مؤسسة مصرف أبوظبي الإسلامي الخيرية بتتبنى 4 سيدات مُعيلات

رمضان شهر الكرم والخير، ومع قرب نهاية الشهر، مؤسسة مصرف أبوظبي الإسلامي الخيرية، أعلنت عن تبنيها لـ 4 حالات إنسانية لسيدات مصريات مُعيلات، تقديرًا لدورهم في المجتمع، وإيمانًا منهم بأهمية دعم المرأة اللي بتواجه تحديات صعبة في حياتها.

مؤسسة مصرف أبوظبي الإسلامي - مصر الخيرية، هتتبنى دعم الحالات الـ 4 بعد ما ظهروا في برنامج "مذيع الشارع"، للإعلامي أحمد رفعت، كجزء من التعاون مع حملة "أنتِ أصل الحكاية". تعاون البرنامج مع الحملة ساهم في تسليط الضوء على سيدات بيواجهوا تحديات كبيرة، وظروف معيشية صعبة، ده غير إن المصرف تعاون مع "مؤسسة بهية"، في إطار توسّع الحملة علشان تشمل دعم محاربات السرطان.

ومصرف أبوظبي الإسلامي – مصر، أكد إن مؤسسته الخيرية هتلتزم بتقديم دعم مالي شهري ومساعدات طبية للسيدات الأربعة، كاستكمال لنجاح حملة "أنتِ أصل الحكاية"، اللي أطلقها خلال شهر رمضان، واللي هدفها دعم السيدات الأكثر احتياجًا، من خلال عدد من الأنشطة التفاعلية والمبادرات الخيرية.

وقائمة الحالات الإنسانية ضمت سيدات زي دولت شاكر، اللي بتشتغل في محطة وقود لإعالة زوجها المريض، لأن مافيش أي مصدر دخل تاني للأسرة، بالإضافة إنها بتتلقى علاج لسرطان الثدي في مستشفى بهية. والسيدة "سعدية" (أم محمد)، اللي بتشتغل في محل خضار مقابل 100 جنيه يوميًا لإعالة زوجها القعيد، اللي بيتم إنفاق معاشه الشهري على علاجه، بدون وجود مصدر لدفع إيجار مسكنهم. والحاجة هدى، وهي أم لـ 6 أولاد، وبتشتغل في جمع مخلفات القمامة رغم سنها الكبير، لأن ماعندهاش زوج أو عائل. والحاجة وفاء اللي جوزها اتصاب بإعاقة نتيجة حادثة، ومبقاش قادر على الشغل.