غير الحب والفراق.. قضايا ناقشتها أفلام زمان:

مين فينا لما بيفتكر أفلام الأبيض وأسود مش بيجي في باله دلع وخفة دم سعاد حسني في "صغيرة على الحب" و"إشاعة حب"، ولا مناكفة وحب شويكار وفؤاد المهندس، اللي مش محتاج افكرك بفيلم معين لأن كل أفلامهم حبهم كان باين فيها، ولا لحظات الحزن والفراق في الأفلام وجملها المحفوظة من أول "يا خاين يا دون يا كداب مش عايزاك مش رايداك"، لحد "انا ماستاهلكيش".

بس أفلام الأبيض وأسود ماكانتش رومانسية وبس، بالعكس، أفلام كتير وقتها فتحت مواضيع وقضايا جريئة، وبعضها لسه مطروح لحد النهارده، زي حرية المرأة، والتمييز بين الأبناء، والوصم المجتمعي، والطلاق، والإرهاب.

1- فيلم أنا حرة (إنتاج 1959):

بطولة لبنى عبد العزيز، شكري سرحان، حسين رياض، زوزو نبيل، وتأليف إحسان عبد القدوس، وسيناريو نجيب محفوظ، وإخراج صلاح أبو سيف.

الفيلم بيناقش معنى الحرية والمساواة، وده من خلال شخصية "أمينة" البنت العنيدة، اللي عايشة مع عمتها وزوج عمتها، وبتعاني طول الوقت من تسلطهم الشديد وتحكمهم في كل تفاصيل حياتها، عشان كده إتمام دراستها بيكون حلمها الوحيد عشان توصل للحرية، ومع مرور السنين، وعي "أمينة" بيتطور ومنظورها للعالم بيتغير وبتفهم إن للحرية أبعاد أكتر من اللي في خيالها.

2- فيلم السراب (إنتاج 1970):

بطولة ماجدة، نور الشريف، عقيلة راتب، تحية كاريوكا، عباس فارس، رشدي أباظة، وتأليف نجيب محفوظ، وسيناريو وحوار علي الزرقاني، وإخراج أنور الشناوي.

الفيلم

الفيلم بيناقش صدمات الطفولة وتأثير التربية القاسية، وده من خلال شخصية "كامل" المصاب بعقدة نفسية اسمها "عقدة أوديب"، وده بسبب تعلقه بأمه بطريقة مش طبيعية، فـ "كامل" بيفشل فى علاقته بزوجته وبيكتشف إصابته بالعجز الجنسي.

3- فيلم ميرامار (إنتاج 1969):

بطولة شادية، يوسف وهبي، يوسف شعبان، عماد حمدي، عبدالمنعم إبراهيم، تأليف نجيب محفوظ، وسيناريو وحوار ممدوح الليثي، إخراج كمال الشيخ.

الفيلم بيناقش الانتهازية والفساد والصراع الطبقي، وده من خلال شخصية "زهرة" اللي بتهرب للأسكندرية بعد ما بيتضغط عليها تتجوز راجل كبير وغني، وهناك بتشتغل في فندق وبتقابل شخصيات مختلفة في الفكر والحياة منهم حسين علام الثري المستهتر، ومنصور باهي الشاب المناضل المثقف اللي بيحاول يعلم "زهرة" القراءة والكتابة".

4- فيلم جعلوني مجرمًا (إنتاج 1954):

بطولة فريد شوقي، هدى سلطان، يحيى شاهين، رشدي أباظة، نجمة إبراهيم، وتأليف فريد شوقي ورمسيس نجيب، وإخراج عاطف سالم.

الفيلم بيناقش الوصم المجتمعي وصعوبة الحصول على فرصة جديدة بعد ارتكاب جريمة، من خلال شخصية الطفل "سلطان" اللي بعد وفاة باباه، عمه بيطرده وبيخليه يعيش في إصلاحية الأحداث، وبعد ما "سلطان" بيخرج وبيدور على فرصة عمل شريفة بيكتشف إن المجتمع كله رافضة وبيحكم عليه بسبب ماضيه.

5- فيلم الخطايا (إنتاج 1962):

بطولة عبد الحليم، نادية لطفي، حسن يوسف، مديحة يسري، عماد حمدي، وتأليف محمد عثمان، وإخراج حسن الإمام.

الفيلم بيناقش التمييز في المعاملة بين الأبناء، وده من خلال عائلة "إحسان" الست المتجوزة المحامي "محمود"، وعندها ولدين، "حسين" و"أحمد". ورغم إن الاتنين إخوات، إلا إن محمود بيتعامل معاهم بطريقة مختلفة تمامًا، ودايمًا فيه تفضيل واضح لأحمد على حساب حسين، وده بسبب سر دفين.

6- فيلم ملف في الآداب (إنتاج 1986):

بطولة فريد شوقي، مديحة كامل، صلاح السعدني، أحمد بدير، وحيد سيف، توفيق الدقن، وتأليف وحيد حامد، وإخراج عاطف الطيب.

الفيلم بيناقش نظرة المجتمع للمرأة والوصم المرتبط بسمعتها، من خلال "مديحة" اللي بيتقبض عليها بتهمة من شرطة الآداب، والظابط "سعيد" بيحاول بكل الطرق الممكنة يثبت عليها التهمة حتى لو بالزور.

8- فيلم أريد حلًا (إنتاج 1975):

بطولة فاتن حمامة، رشدي أباظة، ليلى طاهر، كمال ياسين، أمينة رزق، وتأليف حسن شاه، وإخراج سعيد مرزوق.

الفيلم بيناقش مشاكل قانون الأحوال الشخصية ومعاناة المرأة في إجراءات الطلاق، من خلال حياة "درية" وزوجها، اللي بتتحاول لكابوس، لما طلب "درية" بالطلاق بيترفض، فبتضطر ترفع دعوى للطلاق بالمحكمة، وخلال رحلة بحثها عن حقها بتتعرض لسلسلة من المشاكل اللي بتمس كرامتها.

9- فيلم الأرهابي (إنتاج 1994):

بطولة عادل إمام، مديحة يسري، صلاح ذو الفقار، شيرين، إبراهيم يسري، حنان شوقي، وتأليف لينين الرملي، وإخراج نادر جلال.

الفيلم بيناقش التطرف الديني والإرهاب، من خلال "على عبد الظاهر" الشاب اللي بينضم لجماعة إرهابية متطرفة، وبعد ما بينفذ عملية إرهابية كبيرة وبيتعرض لإصابة وهو بيهرب، بيتكفل بعلاجه أسرة متحررة، وخلال إقامته معاهم، بيراجع تفكيره وبيشك في كل اللي آمن به من تعاليم الجماعة.