مصر في قائمة الاتحاد الأوروبي للدول الآمنة
هيتم تقليل استقبال طلبات لجوء من مواطنيها
الاتحاد الأوروبي أعلن انضمام 7 دول، من بينهم مصر، لقائمة "الدول الآمنة"، بمعنى إن مواطنيها مش محتاجين حماية دولية، وهيتم تقليل طلبات اللجوء من الدول دي. والدول اللي اعتبر الاتحاد مواطنيها مش بيواجهوا مخاطر كبيرة تستدعي منحهم الحماية الدولية، هم: مصر، والمغرب، وتونس، والهند، وكوسوفو، وبنجلاديش، وكولومبيا. والقرار ده معناه إن فرص حصول مواطنين الدول دي على اللجوء في الاتحاد الأوروبي هتكون ضعيفة، لإن السلطات هتتعامل مع إجراءاتهم كإجراءات قليلة الجدية" أو "ذات فرص نجاح ضئيلة". وماجنوس برونر، مفوض الاتحاد الأوروبي لشؤون الهجرة، قال إن في دول كتير من الإعضاء بيواجهوا تراكم كبير في طلبات اللجوء، وأي إجراء هيساعد على تسريع البتّ في طلبات اللجوء هو أمر ضروري وملح في المرحلة الحالية. الجدير بالذكر إن الاتحاد الأوروبي ناقش إعداد قائمة مشابهة في سنة 2015، لكن القائمة مكملتش بسبب خلافات حادة حصلت بين الدول الأعضاء، خصوصًا بسبب مسألة إدراج تركيا في القائمة من عدمه.
- الموضوع اللي فات فيلم "ولا عزاء للسيدات" هيشارك في مهرجان أسوان لأفلام المرأة
- الموضوع اللي جاي بإنتاج 3 مليون طن.. مصر حققت الاكتفاء الذاتي من السكر
