العيد مايبقاش عيد من غيرها.. مسرحيات هنستنى نتفرج عليها للمرة المليون
عارفينهم وحافظينهم بس بردو هنشوفهم
فاكر آخر مرة قضيت العيد من غير ما تعرف رمضان السكري هيسيب ولاده ولا لا؟ طب فاكر آخر مرة قولت لأ أنا مش مهتم اعرف بهجت الأباصيري قضى كام سنة خدمة في ثانوي؟
محدش عارف ده حصل إزاي وامتى بس تقريبًا كلنا بقينا متفقين إن مينفعش العيد يعدي من غير لما نتفرج على مجموعة معينة من المسرحيات، وعلى الرغم من إننا حافظينهم، إلا إننا برضه لسه بنحب نتفرج عليهم زي الأول:
1- مسرحية سك على بناتك:
اللي بتحكي عن الدكتور رأفت اللي هدفه يجوز بناته الـ 3 عشان يقدر هو كمان يتجوز حبيبته عصمت، ولكن كل حاجة بتخرج عن السيطرة بسبب مشاكل بناته التلاتة. المسرحية إخراج فؤاد المهندس ومحمد شاكر، وتأليف لينين الرملي.
2- مسرحية مدرسة المشاغبين:
بتحكي عن مجموعة من الطلاب المشاغبين في واحدة من المدارس الثانوية بزعامة بهجت الأباصيري، والي بيتسببوا في مجموعة من المشاكل لمدرسين مدرستهم، لحد ما بتيجي المُدرسة عفت وبطريقتها المختلفة بتقدر تغير من أسلوبهم وطريقة تفكيرهم. المسرحية إخراج جلال الشرقاوي وعبدالله الشيخ، وتأليف علي سالم.
3- مسرحية العيال كبرت:
بتحكي عن الزوج والأب رمضان السكري اللي بيفقد الأمل في إصلاح أولاده فبيقرر الهروب من المسؤولية والجواز من زوجة تاني تبعده عن عالمه، لكن أولاده بيعرفوا الخطة وبيحاولوا منع والدهم عن طريق الإصلاح من نفسهم. المسرحية إخراج سمير العصفوري وعبدالله الشيخ، وتأليف بهجت قمر.
4- مسرحية وجهة نظر:
بتحكي المسرحية عن مجموعة من المكفوفين اللي عايشين في مكان صعب بدون رعاية، لحد ما عرفة الشواف بيثور على الوضع ده، ويقود المجموعة لكشف رئيس الهيئة اللي مش بيهتم بيهم ولا بيراعي ظروفهم الصعبة. المسرحية إخراج محمد صبحي وصفوت غطاس، وتأليف لينين الرملي.
5- مسرحية كده أوكيه:
بتحكي عن رهان بيحصل بين مدير قناة فضائية ومذيع شاب على قوة الفلوس وقدرتها فى تحويل بنت الجناينى لنجمة مشهورة، وسلطة الفلوس في إقناع خطيبة أحد معدين البرامج إنها تسيبه وتحب المدير.
المسرحية إخراج سمير العصفوري وأسامة العاصي، وتأليف أحمد عفيفي.
6- مسرحية ألابندا:
بتحكي عن رمزي اللي بيألف مسرحية وبيحاول تقديمها لأهل الحي بتاعه، لكن الضابط شريف بيشيل الإعلان الخاص بالمسرحية. المسرحية إخراج سمير العصفوري وسعيد حامد، وتأليف أحمد عبدالله.
7- مسرحية كارمن:
بتحكي عن مخرج مسرحي قرر يعيد تقديم مسرحية كارمن بمعالجة جديدة، وبيدور على ممثلة مثالية ﻷداء الشخصية الرئيسية، ولكن المخرج بيقع في حبها. المسرحية من ﺇﺧﺮاﺝ محمد صبحي، والإعداد المسرحي ليسري خميس.
8- مسرحية الواد سيد الشغال:
بتحكي عن سيد الشاب اللي بيشتغل مع خالة كخادم في بيت عائلة غنية، ولما بيتم طلاق بنت صاحب البيت للمرة التالتة بيطلب من سيد إنه يقوم بدور المُحلل. المسرحية إخراج حسين كمال، وتأليف سمير عبدالعظيم.
9- مسرحية ريا وسكينة:
المسرحية بتحكي عن الأختين ريا وسكينة، اللي بيقتلوا الستات وبيسرقوا دهبهم بمساعدة حسب الله زوج ريا، وعشان يبعدوا الشبهات عنهم بتحاول سكينة تقنع الصول عبدالعال إنه يتجوزها. المسرحية من إخراج حسين كمال، وتأليف بهجت قمر.
10- مسرحية لعبة الست:
بتحكي عن حسن الرجل الفقير اللي بيتعرف على بنت اسمها لعبة، وبيحبها ويتجوزها، وبمرور الوقت بتتحول لعبة لنجمة مشهورة بسبب إن منتج أفلام اكتشفها وهنا بتتغير كل حاجة. المسرحية من إخراج محمد صبحي، وتأليف نجيب الريحاني.
11- مسرحية المتزوجون:
بتحكي عن مسعود الشاب الفقير اللي بيتجوز من لينا البنت الأرستقراطية رغم معارضة أبوها، وبمجرد ما لينا بتقرر تروح تعيش مع مسعود في بيته الفقير بيبدأوا يخوضوا مجموعة من التجارب والاحداث منها حرمان لينا من ميراث أبوها. المسرحية من إخراج حسن عبدالسلام، تأليف فيصل ندا.
