مؤثرين 2025: ناس غيروا شكل الحياة في مصر السنة دي

لو هتلخص ٢٠٢٥ بالنسبالك هتقول عنها إيه؟ أكيد كان فيها حاجات حلوة وحاجات تانية صعبة. أكيد قدرت تأثر في حياة ناس، وأكيد ناس تانية أثروا فيك.

التأثير كلمة بمعاني ضخمة. حروف قلية لكن جواها هتشوف لقطات لناس عمرك ما هتنساهم. ناس سهلوا عليك حياتك. قدمولك معلومة. ضحكوك ويمكن بكوك. جايز عمرك ما قابلتهم بس عملوا حاجة كانت سبب في خير ليك، أو حتى اتحطوا في طريقك عشان يغيروا مسارك وتشوف الدنيا من خلالهم بشكل تاني. بيقولوا إن أثر الفراشة لا يرى، لكن كمان بيقولوا إنه لا يزول.

في قائمة السنة دي لـ "مؤثرين ٢٠٢٥" هتسمع أكتر عن ناس سابوا تأثير، يمكن يكون صغير قد تأثير الفراشة، لكنه في النهاية تأثير مش هيزول. وسواء كنا بنتكلم عن الفن أو الرياضة أو البيزنس أو العمل الخيري، فكل حد منهم قدر في ٢٠٢٥ يكون صاحب بصمة وصاحب تأثير.

مؤثرين 2025: أحمد غنيم، الرئيس التنفيذي للمتحف المصري الكبير

حدث افتتاح المتحف المصري الكبير كان حدث منتظر عالميًا، ولما شوفنا حفل الافتتاح وكمان شوفنا المتحف نفسه بعد بداية الزيارة بشكل رسمي، فهمنا هو ليه فعلًا كان حدث منتظر.
تخيل مكان واحد بيعرض أكتر من 100 ألف قطعة أثرية، وبيعرض كل كنوز الملك توت عنخ آمون اللي لأول مرة بنشوفها مجتمعة في مكان واحد، من وقت اكتشاف المقبرة في 1924.
كمان المتحف مش بس بيقدم تجربة أثرية بتمزج بين الماضي والمستقبل، لكنه كمان بيوفر تجربة كاملة، يعني محلات ومطاعم وكافيهات، كل ده بيساعد المتحف عشان يشتغل بشكل مستدام ويعتمد على موارده الخاصة، وبيخليه خروجة حلوة وزيارة استثنائية فيها جانب ترفيهي وثقافي.
وسط كل ده كان أحمد غنيم، المدير التنفيذي للمتحف المصري الكبير، هو وفريقه بيشتغلوا عشان كل حاجة تخرج للعالم كله بالشكل الأمثل. وعشان الدور اللي قام بيه ولسه هيكمله في مشروع المتحف المصري الكبير، هو أكيد واحد من مؤثرين 2025.

مؤثرين 2025: مصطفى سالم – معماري ومساهم في تطوير وسط البلد


وسط البلد هي روح المدينة وقلبها، عمرك كنت ماشي في الشارع وفكرت إن ياريت ترجع العمارات دي زي زمان؟
ده بالظبط اللي بيعمله مصطفى سالم، اللي بدأ مشروعه من خلال تخيل شكل المباني بعد ترميمها، لكن ماوقفش عند التخيل والتمني وراح بنفسه للجهاز القومي للتنسيق الحضاري وطلب منهم إنه يشارك في تطوير منطقة العتبة وبدأنا نشوف نتيجة الشغل ده من خلال مبنى "تيرنج" اللي رجع لشكله القديم.
"سالم" كمان حريص إن الأماكن تكون مربوطة بناسها وذاكرتهم ويفضلوا موجودين يستفادوا من الأماكن ويفيدوها. والدولة بتدعمه وده ظهر في حصوله على جائزة الدولة التشجيعية وتعيينه عضو في اللجنة القومية لتطوير وحماية القاهرة التاريخية عشان نشوف القاهرة وهي بتطور بعيون وإيدين ولادها.

مؤثرين 2025: سارة جوهر - مخرجة

في لحظة في 2025 سمعنا عن فيلم "عيد ميلاد سعيد" للمخرجة سارة جوهر، مخرجة لأول مرة منعرفش عنها غير شغلها كمنتجة منفذة في مسلسل مارفل "مون نايت". بعد وقت قليل، مصر بتختار الفيلم ده عشان يمثلها في الأوسكار وبيتم عرضه في افتتاح مهرجان الجونة السينمائي وبيخلص الفيلم والناس كلها بتعيط ومتأثرة ومبسوطة وسعيدة وبيتكلموا عن المخرجة الجديدة اللي اتولدت.
قدرت "سارة" من خلال فيلمها الأول إنها تتكلم عن الطبقية وتحكي قصة عاشتها في طفولتها بسلاسة ولطافة من غير ما تزود مشاهد عنف أو تحط مشاهد ترضي المشاهد الغربي وزي ما حكيتلنا رفضت تعمل حاجة مش مقتنعة بيها.. ومع ذلك قدرت بفيلمها ده تكسب 3 جوائز في مهرجان تريبيكا وتكون أول مصرية في قائمة المخرجين الواعدين لمجلة فارايتي 2026.
عشان أمل ادته لمخرجين لسه بيبدأوا إنهم ممكن يعملوا أفلام بسيطة وشبههم وتوصل للعالمية وتاخد جوايز.. كانت سارة جوهر ضمن مؤثرين 2025.

مؤثرين 2025: هبة السويدي: مؤسسة مستشفى أهل مصر لعلاج الحروق

في 2025، قدرت هبة السويدي، مؤسسة مستشفى أهل مصر إنها تقدم أول مؤتمر إقليمي مختص في علاج الحروق. المؤتمر ده، واللي كان الأول من نوعه في مصر والشرق الأوسط، ضم خبراء عالميين ومتخصصين في المجال ده، عشان يساعدوا في تقديم أفكار ومقترحات وتعاونات لعلاج حالات الحروق في مصر.
أما الإنجاز الأبرز من وجهة نظرها، فكان نجاحها في استيراد جلد طبيعي يتم زراعته لحالات الحروق المتقدمة، وده برضه لأول مرة بيحصل في مصر والشرق الأوسط، بعد حصولها على كل الموافقات اللازمة من مجلس الوزراء ووزارة الصحة، ووصلت بالفعل أول شحنة من الجلد، وتم إجراء عملية الزراعة لواحدة من الحالات داخل مستشفى "أهل مصر".
"أهل مصر" مش بس مستشفى لعلاج الحروق، لكنها مؤسسة بتهتم بإعادة تأهيل الحالات ودعمهم نفسيًا وإعادة دمجهم في المجتمع، ورغم إن مصطلح "مستشفى علاج حروق" ممكن يكون مقبض أو مخيف للبعض، بتقولنا "هبة" إن مفيش حد زار المكان غير وخرج بطاقة إيجابية رهيبة.
مسيرة هبة السويدي في العطاء مستمرة من سنين، وقدرت خلالها تحول محنتها بوفاة والدها وابنها لمنحة، وتواصل بناء مستشفى ومؤسسة "أهل مصر"، وتبدأ في المرحلة التانية من المستشفى عشان تقدر تستقبل حالات أكتر. وفي نهاية 2025، استحقت هبة عن جدارة الفوز بجائزة عالمية بتحمل اسم "الأم تريزا" اللي سبق وفاز بيها حاصلين على جائزة نوبل وشخصيات دولية مختلفة.

مؤثرين 2025: أمير المصري
لما بنسمع عن ممثل مصري بيشارك في أفلام أجنبية، أحيانًا بيكون عندنا فكرة مسبقة خاطئة إنه أكيد هتبقى أدواره محصورة في منطقة معينة، لكن أمبر المصري بيفاجئنا كل يوم!
من 2020 من ساعة ما قدم "Limbo" واحنا شفنا فيه حاجة مختلفة خليته يكون في قائمة المؤثرين وقتها وبعد 5 سنين رجع تاني عشان يكون موجود مرة تانية بعد عرض فيلمه "Gaint" اللي بيحكي عن البرنس نسيم حميد، البطل الملاكم اليمني الإنجليزي. تدريبات شاقة وصلت إنه يكسر صوباعه وهو بيمثل الدور زي ما حكالنا، لكن كانت تجربة تستحق المعاناة عشان "نسيم" نفسه لما يشوف الفيلم يعجبه ومراته تقول إن شخصية الفيلم أحلى من الحقيقة.
أدوار صعبة بترسم خطوات ورحلة أمير المصري عشان يبقى ممثل مصري ناجح في بريطانيا، لكن مايكونش مجرد ممثل بيتكلم عربي لكنه ممثل شاطر بيعبر عن نفسه وعن ناس شبهه رغم كل التحديات اللي بيقابلها والعنصرية أحيانًا، وحتى لما يقدم دور إرهابي يكون دور مختلف وفيه بعد جديد مش مجرد دور ننساه بعد ما نشوف العمل.
وعشان بيدي أمل لغيره كتير من ممثلين يمكن يحلموا يوصلوا للعالمية، كان لازم يكون ضمن مؤثرين 2025.

مؤثرين 2025: ياسمينا العبد – ممثلة
يوم 1 نوفمبر، كنا مستنيين الحدث الأهم في مصر في سنة 2025 وهو افتتاح المتحف المصري الكبير، وفي وسط كل التوتر والترقب شفنا بنت شابة صغيرة بتمثل كل شباب مصر، بتقف بكل ثقة قدام رئيس الجمهورية وضيوف من كل العالم عشان تقولهم إن حضارتنا مكملة وإننا طول الوقت عندنا وجوه مشرفة.. والبنت دي كانت ياسمينا العبد.
الممثلة اللي ظهرت من وهي طفلة في إعلانات لكن قدرت السنة دي تثبت إنها موهبة كبيرة من خلال أعمال زي لام شمسية، وميد تيرم. وتورينا إنها عندها مواهب متعددة وتخلي الناس تدعي: "نفسي بنتي تبقى شبهك". عشان ادت شباب صغيرين أمل كبير وعشان كانت صوت وممثلة للبنات المصريين كانت ياسمينا العبد معانا ضمن قائمة مؤثرين 2025.

مؤثرين 2025: سيف عيسى، صاحب ذهبية بطولة العالم للتايكوندو، كأول مصري يحقق اللقب ده من 28 سنة.
في 2025 كان سيف عيسى على ميعاد مع إنجاز تاريخي، وهو الفوز بذهبية بطولة العالم للتايكوندو، كأول مصري يحقق الإنجاز ده من 28 سنة.
يمكن الإنجاز ده يكون تعويض لعدم التوفيق اللي واجه سيف في أولمبياد باريس 2024، وخروجه من أول مباراة، على الرغم من كونه كان واحد من فرسان الرهان المصريين، بعد فوزه ببرونزية أولمبياد طوكيو 2020.
وعلى حجم الإنجاز اللي حققه سيف السنة دي، فده مكانش الأول، لأنه سبق وتصدر التصنيف العالمي للعبة، 4 مرات في 4 أوزان مختلفة، وحقق ميداليات متنوعة في بطولات العالم وأولمبياد الشباب، كل ده وهو لسه 27 سنة ويقدر يواصل لحاجات أكبر وإنجازات أعظم.
التأثير اللي حققه سيف في اللعبة وفي الرياضيين المصريين عموما وإنه رفع اسم مصر، بيحسسه بالمسؤولية وإنه لازم يتحدى نفسه ويحاول بشكل أكبر، عشان كده بيخطط في 2026 إنه يلعب وزن حر، من 87 كيلو لأعلى، وده هيخليه بيواجه منافسة أكبر على البطولات والميداليات، لكنه مستعد.

مؤثرين 2025: كريم الشناوي، مخرج
في 2025، المخرج كريم الشناوي كان فرس رهان ناجح للسينما والدراما، ده لأنه قدر يقدم 3 أعمال مختلفين عن بعض تمامًا ويحقق تأثير كبير من خلالهم.
أولهم كان مسلسل "لام شمسية"، المشروع اللي امتد تحضيره بين كريم والمؤلفة مريم نعوم لسنين كتير، وخرج أخيرًا للنور في رمضان اللي فات، وبسببه اتفتح نقاش واسع عن قضية التحرش بالأطفال وحقق تأثير ضخم، لكنه في نفس الوقت حافظ على تماسكه كدراما اجتماعية بتحكي قصة تشدك وتستنى تتفرج عليها كل يوم من أول لآخر حلقة.
مغامرة كريم التانية في 2025 كانت فيلم "ضي – سيرة أهل الضي"، حكاية إنسانية وشاعرية هادية جدًا ومليانة ألوان وأماكن تصوير مبهرة، وفي نفس الوقت بتلمح فيها دعوة لتقبل الآخر، بدون أي توجيه مباشر أو ادعاء حكمة.
وختم كريم سنته المميزة بـ "السادة الأفاضل" كفيلم كوميدي تجاري شديد العبثية، وبطولة جماعية مش بنشوفها على الشاشة بتحصل كتير. عشان يكون كريم زود مكتبته ورصيده بصورة كبيرة في سنة ناجحة بالنسباله.

مؤثرين 2025: علي البيلي - بطل لام شمسية

لما بنسمع عن طفل ممثل، أول حاجة بتيجي في بالنا إنه ممثل كيوت بيعمل أدوار سهلة وبسيطة.. لكن ده ماكنش الحال مع علي البيلي اللي فاجئنا في مسلسل "لام شمسية".
طفل صغير لكن بأداء ممثل كبير، قدر بعينيه ومن غير كلام أحيانًا يوصلنا مشاعره ويمثل دور صعب ومعقد. ورغم صعوبة القضية اللي المسلسل طرحها ، قدر "علي" يقدمها على الشاشة بسلاسة ويخلينا نصدقه كلنا. حبيناه وأثر فينا، ونسينا معاه إنه طفل لسه بيبدأ مسيرته في مجال التمثيل، لأنه أظهر موهبة كبيرة تليق بفنان كبير.
في كل مرة شفناه في مشهد، فكرنا إزاي الطفل ده قدر يتدرب ويطلع منه الأداء ده.. وقدر بوجوده في المسلسل يكون حافز لأطفال وكبار يتكلموا عن اللي بيحصلهم والتحرش والاعتداء اللي بيواجهوه، وعدى تأثيره مجرد إنه ممثل شاطر لكن كان مؤثر في المجتمع وجرأته وجرأة أهله وقبولهم للدور ده خليته يكون من مؤثرين 2025 اللي عمرنا ما هننسى دورهم.

مؤثرين 2025: كريم إبراهيم وشيرين زغو، مؤسسة تكوين للتطوير العمراني.
تغيير حياة الناس للأحسن هو أعظم أنواع التأثير، يمكن ده اللي هيخلي اسم مؤسسة تكوين بيترد وبقوة في أي نقاش بيتكلم عن أشخاص مؤثرين خلال 2025.
كريم إبراهيم وشيرين زغو، أصحاب شراكة ممتدة في مؤسسة "تكوين"، المكان المختص بمشاريع التطوير العمراني، واللي بيهتم إن أفراد المجتمعات المحلية يكونوا هما القلب والأساس في أي عملية تطوير.
في 2025، فازت مؤسسة "تكوين" بجائزة الآغا خان عن مشروعهم لتطوير "إسنا" في الأقصر. جايزة مهمة جدًا وكانت غايبة عن مصر من سنة 2004، لكن التأثير اللي شيرين وكريم حققوه لأهل إسنا هيفضل هو الإنجاز الحقيقي.
إسنا هي واحدة من أعرق مراكز الأقصر مع قدرات كتير كانت غير مستغلة، لكن مع انطلاق مشروع التطوير، قدرت "تكوين" تغير شكل المحلات والمباني تمامًا، وتطور الفندق الموجود في القرية، وتفتح مطعم لسيدات القرية بيقدموا فيه أكلهم التراثي، فكان كل ده سبب في جذب عدد كبير من السياح وتحقيق مكسب اقتصادي لأصحاب إسنا وفتح الباب لفرص شغل جديدة ومختلفة.
مشروع تطوير "إسنا" اللي بدأ في 2009، نجح إنه يجمع بين التطوير والحفاظ على تراث المدينة وحرف أهلها، وكان في سبب في حياة أفضل لكل اللي عاشوه.

مؤثرين 2025: سارة عزيز، مؤسسة Safe Egypt

النهارده، قضايا زي العنف الجنسي أو التحرش بالأطفال، بتمر بمنعطف مهم، لأن بقى في نقاشات أوسع وتوعية أكبر وأحكام رادعة بتصدر ضد أي شخص يرتكب جريمة مشابهة. يمكن ده مكانش الوضع سنة 2012 لما بدأت سارة عزيز مؤسسة Safe Egypt.
سارة من خلال المؤسسة نجحت إنها تساعد عدد كبير من الأطفال وأولياء الأمور، من خلال ورش تدريبية وتوعوية بتساعدهم على تخطي صدمة التعرض للجريمة دي، وورش تانية بتساعدهم يتعلموا أكتر عن جسمهم وخصوصيتهم وازاي يحموا نفسهم وقت الخطر.
بعد سنين من الشغل الهادي والمستمر، تأثير Safe Egypt بقى ملحوظ، وبقينا نشوف أهالي بيحضروا ورش عن الاعتداء الجنسي على الأطفال برغبتهم وباختيارهم.
في 2025، المؤسسة زادت من حجم تأثيرها من خلال افتتاح أول حضانة ليها، ونشر كتب وألعاب للأطفال تساعدهم يعرفوا إيه التصرفات أو اللمسات اللي لازم يقولوا عليها لا. كمان سارة شاركت كمراجِعة علمية ونفسية لمحتوى الأطفال في مسلسل "لام شمسية" اللي كان سبب أساسي في توعية ملايين الأسر وفتح نقاش عن قضية مهمة.

مؤثرين 2025: ميرا رياض ومارينا رينا
أعظم تأثير ممكن تعمله هو إنك تغير حياة شخص كان متدمر ووحيد وتخليه يحس إنه من حقه يعيش حياة طبيعية، وده بالظبط اللي عملوه ميرا رياض ومارينا رينا في ملجأ "الحمل الصغير" المخصص للأطفال اللي اتعرضوا لعنف وتجارب قاسية.. وفي الملجأ ده عاشوا حياة مختلفة طبيعية في بيوت وأسر زي أي طفل طبيعي.
الأطفال هنا من حقهم يختاروا يحكوا قصتهم ولا لأ، ومش من حق حد يجي يتفرج عليهم.. وبيروحوا مدارس طبيعية وبيلعبوا رياضة وبيشتركوا في أنشطة حسب ميولهم وكمان بيتعالجوا وبيتم متابعتهم نفسيًا، عشان يكونوا أشخاص أسوياء مفيدين في المجتمع ومش غرباء عنه رغم كل اللي اتعرضوا ليه في طفولتهم.
وعشان التأثير الكبير ده كان لازم ميرا رياض ومارينا رينا يكونوا ضمن مؤثرين 2025.

مؤثرين 2025: أحمد عبيد، مستشار وزارة الثقافة للاستثمار ومؤسس شركة RMC Worldwide

الثقافة المصرية والتراث المصري أشبه ببحر. بحر هتلاقي آثاره في كل شارع وفي كل حارة، وصولًا للقصور والمسارح والمتاحف. وبالنسبة لأحمد عبيد، مؤسس شركة RMC Worldwide ومستشار وزير الثقافة، فهو عليه مسؤولية الحفاظ على التراث ده وإحيائه والاستفادة منه لتحقيق دخل، والأهم، تحقيق وعي!
أحمد عبيد قضى حوالي 30 سنة بيشتغل في مجال التسويق، ووصلته رحلته للعمل في الفعاليات الثقافية. ومن وقتها قدر "عبيد" يقدم تجارب ثقافية فريدة من نوعها، من أول تقديم حفلة هولوجرام لأم كلثوم، لتنظيم فعاليات في أماكن تاريخية زي قصر عابدين والقبة وغيرهم.
في 2025، قدر "عبيد" يشتغل على مبادرات مهمة زي "إحياء التراث الثقافي المصري" و "500 ليلة مسرح"، وكمان عيد الموسيقى واللي بسببه شوفنا 100 حدث فني في كل محافظات مصر في يوم واحد. ولسه مع كل ده بيحلم بخطوات أكبر، لأنه مؤمن إن اللي عند مصر مفيش زيه في العالم، وإن كل أسرة مصرية من حقها تستمتع بفعاليات ثقافية تناسب ذوقهم.

مؤثرين 2025: الشيف مصطفى سيف – شيف مطعم خوفو
من عربية الكبدة في الزيتون لبرنامج توب شيف ومنه لشيف مطعم خوفو أهم مطعم قدام الأهرامات بيقدم الأكل المصري وبيحطه في منافسة كسبانة مع المطابخ العالمية.
هي دي حكاية شيف مصطفى سيف اللي من وهو صغير حلم إنه يكون بيمثل مطبخ مصر وبيعرف الناس على أكلنا ويوريهم حلاوة وجمال الأكل المصري.. وقدر يخلي الناس تيجي المطعم تصور الأكل المصري قبل ما تصور الأهرامات.. وتتعرف على كل أكلة وتيجي مخصوص رحلات عشانها.
شيف مصطفى سيف قدر إنه يوصل بمطعم خوفو إنه يكون المركز الرابع ضمن أفضل 50 مطعم في الشرق الأوسط، ويخلي الأجنبي جاي عايز يدوق اللحمة بالبصل، والكشري، والملوخية .. بس لسه حلمه يعمل أحسن عربية كبدة في مصر زي ما كان خاله وجده بيعلموه أصول الصنعة.


مؤثرين 2025: ميريت السيد، الرئيس التنفيذي لشركة Legacy Development and Management

إدارة المتحف المصري الكبير مش مجرد شغلانة، دي مسؤولية ضخمة وحلم منتظر لفترة طويلة، ومكان متوقع إنه يجذب أكتر من 5 مليون سائح من كل العالم كل سنة، فلازم يكون المكان على قدر المسؤولية دي.
جزء كبير من المهمة في المتحف هي التفكير في إزاي نحكي تاريخنا للعالم بشكل مختلف، ونقدم عظمة الحضارة المصرية بعين الحاضر والمستقبل، ونعرف ازاي ممكن نقدم للناس حكاية أكتر من 100 ألف قطعة أثرية، لكن كمان نقدملهم تجربة ممتعة ومتكاملة ومستدامة.
ميريت السيد، الرئيس التنفيذي لشركة Legacy Development and Management، إحدى شركات حسن علام القابضة، والمسؤولة عن كل خدمات الزوار والمرافق داخل المتحف المصري الكبير، هي وفريقها بيتعاملوا كل يوم مع المسؤوليات دي بأحسن شكل، وبيحطوا الخطط اللي تخلي الافتتاح العظيم ده مجرد بداية وخطوة على طريق أطول ونجاحات أكبر.

مؤثرين 2025: مصطفى البلتاجي، الرئيس التنفيذي والشريك المؤسس لشركة "ناوي"
كمؤسس مشارك والرئيس التنفيذي لشركة ناوي، الرائدة في مجال التكنولوجيا العقارية في مصر، قدر مصطفى البلتاجي إنه يقود تحول كبير، وينهي سنين طويلة من التعقيد وقلة المعلومات المتاحة اللي كان بيتسم بيها القطاع ده.
والأهم إنه في 2025 قدر يوصل لجمهور جديد تمامًا، لأنه خلى الاستثمار العقاري حاجة مش محتاجة ملايين عشان تقدر تكون جزء منها، بعد ما أطلق "ناوي شيرز" اللي بيسمح بالتملك الجزئي للعقارات، أو إنك يبقالك سهم أو حصة بسيطة في عقار كبير.
بالإضافة لإطلاق "ناوي ناو" وده حل تمويلي عشان خطوة التملك تكون أسهل وأقرب. وكمان "ناوي أن لوكد" اللي بتساعد الملاك يطوروا وحداتهم غير المستغلة ويشغلوها ويأجروها.
كل دي خطوات قدر مصطفى وشركائه وفريقه في ناوي يقوموا بيها، ولسه هيواصلوا خطوات جديدة، كلها بتأثر في حياة الناس وبتسمحلهم بالتملك أو حتى استثمار مبالغ بسيطة في صناعة وقطاع ضخم زي العقارات.

مؤثرين 2025: عاصم تاج، مؤسس شركة "تسجيلات رعد" الموسيقية

صناعة الموسيقى بشكلها الحديث اللي بنشوفه حاليًا على المنصات المختلفة، مابقيتش مجرد مغني شاطر وملحن بيلعب مزيكا. إدارة الأعمال والإنتاج بقوا عوامل مهمة جدًا بتساعد أي فنان في خطواته وبتزود فرص انتشاره.
وبصفته مؤسس لشركة رعد Records ومدير لنجوم كبار زي ويجز، عاصم تاج في 2025 كان له دور مهم في إعادة تشكيل المشهد الموسيقي الجديد في مصر، وساعد عدد كبير من المواهب الصاعدة في الانتشار والوصول لجمهور كبير.
بيقول عاصم عن سنته إنه فخور خلالها إن شركة "رعد" بقت بتملك بورتوفوليو متنوع جدًا من الفنانين، واللي مش بيتم اختيارهم على أساس التريند، لكن على أساس الإيمان بالموهبة والمزيكا.
عاصم كمان في 2025 كان كلمة السر في واحدة من أقوى التعاونات الموسيقية، لما قدمت شركة "رعد" أغنية "كلام فرسان" لمنير وويجز اللي جمع بين جيلين مختلفين تمامًا في أغنية واحدة، وكانت ختام مميز لسنة عاصم تاج وشركته.

مؤثرين 2025: نادية الداشر، مؤسسة مشاركة ومنتجة في SNAP14 Productions

في 2025، ناديا الداشر وشركة "سناب14" وصلوا لنقطة مهمة في رحلتهم إنهم يثبتوا إن مصر تقدر تبقى مركز حقيقي ومهم لحكايات عن الموضة والفن، وقدروا إنهم يقدموا مواهب مصرية بتشارك في مشاريع عالمية، وده ساعد المشهد الإبداعي المحلي إنه يكسب أرض جديدة ويوصل لنقط أوسع.
السنة دي لـ "سناب14" كانت مليانة شغل كبير مع أسماء عالمية زي Jacquemus وVOGUE Netherlands وDAZED، بإنتاج متنفّذ بنفس مستوى التخطيط والتنفيذ اللي بقى علامة مميزة لنادية وفريقها، اللي بالنسبالها بتشوف إن الشغل ده مبني على فلسفة إنتاج واعي، بتركّز على التواصل الواضح والشفافية، واحترام الناس قبل أي حاجة، وكمان احترام كل خطوة في عملية الشغل، وده أساس أي إبداع حقيقي، وعشان كده هي أكيد كانت من "مؤثرين 2025".