منها للبلاغ عن العنف ضد المرأة.. أرقام حكومية تنقذك في مواقف مختلفة

2- الخط الساخن لمباحث الإنترنت (108)

في وقت بقى فيه جزء كبير من حياتنا على الإنترنت، الجرائم الإلكترونية بقت منتشرة بشكل كبير ومع الوقت كمان بيتطور. فلو اتعرضت لابتزاز إلكتروني، أو اختراق حسابات، أو أي نوع من جرائم الإنترنت، تقدر تبلغ مباحث الإنترنت على رقم 108. الخط ده مخصص لاستقبال البلاغات المرتبطة بالجرائم الإلكترونية، وبيوجهك للخطوات القانونية اللي ممكن تاخدها لحماية نفسك.

3- الخط الساخن لـ جهاز حماية المستهلك (19588)

لو اشتريت منتج وطلع فيه عيب، أو اتعرضت لخداع من الشركة أو المحل اللي اشتريت منه المنتج، تقدر تقدم شكوى لجهاز حماية المستهلك على رقم 19588. الجهاز دوره حماية حقوقك كمستهلك ومتابعة الشكاوى ضد الشركات والتجار. وبعد تسجيل الشكوى، بيتم التواصل مع الجهة المتهمة لمحاولة حل المشكلة أو اتخاذ الإجراءات اللازمة.

4- خط نجدة الطفل (16000)

لو اكتشفت إنك تعرف طفل بيتعرض لإهمال أو عنف أو خطر، لازم تبلغ فورًا على خط نجدة الطفل 16000. الخط تابع للمجلس القومي للطفولة والأمومة، وهدفه حماية الأطفال والتدخل في الحالات الطارئة. البلاغات ممكن تكون عن أطفال في الشارع، أو حالات عنف أسري، أو أي موقف فيه تهديد لسلامة طفل.

5- خط الإبلاغ عن العنف ضد المرأة (15115)

المجلس القومي للمرأة خصص رقم 15115 لاستقبال بلاغات العنف ضد النساء. الخط بيقدم دعم قانوني ونفسي، وكمان ممكن يساعد في توجيه الضحايا للجهات المختصة أو أماكن تقديم الدعم. اتواصلي مع الخط حالًا لو اتعرضي للعنف أو تعرفي حالة محتاجة مساعدة.

6- مركز الأزهر العالمي للفتوى الإلكترونية (19906)

أسئلة كتير ممكن تقابلك وماتكونش عارف تحسم إغجابتها، فلو عندك سؤال ديني أو محتاج فتوى في موضوع معين، ممكن تتواصل مع مركز الأزهر العالمي للفتوى على رقم 19906. الخط بيقدم إجابات على الأسئلة الشرعية المختلفة، وبيساعد الناس في الوصول لفتاوى موثوقة من علماء الأزهر.      

7- الخط الساخن للمساعدة في الإقلاع عن التدخين (15335 أو 105)

الخط ده تابع لوزارة الصحة وبيقدم دعم للناس اللي حابة تبطل تدخين. من خلال رقم (15335 أو 105) ممكن تحصل على نصائح طبية وخطة تساعدك تقلع عن التدخين بشكل تدريجي وآمن. الخدمة بتشمل متابعة ونصائح صحية تساعدك تتغلب على الإدمان. 

8- هيئة الدواء المصرية (15301)

لو دواء معين مش متوفر في الصيدليات، أو فيه مشكلة في توفره، ممكن تبلغ هيئة الدواء المصرية على رقم 15301. الخط ده بيستقبل بلاغات نقص الأدوية وبيساعد في متابعة المشكلة وتوجيهك لأماكن ممكن يتوفر فيها الدواء. كمان لو شاكك في صحة الدواء وخايف يكون اتعرض لظروف سببت تلف للعبوة تقدر تتواصل مع الرقم وهما هيقولولك تتصرف إغزاي بالظبط، أو على رأي مسلسل عين سحرية "لو شكيت في الدواء كلم هيئة الدواء".

9- الخط الساخن للصحة النفسية وعلاج الإدمان (16328)

لو بتعاني من ضغط نفسي شديد، أو قلق، أو اكتئاب، أو أي مشكلة نفسية، تقدر تتواصل مع الخط الساخن للصحة النفسية على رقم 16328. الخط بيقدم دعم واستشارات نفسية سرية، وكمان ممكن يساعد في توجيهك لمراكز العلاج أو الدعم المناسب، هنا في الرقم ده هما هيسمعوك ويساعدوك فمتستهونش أبدًا بصحتك النفسية تحت بند إن ده شوية زل أو ده دلع وهيروح لحاله.

10- صندوق مكافحة وعلاج الإدمان والتعاطي (16023)

لو أنت أو حد تعرفه بيعاني من إدمان المخدرات، تقدر تتواصل مع صندوق مكافحة وعلاج الإدمان على رقم 16023. الخط بيقدم استشارات سرية، وكمان بيوجه المرضى لمراكز علاج متخصصة بتقدم برامج علاجية وتأهيلية.

11- رقم بوابة شكاوى مجلس الوزراء (16528)

لو عندك شكوى تخص جهة حكومية أو خدمة عامة، ممكن تقدمها من خلال رقم 16528 الخاص ببوابة شكاوى مجلس الوزراء. الشكوى بيتم تسجيلها ومتابعتها مع الجهة المختصة، وبيتم الرد على صاحب الشكوى بعد مراجعتها.

12- الخط الساخن لـ جهاز تنظيم الاتصالات (155)

لو واجهتك مشكلة مع شركة اتصالات، زي ضعف الخدمة أو مشكلة في الفاتورة أو شكوى ضد شركة، تقدر تتواصل مع الجهاز القومي لتنظيم الاتصالات على رقم 155. الجهاز دوره تنظيم سوق الاتصالات في مصر والتأكد من التزام الشركات بحقوق المستخدمين.