مؤثرين 2024: مصريين عملوا فرق خلال السنة دي

"أثر الفراشة لا يُرى، أثر الفراشة لا يزول"..
عمرك سمعت عن نظرية "أثر الفراشة" الحكاية باختصار إن ممكن حركة جناح فراشة صغيرة تتسبب في إعصار وتغير شكل الكون لسنين قدام.

وده كان هدفنا واحنا بنحضر قائمة "مؤثرين 2024"، معانا ناس كتير عملوا تأثير، أحيانًا تأثيرهم وصل لتغيير الأفكار، أو قدروا ياخدوا خطوة جريئة محدش خدها قبلهم وشجعت غيرهم، أو حتى عملوا عمل فني حلو، أو منتج محلي حسسنا إننا كمصريين لسه قادرين نصنع المستحيل.

التأثير دايمًا نسبي.. عمره ما كان بس بالخطوات الكبيرة، لأن زي ما بيقولوا نقطة مية واحدة قادرة بعد سنين تفتت الصخر، فمتدورش على ناس غيروا الكون، لكن دور على ناس ممكن يبقوا سبب إن فيه أجيال تانية تيجي تغير الكون.

في قائمتنا هتلاقي ناس عارفها، وناس تانية أول مرة تسمع عنهم، بس لو فكرت ودورت هتلاقيهم فادوا غيرك وأثروا فيهم وشجعوهم يعيشوا حياة تستحق إنها تتعاش. عشان متكونش السنين الجاية أيام بتعدي وخلاص لكن يكون دايمًا لينا تأثير فيها.

دي قائمة مؤثرين 2024 من الفصلة وكايروسيين.

أحمد طارق: من نجوم شارك تانك

بشكل واضح وصريح، قرر أحمد طارق إنه قدامه 7 سنين شغل كمان وبعدها هيعتزل البيزنس وهيتقاعد بشكل اختياري، وحط لنفسه خطة في الـ 7 سنين دول عشان يقدر يعمل أكبر قدر ممكن من التأثير الإيجابي، ومشاركته في برنامج "شارك تانك" كانت خطوة من الخطوات اللي ساعدته يقدم فرصة لناس كتير ويكون مؤثر في مسيرتهم المهنية.

أحمد طارق هو رجل أعمال من اللي بيتقال عليهم جملة "بدأ من الصفر". خريج هندسة اللي سعى واشتغل وسافر وعمل مسيرة مهنية ناجحة في مجال البيزنس، وقرر بعدها يرجع يشتغل في مصر، لأنه مؤمن بالناس هنا وبقدراتهم، ويسعى للاستثمار في مجالات التعليم والرعاية الصحية لأنه شايف إن ده هيشكل فرق. بيقولنا "طارق" إنه مكانش بيحب يكون قدام الكاميرا كتير، لكنه حس إنه وجوده في دايرة الأضواء والشهرة هيساعده أكتر في التأثير اللي بيحاول يعمله، وقدر فعلًا من خلال استثماراته المختلفة ومن خلال وجوده في "شارك تانك" إنه يساعد ناس كتير، ويكون هو وباقي نجوم البرنامج ظاهرة بتدي أمل لرواد أعمال كتير.

طه دسوقي: الممثل الرئيسي في مسلسل "حالة خاصة" 

إزاي الفن ممكن يغير القوانين؟ أو بلاش يغير القوانين.. يغير الأفكار والقوانين هتتغير بعد كده واحدة واحدة. إزاي الفن يكون وسيلة لتغيير حياة الناس؟ ده اللي عمله مسلسل "حالة خاصة" بطولة طه دسوقي.

لأول مرة في مسلسل عربي شفنا البطل شخص بيعان من طيف توحد، والمسلسل بيدور عن حياته بشكل طبيعي جدًا مش من خلال التعاطف لكن من خلال حياته اليومية ودراسته وشغله والأغاني اللي بيسمعها.

اتعودنا دايمًا نشوف طه دسوقي في الأدوار الكوميدي ويضحكنا ويبسطنا بس المرة دي شفناه في دور جد وصعب وفيه تفاصيل كتير، قدم دور "نديم" اللي بيعاني من اضطراب طيف التوحد، وبسببه فيه كتير أشخاص عندهم توحد حسوا لأول مرة إنهم متقدرين ومفهومين وشافوا نفسهم على الشاشة، وفيه أهالي حست إن فيه حد فاهم حياتها، مقدر تعبها، وبيكرمها وبيحب أولادها.. وفيه ناس قالوا إنهم فهموا لأول مرة يعني إيه "طيف توحد"، وإن الاختلاف مش معناه حاجة وحشة، بل بالعكس هو مختلف لكنه يمكن يكون أحسن منك..

عشان التأثير في حياة الناس اللي ماكنش هين خالص، كان لازم طه دسوقي يكون واحد من مؤثرين 2024.

حاتم ستين: طبيب بيطري

شئ طبيعي إنك تلاقي فنان مشهور والناس عارفاه، بس لما تقابل طبيب بيطري مشهور.. لازم تدور بيعمل إيه؟ وليه الناس بتحبه وبتهتم بشغله؟
حاتم ستين، طبيب الخيل، اللي عنده أكتر من 15 مليون متابع في مختلف مواقع السوشيال ميديا.. قدر من خلال شغله ومساعدته للأحصنة في كل مكان، إنه يخلي الناس تهتم زيه بالحيوانات وحياتهم وتتفرج على فيديوهاته اللي مليانة رحمة وخير وتتعاطف مع كل كائن حي.

رحلة طويلة بدأت من المنصورة، كان بيحلم "حاتم" دايمًا إنه يلعب مع الحصان ويقرب منه لأنه أكتر كائن بيحبه… ودلوقتي هو واحد من أشهر الأطباء البيطرين في العالم، اللي بيعالج ويساعد الأحصنة.

مش مهم الحصان ده بملايين الدولارات وبيشارك في سباقات عالمية، أو حصان عربية كارو غلبان صاحبه ضربه لحد ما وقع في الشارع ورماه في الزبالة، كلهم بالنسبة لحاتم حالات تستحق التعاطف والعلاج.

ودلوقتي بيسعى حاتم ستين لتدريب جيل جديد من الأطباء البيطرين ينقل ليهم علمه وخبرته.

نادية فكري: بطلة بارالمبية

في سبتمبر 2024، وتحديدًا في ملاعب البارالمبياد في باريس، سمعنا زغروطة مصرية طالعة من القلب… دي كانت لحظة تتويج البطلة المصرية نادية فكري ببرونزية رفع الأثقال.
في لحظة، المصريين كلهم بقوا يتكلموا عن الست المصرية الجدعة اللي رجعت أرض الملاعب عشان تتوج بميدالية وهي في سن الخمسين وتقول مفيش مستحيل!
نادية فكري، ست مصرية، ملامحها شقيانة وشايلة تعب سنين، بس كمان شايلة تحدي وإرادة تهد جبال، بعد غياب 16 سنة عن الميداليات البارالمبية قدرت تجيب ميداليتها التالتة. قصتها موقفتش هنا لكن كملت لما عرفنا إن جوزها "صلاح" هو كمان بطل بارالمبي اختار يقعد مع أولادهم ويهتم بيهم عشان مراته حبيبته تسافر وتجيب ميدالية.. عشان الفرحة لواحد في البيت هي فرحة للكل، ونجاح فرد هو نجاح الأسرة كلها.
قصة كفاح وحب أثرت فينا في 2024 وحركت مشاعرنا وشجعتنا نكون أقوى ولما سألنا "نادية" نفسك في إيه في 2025؟ قالت إن نفسها هي و"صلاح" يفضلوا يحبوا بعض ويعيشوا في سعادة هما وأولادهم.

ندى رياض وأيمن الأمير: صناع فيلم "رفعت عيني للسما" 

في شهر مايو 2024، جتلنا مكالمة تعالوا اتفرجوا على العرض الخاص لفيلم "رفعت عيني للسما" اللي بينافس في مهرجان كان، وفي قاعة السينما اتفاجئنا ببنات بانوراما بارشا أبطال الفيلم، بنات من المنيا في صعيد مصر بيعملوا مسرح شارع، وبيحكوا عن قضايا مهمة زي الجواز المبكر والختان ومشاكلهم الشخصية. كنا بنفكر إيه مدى صعوبة إنك تعمل فيلم وثائقي في الصعيد، وتعيش مع ناس حياتهم لمدة سنين، من غير ما يخافوا منك ومن الكاميرا.. ده اللي عمله صناع الفيلم ومخرجينه ندى رياض وأيمن الأمير.

4 سنين في المنيا عرفوا أهالي البنات، حفظوا تفاصيل حياتهم، دخلوا بيوتهم وعاشوا معاهم أفراحهم وأحزانهم وقدروا ينقلوها لينا على شاشة السينما بسلاسة وإبداع. "أيمن" و"ندى" من خلال فيلمهم "رفعت عيني للسما" أكدولنا إنه ينفع نحكي حكايات حقيقية من صعيد مصر، حكايات شبههنا ومننا وتنجح وتوصل للعالمية، وأثبتوا ده لما كسب الفيلم جائزة العين الذهبية بمهرجان كان، عشان يكون أول فيلم مصري يكسب الجائزة دي.

أمل وسعادة ضافوه أيمن وندى لصناع الأفلام المصريين اللي لسه بيحلموا شغلهم يتشاف، وبيعانوا كل يوم مع قلة الإمكانيات وصعوبة الإنتاج. وحلم اتحقق لبنات بانوراما برشا اللي مشيوا على الريد كاربت في كان وبقى العالم كله عارفهم وبيتابعهم وبيحبهم لما شافهم بعيون ندى رياض وأيمن الأمير، اللي كان لازم يكونوا من مؤثرين 2024.

Risky Boys (كريم علاء الدين، أحمد عاطف، محمد طارق): فنانين موضة

تخيلت قبل كده إنك تشوف عروض أزياء في حواري وشوارع أو في أماكن زي سوق الجمعة والمدبح؟ بيقولوا إن الحاجة الحقيقية بتوصل للناس، ويمكن يكون "ريسكي بويز" دليل واضح على كده!

في أول 2024، شباب مصريين غاويين موضة وصناعة محتوى، ومعروفين باسم "The Risky Boys"، قدموا أول عرض أزياء ليهم بعنوان "Catwalk in Cairo". العرض نجح لأنه عفوي وخارج من وسط شوارع القاهرة اللي تشبهنا.

اللي بيعملوه كان غريب على الناس ومش مألوف. يعني إيه موضة وعروض أزياء خارجة من تحت الأرض ومن مناطق شعبية ممكن تكون الموضة هي آخر اهتماماتهم؟ لكن اللي حصل إن تجاوب الناس معاهم كان كل يوم بيزيد!

ريسكي بويز بيخلوك تعيد تفكير في كل حاجة تعرفها أو اتعلمتها، وبيفتحوا سكك جديدة لموضة الشارع، وبكل ثقة بيحولوا كل حارة أو محل أو ورشة لمسرح ليهم، والنجاح وملايين المشاهدات اللي حققوها على السوشيال ميديا، ساعدتهم يتعاونوا مع مجموعة من أشهر العلامات التجارية في العالم، زي مارفل وScotch & Soda في أمستردام.

كريم سمير: من شركاء V7

‎مشروب مصري الناس تحبه وتفضله على مشروبات موجودة في السوق من سنين. هنعملها ازاي؟ ده الاختبار اللي نجحت فيه شركة "بينفيت" المصرية لما أطلقت V COLA في 2024، وبعدها على طول لحقتها بـ V COLA DIET.

‎كريم سمير، واحد من الشركاء في "بينفيت"، عنده أسباب يكون فخور بسببها في 2024، مش بس بسبب نجاحه في تصدير منتجاته لـ 22 دولة، لكن كمان لأن منتجات V7، زي ما كريم بيقولنا، مشروبات بطعم طبيعي 100% وفيها فيتامينات وقيمة غذائية.

‎ورغم النجاح اللي حصل، كريم شايف إنه مش لازم تكون مستعجل، وده مش معناه قلة طموح، خصوصًا إن V7 بتخطط إنها تكون منتج عالمي خارج من مصر، لكن معناه إن كل خطوة مدروسة.

‎من وقت نجاح V7 بيتحط كريم دايمًا في موقف إنه يكون في مكان ويلاقي الناس بتطلب المنتج بتاعه، وبيقولنا عن اللحظات دي إنها إحساس مايتوصفش.
‎لو جينا نتكلم عن 2024 فقصة V7 واحدة من الحاجات اللي أثرت فينا.

أحمد فايز: مهندس ديكور ومصمم إنتاج مناظر

أنا عارف وأنت عارف إن بيتقال إن الدراما السورية متفوقة في الجزء الخاص بالمسلسلات التاريخية. سبب من أسباب التفوق ده بتكون الديكورات وتصميم الأماكن اللي بتعيشك في قلب حكاية حصلت من مئات السنين ويمكن أكتر.

لكن في 2024 شوفنا مسلسل "الحشاشين" كعمل مصري تاريخي متنفذ بإتقان شديد ومبهر بصريًا. واحدة من أكتر الحاجات المبهرة في العمل ده كانت قلعة الصباح"، اللي بناها مهندس الديكور وإنتاج المناظر أحمد فايز.

"الحشاشين" ماكانش مجرد شغلانة، لأن "فايز" قدر من خلال كل تفاصيل الديكور اللي بناه والألوان اللي استخدمها إنه يحسسنا بشكل بفترة تاريخية سمعنا عنها ومالهاش أي مراجع مصورة موثوق فيها. ومن كتر مالعالم اللي بناه كان واقعي، ناس كتير افتكرت إن المسلسل اتصور في قلعة موجودة فعلًا، وناس قالت إن دي خدع بصرية وجرافيك. لكن "فايز" قدر بشغله يحكي بصريًا حكاية حسن الصباح، ويخلي الناس تصدقها وتعيش جواها.

بيقولنا "فايز" إن الحشاشين بالنسباله مجرد خطوة وسِلمة لحاجات تانية أكبر جاية، وإنه بيحلم ياخد الأوسكار بس من غير ما يحتاج يروح هوليوود، لأنه شايف إننا نقدر نعمل من هنا أعمال توصل للعالمية.

دينا غبور: من نجوم شارك تانك

النجاح كلمة بمعاني متفاوتة. هل هو إنك تكون شاطر في شغلك؟ معاك فلوس؟ نجم والناس بتشاور عليك؟ لو كتبت "نجاح" وطلبت من كل شخص يكتب تحتها تعريف من وجهة نظره هتوصل لمئات التعريفات. واحدة منهم هي "التأثير"، إنك تعمل تأثير إيجابي في حياة الناس، ولو اتكلمنا عن 2024، فنقدر نقول إن دينا غبور كانت صاحبة تأثير!

بعد مشاركتها في "شارك تانك"، و "The W Podcast"، اتحولت دينا من سيدة أعمال اسمها واسم عيلتها مشهور في عالم البيزنس، لنجمة الناس بتشاور عليها. حاجة أكيد تبسط، بس إحساس دينا تجاه ده كان "المسؤولية" لأن الناس بقت مستنية منها أكتر بكتير. من خلال "شارك تانك" ساهمت دينا في تقديم فرص لكتير المشاريع اللي فعلًا تستاهل فرصة، وشجعت شباب أكتر على إطلاق مشاريعهم حتى ولو بإمكانيات محدودة.

لكن "شارك تانك" مكانش هو الطريقة الوحيدة اللي بتقدر دينا من خلالها تعمل تأثير إيجابي، لأن شغلها في "مؤسسة غبور للتنمية" بيساعدها كل سنة إنها تخرج مئات الشباب المتعلمين، تعليم فني في مدارس المؤسسة، على أعلى مستوى، ومؤهلين للشغل في مصر أو أي مكان في العالم.

بتقولنا دينا إنها مؤمنة إن الدول بتقوم بإيد الصنايعية، و"مؤسسة غبور للتنمية" ساهمت في تحسين الصورة السلبية للتعليم الفني وغيرت حياة طلبة كتير.

ميريت علي: رائدة أعمال

من عشر سنين، ظهر "ذا ليمون تري" على النيل. كان ظهور هادي وسط مشهد المطاعم اللي بيكبر في مصر. المكان احتفظ بخصوصيته، محاولش يكون تريند، فضل بسيط وشيك وعمل جمهور خاص، لدرجة إن ناس افتكرت إن ده فرع في مصر لمطعم أجنبي. ميريت علي مؤسسة المكان، بتقولنا: "الكل كان فاكر إننا مستوردين براند عالمي، مع إننا قعدنا شهور بنبني الفكرة وركزنا في كل تفصيلة."

بعد كده اكتشفنا إن "ذا ليمون تري" مجرد بداية، وإن "ميريت" عندها رؤية أكبر لنفسها ولشركتها "تي إل تي كونسبتس"، اللي كبرت وبقى عندهم مطاعم تانية ومحلات زي "فيلا كوكو نت" و"ذا أوريجنز" و"كان ليمون"، وأماكن إقامة فندقية مميزة في مصر.

في 2024، أخدت ميريت خطوة جريئة لما راحت بـ "ذا ليمون تري" لأثينا اليونانية. كانت مخاطرة أكيد لكنها مخاطرة احتاجت سنة كاملة من الترتيب والتحضير، وفي نفس الوقت كانت خطوة بتقول إن اللي نجح في مصر ممكن ينجح في أي مكان.

ومع قرب سنة 2025، ميريت ناوية تتوسع بشركتها في أماكن تانية، بداية من دبي، عشان تواصل رحلتها اللي بدأتها من أكتر من 10 سنين وتضيف رؤيتها لمشهد المطعم والضيافة في مصر ويمكن العالم كمان.

مي سلامة ونعمات خليل: مؤسسين قمة الإبداع

كاتب، ممثل، مخرج، بتاع إعلانات.. إلخ.. كل العاملين في المجال الإبداعي في مصر عارفين إن كل سنة في حدث مهم اسمه "قمة الإبداع"، بيحصل سنويًا بقاله 10 سنين، ومن خلاله بيتجمع كل صناع الإبداع يتكلموا مع بعض، يفكروا ويطوروا، وبتكون فرصة للجمهور وللشباب اللي لسه بيبدأوا طريقهم إنهم يسمعوا من شيوخ المهنة ويتكلموا معاهم.

الحدث ده بدأته مي سلامة ونعمات خليل في 2014، وسنة ورا سنة كانوا ناجحين ومؤثرين في اللي بيعملوه. لحد ما في 2024 قرروا يخرجوا لسوق جديدة، وتحديدًا المملكة العربية السعودية. في الحقيقة إن قرار مي ونعمات بتنظيم الحدث ده في السعودية لأول مرة، مكانش وليد اللحظة. صحيح إن التطورات الكبيرة في المشهد الإبداعي السعودي تغري أي حد إنه يحاول يشارك فيه، لكن هما فضلوا يشتغلوا على الهادي لمدة 3 سنين، لحد ما ظهرت "قمة الإبداع" في السعودية خلال 2024.

مي ونعمات نجحوا وتعاونوا مع أكبر الجهات الحكومية والخاصة في المملكة، ولسه هيكملوا وبيحلموا إنهم يكونوا جزء من صناعة الإبداع في كل مكان، وإنهم مايبصوش على بره لكن يوردوا الإبداع بتاعنا لبره، لأننا شاطرين وعندنا مواهب ضخمة في المجال ده، زي ما هما مؤمنين.

عبدالله سلام: الرئيس التنفيذي والعضو المنتدب لشركة مدينة مصر

لما شركة يكون اسمها "مدينة مصر" فأكيد الهوية والثقافة المصرية هما عنصر أساسي بالنسبالها وجزء من مشاريعها. في 2024، شركة "مدينة مصر" للتطوير العقاري، أطلقت مبادرة "العربي أصلي" المعنية بالحفاظ على الهوية واللغة.

عبد الله سلام، الرئيس التنفيذي والعضو المنتدب، بيحكيلنا القصة ورا المبادرة: "يبقى عندك كمبوند عايز تسميه اسم عربي، تلاقي الأبحاث السوقية بتقولك إن الناس بتشوف المشروع اللي اسمه عربي أقل! طب ليه؟ وليه حاطين لغتنا في المكانة دي؟!"

وفعلًا ظهرت المبادرة وحققت تأثير واسع، خصوصًا وسط أجيال جديدة يمكن تكون اللغة العربية قيمتها تراجعت بالنسبالهم، مقارنة بأجيال أقدم. وشوفنا نجوم كتير بيشاركوا فيها زي خالد ونور النبوي، ويجز، الكاتب عمر طاهر، والستاند أب كوميديان محمد حلمي.

"عبد الله" بيقولنا إنه بيشوف المبادرة دي مظلة كبيرة، الهدف منها إننا نتمسك بجذورنا ولغتنا، ولو اتفرعت منها مبادرات تانية بتقول "المصري أصلي" و "السوري أصلي" و "المغربي أصلي".. إلخ، يبقى المبادرة حققت هدفها.

علي زرعي: مصور فوتوغرافي وثائقي

في مصورين كتير شاطرين، يفهموا في العدسات والإضاءة والزوايا، لكن كام مصور بيعرف يحكي حكاية؟ هنا لازم يظهرلك اسم علي زرعي، كواحد من أشطر المصورين الحكائين واللي كل صورة بيلقطها بكاميرته بيكون وراها حكاية.

في 2024، مشروعه اللي اشتغل عليه سنين طويلة، "الزحف على التراب"، تم اختياره لورشة Joop Swart Masterclass ضمن مسابقة World Press Photo 2024، وكان المصور المصري الوحيد اللي تم اختياره. نفس المشروع كمان اتقبل في برنامج التصوير الوثائقي العربي لصندوق "آفاق". السنة دي كانت سنة زرعي، وسنة "الحاج هاني"، صديقه وبطل مشروعه اللي حكى من خلاله حكاية التوسع العمراني في مصر.

المشروع الوثائقي اللي اشتغل عليه لتسع سنين بيتناول ازاي التوسع العمراني في دلتا النيل حاصر عيلة الحاج هاني ومنعها من التنقل بحرية. المشروع بيوثق قصة العيلة دي وبيستكشف سرديات مختلفة عن معاني زي "البيت" و "الوطن" و"الطريق".

"زرعي" استحق خلال 2024 التقدير المحلي والدولي لمشروعه، اللي من خلاله بيثبتلنا مدى قوة الصورة وقدرتها على رصد لحظات ومعاني كتير مختلفة.

شهيرة لاشين: علامة تصميم أزياء مصرية

بالنسبة لشهيرة وأحمد وسارة لاشين، الموضة حكاية تتحكي بلغتك الأم.
في طفولتهم، كان الأخوات التلاتة بيلعبوا مع بعض ويتخيلوا إنهم فاتحين شركة، واحد يبقى مدير وواحد يبقى الكلاينت وهكذا. ولما كبروا عملوا سوا شركة فعلا وعلامة تجارية بتساهم في تغيير شكل الموضة في مصر.

"شهيرة لاشين" أو العلامة التجارية الخاصة بالأخوات التلاتة، كانت على ميعاد مع نجاح كبير في 2024، من خلال عرض "القاهرة 20"، اللي مكانش عرض أزياء تقليدي، لكنه كان أشبه بحكاية عن الثقافة والهوية والعاصمة، وتعبير عن رحلة الثلاثي لأكتر من 10 سنين.

وعشان الحبكة تكمل، اختاروا مكان تراثي زي القصر الذهب لعرضهم، ودخلوا عناصر زي المزيكا والغنا، بالتعاون مع مولوتوف وريم شلبي، إلى جانب العناصر الخاصة بيهم زي الخيوط والأقمشة اللي تشبهنا.

النجاح مش سهل والبراند ده مر بلحظات صعبة، منها مثلًا إنه كان هيقفل وقت كورونا، لكن الثلاثي لاشين قدروا يتجاوزوا الوقت ده ويوصلوا لنقطة يكونوا فيها معروفين في سوق غالبًا بيبص لبره وبيتأثر بالصيحات العالمية، لكن هما نجحوا إنهم يستلهموا إبداعهم من ثقافتنا وهويتنا.

فيرتكس (سيف الصياد  وعمر سليم وأحمد طارق): شركة تنظيم فعاليات

قبل "فيرتكس" الناس كانت متعودة إن الأفراح الأسطورية والحفلات الضخمة حصرية على طبقات معينة، يعني ناس زي الأمراء والنجوم الكبار ورجال الأعمال. لكن خلال 2024 شوفنا "فيرتكس" بيكسروا القاعدة دي.

هما مابدأوش من السنة دي، لكن من 2022، وواحدة واحدة غيروا مفاهيم الأفراح والحفلات الكبيرة عند الجمهور، ونجحوا إنهم ينظموا أحداث وفعاليات مبهجة عند الأهرامات وفي أماكن تاريخية تانية، عشان يجمعوا بين الحاضر والماضي.

شوفنا "فيرتكس" بيرسخوا اسمهم بفعاليات زي Africa Health ExCon ، وحفلة فرقة "شكون" في سقارة، لكن قمة شغلهم كانت فرح النجمة السابقة في WWE إريكا هاموند ورجل الأعمال أنكور جاين، واللي استمر 4 أيام في مصر اتختموا عند أهرامات الجيزة، عشان يبقى حدث الناس تفضل تحكي عنه لسنين، والشباب دول هما اللي قدروا يخلوه بالشكل ده.

بسبب فيرتكس، تنظيم الفعاليات مابقاش محصور على القاعات التقليدية، وبقى في طرق وأماكن جديدة تحكي عن الحدث المهم الخاص بيك. فيرتكس أثبتت إن مصر، بتاريخها العظيم ينفع تكون مسرح لأهم الأحداث المعاصرة، وأكيد هما من "مؤثرين 2024".

شهيرة فهمي: مهندسة معمارية

من وقت ما بدأت شهيرة فهمي شركتها للهندسة المعمارية في 2005، كسبت مكانتها بسبب الابتكار والاختلاف. النهاردة شهيرة اختيار مثالي لو عندك مساحة حابب تصممها بشكل مختلف، وكمان اختيار مثالي للمشاريع التراثية، اللي بتحكي من خلالها قصص أماكن، تخلدها وتعيد اكتشافها.

شغل شهيرة فهمي المختلف كان محل إعجاب وتقدير في أهم المجلات والمنصات العالمية المتخصصة في التصميم، زي Top 50 Beautiful Homes، وAtlas of World Interior Design. وفي 2024، تم تكريمها من المعهد الملكي للمعماريين البريطانيين كواحدة من أهم المعماريات في العالم.

في 2024، شهيرة فهمي خطفت كل الأنظار بشغلها على فندق "دار طنطورة" في العلا، بالسعودية. المشروع اتصنف كواحد من "أعظم أماكن العالم" على قائمة مجلة Time. "دار طنطورة" قدم جمال الصحرا بشكل مختلف، ومزج بين الأهمية التاريخية للمكان والجماليات العصرية.

لو اتكلمنا عن 2024، فأكيد شهيرة فهمي واحدة من قصص النجاح المؤثرة في السنة دي!

محمد تيمور: منتج سينمائي

المعلومات اللي غالبًا نعرفها عن المنتج في أي عمل فني هو إنه الشخص اللي بيصرف وبيمضي الشيكات. بس ما هو أحيانًا المنتج بيكون مفلس أصلًا أو بيدور على تمويل لمشروعه. وأحيانًا برضه بيكون مآمن بمشروع معين وينتجه في ظروف صعبة وبأقل التكاليف، ويلاقي المشروع ده كسب جايزة في أكبر مهرجان سينمائي في العالم!

ده اللي حصل مع محمد تيمور، منتج الفيلم القصير "ستاشر" واللي فاز بالسعفة الذهبية في مهرجان كان سنة 2020، وبعدها قرر "تيمور" يأسس نادي المنتجين المصريين في 2021 عشان يفتح المجال لجيل جديد من صناع الأفلام والمنتجين.

في 2024 كان "تيمور" تأثيره بيكبر في الصناعة كمدير لسوق الجونة السينمائي، وفي نفس الوقت، كان خريجين النادي اللي أسسه موجودين بأفلامهم في مسابقات مهرجان الجونة، وبيفوزوا بجوايز مسابقة الأفلام القصيرة.

واحدة كمان من النجاحات اللي احتفل بيها "تيمور" خلال 2024 كانت عرض فيلمه "مانجو" في مهرجان "كليرمون فيران" الدولي، أكبر مهرجان عالمي للأفلام القصيرة، كتتويج يستحقه على صبره ومهاراته كمنتج.

نور الرفاعي: مصمم معماري

توثيق وتصوير التصميمات فن صعب، وفي الفن ده بييجي المصور المصري نور الرفاعي في المقدمة. يمكن ساعده في ده شغله السابق كمهندس معماري، لكن لما اتحول لمصور بقى واحد من أكتر الأسامي المشهورة في تصوير العمارة في منطقة الشرق الأوسط، وفاز بجوايز مهمة.

"الرفاعي" بيشوف المباني كلوحات فنية، وتصويرها بالنسباله مش مجرد صورة، دي قصة بيحكيها وبيكشف عن تفاصيل ممكن مش ناس كتير تاخد بالها منها، وبيقدر يعمل موازنة بين الدقة والجمال.

مفيش داعي نتكلم كتير عن شغل نور، لأن الجوائز اللي أخدها تقدر تتكلم بالنيابة عن أي حد. في 2022، فاز بجائزة "Architecture Masterprize" عن صوره لمتحف المستقبل في دبي. وفي السنة اللي بعدها، كسب نفس الجائزة عن شغله على نادي ذُخر، وهو نادي اجتماعي لكبار السن في الوصل بدبي. أما في 2024، كمل نور الثلاثية وفاز بنفس الجائزة عن تصويره لجناح Seat of Power اللي صممته "دار عرفة" خلال أسبوع تصميم القاهرة.

PAO (مدحت إيهاب): رائد أعمال

إيه البوبا دي؟! الموضوع في البداية كان غريب علينا. فكرة جاية من تايوان بيقولوا، عبارة عن حاجة بتتشرب، لذيذة بس برضه مش فاهمينها. لكن لما تيجي تشوف دلوقتي، ومع نهاية 2024، "بوبا" بقى مشروب رسمي لناس كتيرة ومنتشر في كل مكان في مصر، وجزء كبير من ده حصل بسبب "باو".

"باو" قصة نجاح، وكفاح برضه، بدأت بمدحت إيهاب مع أخواته ندى و ناريمان، اللي فتحوا عربية صغيرة على الكورنيش، وعلى الصيف كده كانوا وصلوا للساحل الشمالي وبقوا معروفين لكل المصيفين هناك.

منتجات "باو" كبرت وبقوا عندهم منيو كبير و 6 فروع في القاهرة، غير الفروع الموسمية في المصايف وقرى الساحل. لكن إيه اللي بيخلي "باو" فعلًا مميزة؟ بالنسبة لمدحت وأخواته، مشروعهم دليل على إن ممكن حاجة صغيرة تغير ثقافة الأكل في مدينة كبيرة.

هدى الشريف: بتحكي قصص بالأكل

"الفود ستايلينج" أو تنسيق الأكل ماكنش شغلانة حقيقية في مصر، لحد ما هدى شريف ظهرت!

في 2014، هدى أسست أول شركة في مصر متخصصة في المجال ده اسمها "Flavor Republic". ومن وقتها، أكبر العلامات التجارية العالمية انضمت لشركتها، وشوفنا شغلها بيظهر في إعلانات بره وجوه مصر.

كملت هدى في شغفها بالأكل، وفي 2023 أطلقت النسخة الأولى من "أسبوع القاهرة للطعام"، بمشاركة أشهر شيفات العالم اللي وصلوا على القاهرة عشان يقدموا فنهم، بالمشاركة مع أهم المواهب المصرية في الطبخ.

أما في 2024، فـ "أسبوع القاهرة للطعام" شهد حضور 20 من أعظم شيفات العالم، من أصحاب الجوائز العالمية، جم على مصر واستعرضوا قدراتهم، واشتغلوا مع الشيفات المصريين.

بسبب الحدث ده، شوفنا فعاليات ضخمة للأكل، وفي أماكن مهمة زي المتحف المصري الكبير والأهرامات وحتى في الصحرا. وقتها القاهرة كانت حرفيًا مركز عالمي لفنون الأكل.

بتقولنا هدى: "هدفنا كان نحط أكلنا المصري وشيفاتنا على خريطة فن الطهي العالمي، عشان عارفين إن عندنا قصص ومواهب تستاهل تتشاف."
نقدر نقول إن هدى نجحت في حلمها خلال 2024، وأثرت في ناس كتير بيشتغلوا في مجال الأكل أو حتى بيحبوه.

للّا فضة: مغنية

للّا فضة بدأت رحلتها الفنية وقدرت تثبت إن مواهبها متعددة ما بين التمثيل والغنا وكتابة الأغاني وتقديمها. عرفناها كممثلة في مسلسل "البرنس" أول مرة مع محمد رمضان وأحمد داش ونور، وقدرت تلفت نظر الجمهور بدورها. بس من قبلها وهي بتكتب الأغاني وبتغنيها وبتحاول تقدم تجربة موسيقية حقيقية بتعبر عنها، مش مجرد كلام وخلاص.

في نهاية 2024 لو بصينا على أنغامي هنلاقي أغاني للّا فضة اتسمعت أكتر من 4 مليون مرة، وأغنية "قطع" لوحدها اتسمعت 3 مليون مرة.
وعلى سبوتيفاي فيه 389 ألف شخص بيسمعوا " للّا" كل شهر وأغنية "قطع"مع أبيوسف حققت 2.3 مليون استماع.

فيديو كليب الأغنية دي بقى على اليوتيوب كسر الـ4.7 مليون مشاهدة. والأرقام دي كلها خليتها أكتر فنانة هيب هوب مصرية بتتسمع حاليًا.
نجاح للا فضة خلال السنة خلاها تكون في قائمة "مؤثرين 2024"

نور النبوي وطارق الجنايني: حريفة الحريفة

في يناير 2024، شفنا إعلان فيلم "الحريفة 1".. مجموعة شباب صغيرين أول مرة يعملوا بطولة بينافسوا في شباك تذاكرالسينما. كان فيه توقعات كتير إن الفيلم ينجح بس ماحدش توقع اللي حصل فعلًا! الحفلات كلها كاملة العدد ومش لاقيين تذاكر، السوشيال ميديا كل ما تفتحها تلاقي بوست عن الفيلم ده، كل الناس بتتكلم عن "الحريفة" اللي غيروا معادلة شباك التذاكر ونجم الشباك.

طارق الجنايني، منتج الحريفة، ماخافش من التجربة واعتبرها مخاطرة بس محسوبة وهو ضامن نجاحها، زي ما عمل قبل كده في حالة خاصة، أو حكايات بنات أو غيرهم من أعماله.

"الحريفة" فتح الباب عشان نجوم جداد مايخافوش إنهم يقدموا أعمال مش مضمونة جماهيريًا ويراهنوا على المشاهد اللي لو قدمتله عمل مختلف وحقيقي وحلو هيقطع تذكرة السينما وينجح الفيلم.

عشان خطوة جريئة... وعشان نجاح مش مسبوق في بداية السنة، وجزء تاني في نهاية السنة، كان لازم يكون معانا "حريفة الحريفة" ضمن مؤثرين 2024.

ماتنساش تتابعنا على إنستجرام Elfaslaonline عشان تشوف كل يوم تفاصيل أكتر.