الغواصة المصرية رنالينا عالم حصلت على ميداليتين برونزيتين بكأس العالم

رنالينا حصلت على ميداليتين برونزيتين، وكمان سجّلت رقمين قياسيين مصريين جديدين:

- 71 متر في فئة الوزن الثابت باستخدام الزعنفة الواحدة (Monofin)

- 67 متر في فئة الوزن الثابت باستخدام الزعانف الثنائية (Bifins).

بالأرقام دي، تعتبر أعمق غواصة عربية، وتالت أعمق غواصة في إفريقيا. 

"رنالينا" بتتدرب مع المدرب بوريس سباييتش، وبتشتغل كمان مع مدرب معادلة الضغط سيف أسامة، اللي حقق هو كمان إنجاز في نفس البطولة بعد ما غطس 80 متر في فئة الـ Free Immersion، وبقى تاني أعمق غواص مصري في الفئة دي.

وبجانب البطولات، رنا شغالة كـ مدرّبة رئيسية، وبتقدّم ورش تدريب عن الغوص الحر، تركّز فيها على التوازن النفسي، والوعي بالجسم، والاتصال بالبحر كجزء من أسلوب الحياة الصحي.

شاركت في حوالي 10 بطولات منهم 4 بطولات عالمية، وكسبت كذا ميدالية وكسرت أكتر من 16 رقم مصري في دول زي إيطاليا، اليونان، تركيا، وقبرص.

سنة 2025 كانت سنة قوية جدًا ليها، لأنها حققت 4 أرقام قياسية جديدة باسم مصر:
-71 متر في المونوفين (CWT).

-67 متر في الزعانف الثنائية (CWTB).

- 60 متر في الـFIM.

- 50 متر في الغطس بدون زعانف (CNF).

وفي بطولة العالم في ميتيكاس – اليونان، مثّلت مصر وجابت المركز الـ13 عالميًا والمركز السادس في تخصصها الأساسي.

وفي كأس العالم بشرم الشيخ، رغم إنها شاركت يومين بس، قدرت تحقق ميداليتين برونزيتين وتضيف إنجاز جديد لمصر.

بعيد عن المنافسات، رنالينا مدرّبة معتمدة، وبتنظم ورش تدريب في مصر وبرّه، تركّز فيها على التحكم في النفس، وتنظيم الجهاز العصبي، والهدوء الذهني أثناء الغطس.

من أشهر الورش اللي بتقدّمها "Fins Off Experience" اللي بتركّز على الغطس من غير زعانف.
رنالينا بتدرّب في القاهرة، دهب، السعودية، بيروت، وأماكن في أوروبا، وبتشتغل مع غواصين من كل المستويات — من المبتدئين للمحترفين.

رنالينا بتقول إن الغوص الحر بالنسبالها مش بس رياضة، لكنه طريقة للتعرف على النفس والهدوء والتعامل مع الضغط، وده اللي بتحاول توصله لكل اللي بيتدربوا معاها.