تعرف إيه عن مسرحية "داليدا.. الأغنية التي لا تنتهي"؟

"أنا كبرت بأغاني داليدا، كانت دايمًا موجودة في بيتنا، وفي أي حفلة بقدمها لازم يكون في داليدا." دي كانت أول حاجة قالتها الميزوسوبرانو فرح الديباني في المؤتمر الصحفي لمسرحية "داليدا.. الأغنية التي لا تنتهي" أول مسرحية غنائية مصرية فرنسية عن حياة داليدا، بطولة فرح الديباني وإخراج خيري بشارة.

بالنسبة للميزوسوبرانو فرح الديباني، تجسيد داليدا مش مجرد بطولة مسرحية، لكنه حلم الطفولة اللي فضل معاها سنين، وحلم كان والدها دايمًا يشجعها عليه ويقولها: "لما تكبري لازم تعملي حاجة لداليدا."

المسرحية، اللي بيخرجها خيري بشارة وكتبها وليد خيري، هتتناول رحلة بنت شبرا اللي خرجت من مصر ووصل صوتها للعالم، لكن من زاوية مختلفة. مش مجرد حكاية نجمة حققت نجاح عالمي وخلاص، لكن محاولة لفهم الإنسانة اللي كانت ورا الأضواء.

والمسرحية هنشوف فيها استعراضات، وتوزيع جديد لأغاني داليدا من آلحان الموسيقار الفرنسي أندريه مانوكيان، وكمان هيكون في مزج للذكاء الاصطناعي في العرض، وده عن طريق شاشات بتكمل العرض المسرحي وبتعرض طفولة داليدا.

وليد خيري قال إن التحدي الحقيقي في كتابة العمل مكانش إعادة سرد حياة داليدا، لأن الناس كلها عارفة قصتها، لكن كان في البحث عن "همها الأساسي".

"كل الناس عارفة داليدا، فأحنا بندور على الحاجة اللي الناس اللي مش عارفاها، السؤال اللي داليدا شخصيًا ممكن ماتكونش عارفاه أو مش عارفه تجاوبه".

وليد خيري، مؤلف المسرحية

أما خيري بشارة، فبيقول إن علاقته بداليدا بدأت قبل المسرحية بسنين طويلة. وده خلاه يحس بقرب خاص من شخصيتها.

"انا عشت ٤٠ سنة من عمري في شبرا، وفكرة أن داليدا من شبرا دي حاجة بتصاحبني وانا بكبر، سر داليدا مش في نجوميتها بس، لكن في التناقض اللي عاشته، انا عايز الجمهور يخرج مبتسم ودموعه في عينه".

خيري بشارة، مخرج المسرحية

اختيار فرح الديباني للدور مكانش صدفة. خيري بشارة قالنا إنه كان عارف إن المشروع ده حلم بالنسبة لفرح، وإن وجود نص قوي هو اللي خلاه يتحمس لتحويل الحلم ده لعرض مسرحي، خصوصًا أنه يعرف فرح من زمان بحكم أنها صديقة مقربة لبنته.

ومن وجهة نظر السفير الفرنسي في مصر، إريك شوفالييه، فالمسرحية مش مجرد عمل فني، لكنها امتداد للروابط الثقافية بين البلدين، خصوصًا إن فرح الديباني وداليدا الاتنين اتولدوا في مصر، ووصلوا للعالم، وفي نفس الوقت احتفظوا بعلاقتهم ببلدهم الأم.

"داليدا.. الأغنية التي لا تنتهي" هي مشروع ثقافي هيبدأ أول عروضه يوم 31 أكتوبر في الإسكندرية ضمن ختام فعاليات موسم البحر الأحمر، اللي بدأ السنة اللي فاتت في مارسيليا للاحتفاء بثقافات البحر المتوسط. وبعدها، هيسافر لفرنسا السنة الجاية، بالتزامن مع مرور 40 سنة على رحيل داليدا.

خليك متابعنا عشان تعرف كل الجديد عن مسرحية "داليدا.. الأغنية التي لا تنتهي" وقولنا متحمس تشوف التجربة دي؟