"الحكي أسلوب حياة عند المصريين".. محمد كالابالا بيكلمنا عن ملتقى الحكي

لو أنت من أي بلد عربية أو حتى أجنبية، وجيت قعدت مع واحد مصري هتعرفه بسهولة، لأن هتلاقيه دايمًا بيقولك "أنا عندي حكاية" أو "ما تيجي أحكيلك حكاية". احنا المصريين أكتر حاجة بتميّزنا هي حبنا للحكايات والحكي، ودايمًا حتى لو مشغولين مجرد ما بنسمع أي حكاية بتتحكي، بتلاقينا سيبنا اللي في إيدينا ومركزين معاها، عشان الحكي أسلوب حياة عندنا! 

وعشان الحكي هو جزء من ثقافتنا كمصريين، فبقى عندنا أول ملتقى دولي للحكي في قلب القاهرة، حكّائين من مختلف الأعمار، بيتجمعوا في مكان واحد عشان يحكوا من قلبهم. فعاليات ملتقى القاهرة الدولي للحكي بتُقام في الفترة من 16 لـ 22 أبريل في بيت السناري بالسيدة زينب، والمركز الثقافي الفرنسي، والدورة الأولى باسم المخرج حسن الجريتلي. 

الملتقى بيتضمن مجموعة متنوعة من الفعاليات، بتشمل ورش الحكي، والعروض الفنية، والدورات التدريبية عن فنون الحكي المختلفة، زي ورشة الحكي مع الفنانة حليمة حمدان، وورشة الحكي مع هيثم شكري، وورشة حكي للأطفال مع هناء الخواجة. تقدر تعرف أكتر عن مواعيد الورش والأماكن من خلال صفحة الملتقى على فيسبوك: Cisf ملتقى القاهرة الدولي للحكي.

اتكلمنا مع المدير الفني لملتقى القاهرة الدولي للحكي، محمد عبد الفتاح "كالابالا"، عشان نعرف منه أكتر عن الملتقى، وعن فن الحكي بشكل عام.

احكي عشان تعيش

الدورة الأولى من ملتقى القاهرة الدولي للحكي، باسم الفنان حسن الجريتلي صاحب الشعار المميز "احكي عشان تعيش". محمد كالابالا، المدير الفني لملتقى القاهرة الدولي للحكي، بيقولنا إن ده مش مجرد شعار، لأن الحكي هو اللي بيديلك قدرة على الحياة، وهو اللي بيخليك تتنفس بشكل أحسن، وكل الفنون أصلها حكاية، مافيش مسلسل من غير حكاية أو فيلم من غير حكاية.



"الحكّائين في مصر أضعاف اللي في الوطن العربي"

أنا سعيد جدًا إن أخيرًا بقى عندنا ملتقى للحكي، احنا كان عندنا ملتقى واحد بس حصل لمدة سنتين في قنا وكمان ماكنش ملتقى دولي، وأنا حضرت دورات حكي كتير في معظم الدول العربية، وكنت بتمنى يكون عندنا ملتقى دولي خاص بمصر، لأن الحكّائين عندنا أضعاف اللي في الوطن العربي، والحكي أسلوب حياة عند المصريين.

محمد عبد الفتاح كالابالا - المدير الفني لملتقى القاهرة الدولي للحكي



تجربة الحكي تجاوزت حدود المسرح 

محمد كالابالا قالنا إنه بينصح أي حد ماجرّبش إن يحضر ليالي حكي، إنه يروح ملتقى القاهرة للحكي، لأنها تجربة ماتتنسيش وسهل جدًا إنك تعيدها مع نفسك أو في بيتك أو مع أولادك، لأن الحكي أكبر بكتير من كونه على المسرح وبس، "كالابالا" بيقولنا إن الحكي بقى حاجة أساسية كمان في التعليم في المدارس، والجامعات، وفي الطب، فموضوع الحكي تجاوز إنه بيُستخدم كفن وبس.



"الدورة السنة دي هتكون مُلهمة لكل الحكّائين"

أنا بتوقع إن الدورة دي هتطلع منضبطة جدًا، وهتكون ملهمة لكل الحكّائين، وهنعتبرها بداية لنجاحات أكبر ومشاركات مع دول عربية أكتر، لأن السنة دي احنا عندنا مشاركات من 3 دول، وده بسبب ظروف التمويل، لأن احنا بنعمل الملتقى بجهود ذاتية، بس مع نجاح الدورة دي، السنة الجاية هيكون فيه مشاركات أكبر من دول زي سوريا والأردن والإمارات.

محمد عبد الفتاح كالابالا - المدير الفني لملتقى القاهرة الدولي للحكي



"بيجيلي ناس تدرب عشان تحكي لولادها"
الحكي مميز عن باقي الأشكال المسرحي، لأنه سهل في تناوله، يعني أنا بيجيلي ناس بتدرب عشان تحكي لولادها قصص عشان يناموا، بيجيلي ناس تدرب عشان تعرف تشرح في المدرسة، وبيجيلي ناس كمان تدرب عشان حاسين إن الحياة تقيلة عليهم، فبيبقوا عايزين يتنفسوا.

محمد عبد الفتاح كالابالا - المدير الفني لملتقى القاهرة الدولي للحكي



"مش كل الممثلين حكّائين"
أنا بشوف إن الحكي المفروض يبقى لغة عند كل الناس مهما كان شغلهم، يعني مش كل الممثلين حكّائين، ولا كل الحكّائين ممثلين، بس أي حد بيشتغل في مجال الفن لازم يكون بيعرف يحكي، يعني المخرج لازم يبقى في الأصل حكّاء عشان نعرف هو عايز يقولنا إيه من الفيلم أو المسلسل.

محمد عبد الفتاح كالابالا - المدير الفني لملتقى القاهرة الدولي للحكي



"بعرف إن الجمهور دخل في الحكاية لما بشوف عينيه" 

أكتر لحظة بتعرفني إن الجمهور دخل في الحكاية وبقى حاسس بانسجام، لما بشوف عينيه، لأن واحنا بنحكي بنكون قريبين أوي من الناس، ومابيبقاش في أي مساحات بين الحكّاء والجمهور، عكس المسرح اللي بيكون فيه مساحة، إنما الحكي بيلغي كل المساحات.

محمد عبد الفتاح كالابالا - المدير الفني لملتقى القاهرة الدولي للحكي