فيلم "سهر الليالي" هيتعرض في سينما زاوية بدايةً من يوم 30 أبريل

سينما زاوية بوسط البلد، أعلنت عن عرض فيلم "سهر الليالي" بدايةً من يوم الأربعاء 30 أبريل الساعة 7 مساءً، بعد 22 سنة من عرضه الأول، وبعده هيكون فيه مناقشة مع كاتب الفيلم السيناريست تامر حبيب، وأستاذ أحمد صبيح، عضو مجلس الإدارة والمدير التنفيذي للشركة العربية للإنتاج والتوزيع السينمائي، وهتدير النقاش المخرجة كوثر يونس.

الحجز مُتاح من شباك التذاكر وأون لاين من موقع السينما دوت كوم، وهيكون فيه مواعيد تانية لعرض الفيلم في الجدول الأسبوعي يوم التلات. وسعر التذكرة 100 جنيه.

الفيلم أحداثه بتدور عن 4 أزواج صحاب، وبتبدأ الأحداث في الليلة اللي كلهم بيجتمعوا فيها في حفلة عيد ميلاد بنت واحد منهم، وفي الليلة دي بيحصل خلافات بين الأزواج وزوجاتهم، لأن حياتهم العاطفية مليانة توتر، فالرجالة الأربعة بيقرروا يسيبوا القاهرة ومشاكلها، وبيسافروا لإسكندرية علشان يعيدوا حساباتهم.

فيلم "سهر الليالي" من بطولة: شريف منير، فتحي عبد الوهاب، أحمد حلمي، منى زكي، علا غانم، خالد أبو النجا، حنان ترك، جيهان فاضل، ومن تأليف تامر حبيب، وإخراج هاني خليفة.