حوار مع مصور ومصمم البوسترات شريف مختار
ورحلة تنفيذه لـ 11 بوستر في رمضان 2026
بوسترات المسلسلات والأفلام أو "الأفيش" حاجة كلنا اتربينا عليها وارتبطت معانا بذكريات كتير، أفيش أول فيلم دخلناه في السينما، أفيش مسلسل كان جزء مهم من يومنا وإحنا صغيرين، ولحد دلوقتي هو الحاجة اللي بتحمسنا دايمًا لأي عمل فني مستنيين نشوفه وبتدينا جرعة سريعة بتدخلنا في مود العمل ده من قبل ما نشوف أي مشهد منه.
وبوسترات مسلسلات رمضان دايمًا ليها طابع خاص، لأنها أول حاجة بنشوفها للمسلسل اللي متحمسين له أو حطينة في أول الليست بتاعتنا للمسلسلات اللي ناويين نتابعها، بس هل عمرنا فكرنا إيه الكواليس اللي ورا صناعة "الأفيشات" دي؟
عشان كدة عملنا حوار مع المصور الفوتوجرافي ومصمم البوسترات "شريف مختار"، اللي حكالنا كواليس صناعته لـ 11 بوستر من مسلسلات رمضان السنادي، واللي كل واحد فيهم بيختلف عن التاني في المضمون والشكل والتيمة. في البداية شريف مختار قالنا إنه في رمضان 2026 اشتغل على تصوير وتصميم 11 بوستر لمسلسلات مختلفة في أوقات متقاربة، ده شئ مش سهل بس هو قدر يفصل بين مود الكوميدي والشعبي والدراما بسبب الخبرة الطويلة أولًا، ثم تخصيص يوم منفصل لتصوير كل مسلسل لوحده وإنه يعيش حالته كاملة. ومرورًا بـ بوسترات شريف مختار السيزون ده، قالنا على مسلسل "سوا سوا" إنه مسلسل دراما اجتماعية فـ حاول يدخّل "الدفى" في البوستر مع جزء كبير من الرومانسية اللي بتسيطر على علاقة البطلين، وقدر إنه ياخد شوت أحسن من اللي كان مخطط له لأن هدى ومالك كانوا متعاونين. وعت مسلسل "النص 2"، قالنا: "في "النص 2" حاولت آخد البوستر في حتة كوميدي أكتر لأن المسلسل السنادي جرعة الضحك فيه أزيد من الجزء الأول. فكرته كانت صعبة والأبطال تعبوا معايا في تنفيذه، وصعوبته زادت في إن كل ممثل صوّر لوحده لكن قدروا يدوني ريآكشن إنهم شايفين بعض".
شريف حكالنا إن في مسلسل "المتر سمير" ملحقش يشوف مشاهد متصورة منه، وبناءً على نقاشات مع المخرج وكريم محمود عبد العزيز -اللي بيهتم جدًا بتفاصيل البوستر- قدر يفهم إن "الشخصيات محتاسة" وإن ده المود العام للمسلسل، فـ ضاف بينهم "مود" معين يعكس الحوسة دي.
سألنا شريف عن أصعب البوسترات اللي اشتغلها السنادي، وقالنا: "أصعب البوسترات اللي اشتغلت عليها السيزون ده كان مسلسل "توابع" لأني مشوفتش مشاهد متصورة للمسلسل واعتمدت بس على ميتنج مع المخرج، وعرفت إن المسلسل عبارة عن مجموعة علاقات متشابكة بين أشخاص، قرارات الماضي أثّرت على حاضرهم بشكل ما، وفكرة البوستر والـ reflection تبدو سهلة لكن كانت صعبة جدا في تصويرها وتصميمها وأخدت وقت في تنفيذها".
وعن بوستر مسلسل "فن الحرب" من بطولة يوسف الشريف، شريف مختار قالنا إنه مبني على تجمع مجموعة من الأشخاص وبتجمعهم الفوضى اللي بتسببها الفلوس، وقصد إنه يكون high angle علشان يبيّن حالة التورط بينهم وبين بعض بشكل أوضح.
شريف قالنا إن جزء مهم من تصميم البوستر هو "الكاليجرافي" وهو نوعية الكتابة أو الخط اللي بيتكتب بيه الأسماء على البوسترات، وده بينفذه "محمد عباس" االلي شريف وصفه بإنه جزء مهم من رحلة تنفيذ البوستر.
كان مهم نعرف من شريف مختار بيتعامل مع الممثلين إزاي في تصوير البوسترات، وقالنا إن التعامل مع معاهم بيكون في الأول صعب شوية لكن بعد اكتساب الثقة بينهم والمعرفة الطويلة بتدوّب كل الحواجز وبيكون في ارتياح ويوم تصوير البوستر بيكون من أحلى الأيام. سألنا شريف مختار عن طريقة تصويره وتصميمه للبوسترات الجماعة، وقالنا: "مش بحب أصور الممثلين مع بعض لأن أحسنلي أصور كل واحد لوحده علشان آخد وقتي معاه في الوضعيات وتنوير وشه، وبحاول دايمًا أخرج من "الرصّة التقليدية" للبوسترات الجماعة. وآخر حاجة، شريف قالنا إن تصميم بوسترات الأعمال الفنية بيحتاج إنه في البداية يللم معلومات كافية عن العمل، ولو أمكن يشوف الحلقات اللي تم تصويرها عشان يعرف يبني تصور كامل عن المضمون، وفي ظروف معينة بيضطر يصور ويصمم بوستر لمسلسل هو لسة "حبر على ورق" ودي بتكون أصعب.
- الموضوع اللي فات نور النبوي هيشارك في دبلجة النسخة الرسمية من فيلم "Goat"
مواضيع مشابهة
الأكثر متابعة هذا الشهر
-
-
-
-
11 فبراير 2026
