علاقات توكسيك كرهتنا في الحب.. لو في علاقة منهم اهرب!

في بداية كل علاقة بتبقي حاسة بفراشات وإنك طايرة في السما، وساعات كده وسط مشاعر الحب الجميلة الطرف التاني بيسقط حاجات بسيطة كده وينسى يقولهالك، زي إنه خاطب أو متجوز مثلًا، وكده كده عينك مابتاخدش بالها من الريد فلاجز اللي بتعدي عليكي في البدايات واللي  ممكن أصلًا تفصلي بيها فساتين! علشان كده في الفلانتاين حبينا نوعيكي بأنواع العلاقات التوكسيك اللي لو لقيتي نفسك في واحدة منها، نحب نقولك انفدي بجلدك واهربي منها!

- تيمور وشفيقة:

علاقة سامة من العيار التقيل، قصة حب من الطفولة مختارين بعض من صغرهم، لوهلة تحس إن "الله.. لُطاف أوي!"، لكن لما تبص على طبيعة العلاقة دي هتغير رأيك ده أكيد. طول الوقت بيتحكم في لبسها وفي دايرة أصحابها وماتسلمش على أي ولد، وماتسافرش غير لما تاخد إذنه، والموضوع مابيقفش عند هنا وبس، ده وصل إنه يخيرها بين شغلها وهو في الآخر، فلو حسيتي أو حسيت إن شريك فيه من "تيمور"، أحب أقولك "اهربي!".

- رقية وكريم الشرقاوي:
اهتمام "كريم" الزايد بصورته كنجم قدام الناس، كان بيخنق "رقية" كتير ويتحكم في كل تصرفاتها علشان ماتعملش حاجة تضر بصورته، وكان بيحس بالغيرة والتهديد لما يلاقيها واخدة الـ spot كله في أي قعدة وهو محدش مهتم بيه بنفس الاهتمام.


- ياسمين وحازم:
فيه مثل مصري بيقول "ديل الكلب عمره مابيتعدل"، فلو فاكرة إنك "You Can fix him" وفري طاقتك لنفسك وfix نفسك أحسن، في "السلم والتعبان" كان "حازم" player وبيخاف من الالتزام والعلاقات الجادة، ولما قابل "ياسمين" وحبها، بقى بيختفي ويخونها، واكتشف في نص علاقته معاها إنه مش عاوز يكمل.

- سلمى ويوسف:
الصورة النمطية المتاخدة دايمًا إن الراجل هو التوكسيك، لكن علاقة "سلمى" و"يوسف" هتثبتلك إن الـ Toxicity مالهاش علاقة بالنوع، "يوسف" كان بيدعمها وأفضل مستمع ليها وقالها أكتر من مرة إنه بيحبها، ورغم إنها معندهاش مشاعر ناحيته مكنتش بتوضحله ده ودايمًا بتديه Mixed signals، ولما صارحها برغبته في الجواز منها، قالتله إنها أصلًا ولا مرة قالت إنها بتحبه وإنه هو اللي فهم غلط.

- مي وأحمد:
كلنا بنسمع عن حب ولاد الجيران، وده طبيعي، لكن اللي مش طبيعي إن ابن الجيران ده يكون متجوز، وبيخون مراته مع جارته اللي هي "مي"، والفكرة إن "مي" كانت عارفة بجوازه، وفضلت متعشمة إنه هيتجوزها في يوم من الأيام، وهيبطل يزورها في السر من ورا مراته، بس ده "الأمل الفيروزي"، لأنه كان أجبن من إنه يواجه أهله ومراته برغبته من الارتباط والجواز بيها.

- جميلة وهشام:
صدق اللي قال إن الخيانة فعلًا بتيجي من أقرب الناس، "جميلة" وقفت جنب "هشام" لحد ما بقى دكتور كبير له اسمه، ونسيت نفسها وشغلها اللي بتحبها في الطريق، وفي الآخر يقرر يخونها، وطبعًا الخيانة تصرف وحش بس الأوحش لما يخونك مع أقرب صحابك، وكمان يكون عنده مبررات للخيانة دي بإن هي السبب.

- أحلام وعاصم

• "بتحبي فقرة الساحر؟"

• بصي الحركة دي! (بيختفي من حياتها)