حوار مع ياسمين القاضي مصممة أزياء فيلم “الست”

 سيرة “الست” أم كلثوم قلبت الدنيا من فترة ولحد دلوقتي هي حديث الناس بسبب فيلم "الست" إخراج مروان حامد وبطولة منى زكي، الناس انقسمت ما بين مؤيدين ومعارضين للفيلم، فيه اللي حبه واتعلق بيه وفي اللي محبش تجسيد منى زكي لـ أم كلثوم وشاف إنها مش مناسبة. 

بس الحاجة اللي كل الناس اجتمعوا عليها هي إن أزياء الفيلم كانت من أهم العناصر اللي حصلت فيه وإنها خلتنا نحس بـ روح أم كلثوم حوالينا في كل مشهد في الفيلم، علشان كدة عملنا حوار مع ياسمين القاضي مصممة أزياء فيلم “الست”. 

ياسمين حكتلنا من البداية لما المخرج مروان حامد عرض عليها المشروع، وقالت "اتخضيت جدًا لما مروان حامد قالي إني هشتغل على أزياء فيلم الست.. حسيت إنه "أنا هشتغل على لبس أم كلثوم!".. كلنا بنحبها ومتربيين عليها لكن متخيلتش إني ممكن أعمل ده."

وكملت ياسمين كلامها عن المشروع: "قلقت وحسيت بمسؤولية كبيرة تجاه المشروع ده، اللبس اللي هعمله مش هيتقيم بـ "حلو" أو "وحش"، هيتقيم بـ "صح" و"غلط" لأن إحنا بنجسد حقايق وواقع".

كمان قالت إنها اعتذرت عن أعمال كتير اتعرضت عليها وقت شغلها على فيلم الست، وقالت إنها ماكنتش شايفة قدامها غير أم كلثوم وحست إنها مش عايزة تطلع من أجوائها.

وعن التحضيرات لفيلم الست، قالت إنهم قعدوا على تحضيراته سنة ونص، وكانوا طول الوقت مشغلين أغاني أم كلثوم في البروفات وعايشين في أجوائها.

وقالت ياسمين: "روحت معرض أم كلثوم وكنت بدور وبقرأ عن كل مراحلها العمرية وبشوف لقائتها وحفلاتها، فستان حفلتها في "مسرح الأوليمبيا" بالذات أخد مننا مجهود علشان نوصل لـ درجة اللون والخامة"

ووصفت ياسمين لبس أم كلثوم بإنه كان لبس محتشم وكانت بتميل للألوان الغامقة زي الرمادي والزيتي، كانت بتلبس لبس بسيط جدًا في حياتها اليومية وعمرها ما لبست موديلات غريبة.

وعن شغلها مع منى زكي، ياسمين القاضي قالتلنا: "منى زكي أكتر ممثلة مجتهدة وصبورة أنا شوفتها، كانت بتعمل ماكياج أم كلثوم كل يوم تصوير لمدة ٦ ساعات ومش بتاكل أو بتشرب وموافقة وصابرة".

وختمت ياسمين القاضي كلامها، وقالت: "أي تعليقات اتقالت على فيلم الست قبل عرضه مأثرتش علينا لأننا واثقين من اللي عملناه، وبعد عرضه استقبلنا رودود فعل عدّت توقعاتنا".