في زمن التريند إزاي "حضرة المحترم نور الشريف" مسيرة مش بتتنسي؟

يوم السبت 29 أغسطس، وتحديدًا في The Factory بوسط البلد، كان ميعادنا مع معرض فني مجاني للجمهور بعنوان "حضرة المحترم نور الشريف" للاحتفاء بإرث الفنان الكبير نور الشريف ومسيرته، واللي كان فكرة وتنظيم المخرج محسن حديد، اللي بالمناسبة هو بيخرج برضو فيلم عن نور الشريف بنفس اسم المعرض، وهيتعرض قريب.

المعرض ضم عدد كبير من مقتنيات نور الشريف، وأفيشات أصلية ومطبوعات وملابس واكسسوارات لعدد من أهم أفلامه زي مثلًا غرفة تحميض الصور اللي كانت موجود في "ضربة شمس"، و"الخوف"، ورغم إن مسيرة نور الشريف بدأت من أكتر من خمسين سنة إلا إن المعرض حضره ناس كتير، وناس تانية كانت بتطالب أنه يستمر أيام تانية، كأنهم ماصدقوا حاجة ترجع تربطهم بالفن اللي حبوه واتعودوا عليه.

وهنا بيجي السؤال إزاي في وقت كل حاجة فيه بتتعرف لما تبقى "تريند" وآخرها ٣ ايام والناس تنساها، لما يتعمل معرض عن فنان اتوفى من أكتر من 10 سنين، يستقبلوه بكل الحماس ده، أو بمعنى تاني ايه اللي عرفوه عن نور الشريف أكتر من كونه ممثل يخلي الزمن مايستناش مهرجان فني، ويكرمه هو بنفسه؟

لما سألنا السؤال ده لمحسن حديد، صاحب فكرة المعرض كانت إجابته ببساطة إن "نور الشريف الفنان الأكثر احتراماً في جيله من الناحيتين الفنية والإنسانية، كان إنسان دؤوب في شغلته وموهبته، فالبني أدم العظيم هو اللي قدم لينا النجم الكبير نور الشريف اللي عرفناه من الشاشة".

والحقيقة احترام نور الشريف، هي مش صفة غريبة عنه بالعكس أي حد بيهتم بالفن عارف كويس أنه كمان كان إنسان مثقف وده يمكن فعلا اللي عمل الاختلاف، يعني لو رجعت بذاكرتك شوية بسهولة هتكتشف إن نور الشريف هو اللي قدم فيلم "الصرخة" "وسواق الأتوبيس" عشان يمثل الشرايح اللي ماحدش بيتكلم عنها، وهو اللي قبل يقدم دور قواد في فيلم "شوارع من نار"، وفي نفس السنة دور المعلم التربوي "في آخر الرجال المحترمين"، وماكانش بعيد عن الفلسفة والثقافة لأنه قدم "ابن رشد" في "المصير"، فالاختيارات المختلفة دي مش عشوائية أبدًا، وده اللي اكده المخرج محسن حديد، اللي قالنا إن "نور الشريف أنتج فيلم "آخر الرجال المحترمين" رغم أنه عارف أنه مش هينجح جماهيريًا، لكنه عشان حب الدور والرسالة قرر ينتج ه عشان عارفه انه هيعيش للتاريخ مش لشباك التذاكر".

"نفسي الناس ترجع تتفرج على نور الشريف" "حديد" كمل كلامه وقالنا إن نور الشريف قدم كل الأدوار تقريبا، وده اللي هنشوفه ونعرفه أكتر لما الفيلم بتاعة يتعرض ونسمع من الناس اللي عاشت مع نور الشريف قد إيه هو إنسان صادق وحقيقي، وصدقه ده اترجم على الشاشة، فمكتبة نور الشريف المتنوعة سواء في الأفلام أو المسلسلات أو حتى في المسرح، مش صدفة ولا ضربة حظ.

أصل اه ممكن النجم القدر يخدمه أنه يقدم أعمال ناجحة كتير، لكن الأكيد إن الحظ مش هيشفعله لو قدم دور الكل حذره منه، زي إنتاج وبطولة فيلم عن رسام الكاريكاتير الفلسطينى ناجى العلى سنة 1992، واللي وقتها جاله تحذيرات ونصايح كتيرة من تجسيد شخصية الفنان الفلسطينى المعارض. ولا قبوله بالمجازفة لما اختار يمثل في فيلم "الكرنك" رغم معارضته لسياسة الوقت الحالي

اللي مش هنختلف عليه أكيد، إن نور الشريف صاحب الـ 180 فيلم، أخلص من كل قلبه لشغله عشان كده كان العدل إن الفن يكافئه، ويبقى عنده سبعة من أفلام ضمن أهم مائة فيلم فى تاريخ السينما المصرية، وهما:

زوجتي والكلب، أبناء الصمت، الكرنك، أهل القمة، سواق الأتوبيس، العار، حدوتة مصرية، فمتنكسلش بقى تتفرج على الأفلام دي، وتستنى فيلم "حضرة المحترم نور الشريف" اللي هيتعرض قريب، وارجع رد عليا يا ترى في جيلنا دلوقتي ممكن نشوف نجم استثنائي زي نور الشريف ولا هنسيب التريند ياخد مجراه؟