إعادة تقديم "البروكة" لسيد درويش يوم ٢٢ و٢٣ مايو في مكتبة الإسكندرية

مكتبة الإسكندرية أعلنت في مؤتمر صحفي عن إعادة تقديم أوبريت "البروكة" لسيد درويش يوم 22 و23 مايو، في مركز المؤتمرات، بالقاعة الكبرى من المكتبة، وده بعد ما قدمه فنان الشعب، سيد درويش لأول مرة سنة 1921. 

ودلوقتي تقدر تحجز التذاكر من شباك تذاكر مكتبة الإسكندرية أو من الموقع الإلكتروني الخاص بالمكتبة.

والموسيقار راجح داوود، المشرف على مركز الفنون بمكتبة الإسكندرية، قال إن العمل هيتقدم برؤية حديثة، مع التركيز على الدراما الموسيقية، وبلهجة سكندرية، بالاستناد على نسخة الأوبريت الأصلية اللي اتقدمت في أوائل القرن الماضي.

وقال إن العرض ده متقدمش بشكل كامل في محافظة الإسكندرية قبل كده، والأوبريت ده بيمثل إحياء للتراث الموسيقى المنسي لسيد درويش.

والدكتور محمد عبد القادر، صاحب الرؤية الفنية للعمل، قال إن الأوبريت ده جزء من مشروع فني لإحياء التراث الغنائي المصري، خصوصًا للأعمال اللي فُقدت تسجيلاتها الأصلية، وعشان كده العرض هيتقدم بتوزيع أوركسترالي جديد لتعويض المدونات الموسيقية المفقودة، مع الحفاظ على الطابع الأصلي للعرض.

الجدير بالذكر إن أوبريت "البروكة" واحدة من أشهر المسرحيات الغنائية الكوميدية لفنان الشعب سيد درويش، وهي مأخوذة عن أوبريت "لا مسكوت" للموسيقي الفرنسي أدموند أودران، وقام بتعريب النص محمود مراد ويوسف حلمي، وأعاد كتابة النص محمد عبد القادر.