عرض "أوبرا عايدة" و"الناي السحري" على المسرح الكبير بدار الأوبرا

دار الأوبرا المصرية هتعرض "أوبرا عايدة"، ومقتطفات من "أوبرا الناي السحري" لمزارت بقيادة الموسيقار محمد سعد باشا، على المسرح الكبير أيام 10، و11، و14 أبريل.

التذاكر متاحة بـ 3 فئات سعرية، هما: 110، و 210، و 310 جنيه، التذاكر متوفرة على موقع "تذكرتي" وتقدر تحجزها من هنا.

و"أوبرا عايدة" هي واحدة من أشهر الأوبرات العالمية، ألفها الموسيقار الإيطالي جوزيبي فيردي سنة 1871 بتكليف من الخديوي إسماعيل للاحتفال بافتتاح قناة السويس. وبتدور أحداثها في مصر الفرعونية.

وقصة "أوبرا عايدة" بتحكي عن أميرة إثيوبية اسمها عايدة، أُسرت وقت الحرب واتنقلت لمصر كجارية للأميرة المصرية أمنيريس، ابنة الفرعون. والقائد المصري راداميس بيقع في حب عايدة، ولكن أمنيريس بردو بتحب راداميس وبتغير من عايدة.

وفي نفس الوقت راداميس كقائد للجيش المصري بيدخل حرب ضد الإثيوبيين، وعايدة بتتمنى انتصاره لأنه حبيبها، لكنها في الوقت نفسه بتخاف إنه يدمر بلدها إثيوبيا. 

وبعد انتصار مصر، والد عايدة، الملك الإثيوبي أموناصرو، بيتحول لأسير حرب. وبيطلب أموناصرو من ابنته إنها تخدع راداميس عشان يكشف ليها عن خطة الجيش المصري، وعايدة فعلًا بتوافق وبتعرف خطة راداميس، والأخير بيتقبض عليه بتهمة الخيانة

ولكن أمنيريس بتحاول تنقذ حياة راداميس بشرط إنه يتخلى عن حبه لعايدة، لكنه بيرفض. وبيتحكم عليه بالدفن حيًا، وعايدة بتقرر إنها تموت معاه في مشهد مأساوي.