهياكل العظمية للحيتان.

متحف بورسعيد الحربي - بورسعيد

اتبنى المتحف سنة 1964 علشان يخلد ذكرى العدوان الثلاثي على مدينة بورسعيد سنة 1956، وتم افتتاحه في ذكرى احتفالات بورسعيد بالعيد القومي يوم 23 ديسمبر 1964، بهدف توثيق ذكرى العدوان الثلاثى على مدينة بورسعيد من خلال عرض مجموعة متنوعة من الأسلحة والمعدات العسكرية اللي تم استخدامها أو الإستيلاء عليها وحرب أكتوبر 1973، وبينقسم العرض المتحفي لـ 3 أقسام: ساحة العرض المكشوف وقاعات العرض الدائم وقاعة العرض المؤقت.

ألعاب مصرية تسلي بيها وقتك مع أصحابك

وزارة التخطيط: إنشاء أكبر محطة طاقة رياح في أفريقيا بمنطقة خليج السويس

إطلاق تطبيق Booktime المخصص للأطفال من مؤسسة "هنداوي"

"كايرو رانرز" هينظموا ماراثون القاهرة يوم 14 فبراير بحديقة الميريلاند

أصل وفصل لقب القاهرة: ليه بنقول عليها "مدينة الألف مئذنة"؟

افتتاح كلية للذكاء الاصطناعي بجامعة الأزهر في السنة الدراسية الجديدة

مجلس الوزراء وافق على إنشاء فروع لجامعة القاهرة خارج مصر قريبًا

دار الإفتاء أصدرت مليون و422 ألف فتوى خلال سنة 2024