في عيد الحب.. بنقدملك بلاي ليست الـ Situationship

الحالة العاطفية في عيد الحب : حيران عبد الرحيم, أو في رواية أخرى In situationship

دلوقتي الكابلز بيجهزوا و نازلين ديت و أنت قاعد تفكر في أنك مرتبط ولا مفركش ولا بتحب من طرف واحد. فجمعنالك الأغاني دي عشان متحسش أنك لوحدك, أوعلى الأقل تشرحلك حالتك اللي أنت مش فاهمها.

البخت نزلت في 2022 وويجز اللي كان كاتبها كمان. وكلنا قعدنا نفكر في حالة الأغنية هل هو حب من طرف واحد ولا هما مرتبطين و سابوا بعض ولا قالها وهي رفضته.

شيروفوبيا نزلت في 2017 وبردو أحنا مش فاهمين هو بيعتذرلها على أيه ولا أيه.

أسمك أيه نزلت في 2024 وفاهمين أن الفنان أمير عيد عايز حب عشان عنده ملل عاطفي بس مش عايز أرتباط

عشت معاك حكايات نزلت في 2015 و لحد دلوقتي أحنا مش فاهمين هما سابوا بعض ورجعوا ولا هو بيحبها و بيقولها أرجعيلي ولا بيحتفلوا بذكرى حبهم.

متلخبطة نزلت في 2019 و الاغنية بتبين قد ايه هي مش محددة في مشاعرها ولا عارفة هي بتحبه ولا بتكرهه ولا عايزة ايه منه


أغنية أكرهها لكاظم الساهر أكتر موقف توكسيك ممكن حد يمر بيه.

في  أغنية كل مانقرب لبعض لأنغام كانت بتقول ما بلاش نتعود كده على بعض, لأحسن لو ضعنا في يوم من بعض هنضيع أوي، ونتعب أوي لو مرة حسينا بحنين ولقينا صعب نلاقي بعض. يعني بتحبه بس مش عايزة تبقي معاه عشان خايفة يبعدوا وده لما تبقي بتحب و عندك خوف من الخازوق. 

لكن وائل جسار لما غني خليني ذكري, كان طلبه غريب في الأغنية عشان بيقول لو عشت بعدي وبعد بعدي جيت و حنيت أبقي أفتكرني و أحكي عني مهما كنت نسيت, خليني ذكري جميلة عندك واوعى تنسي زمان. طب ليه ؟ ماحنا هنبقي سيبنا بعض ليه عايزني أفتكرك و أحكي عنك كمان!

الفنانة سوما غنت أغنية مقدرش أقول, بس هي كانت بتلوم نفسها في الأغنية  وبتقول مقدرش أقول أحساسي كان لعبة في إيديه عشان إحساسي هو اللي كان هيموت عليه. وده هنا لما تبقي شايف الريد فلاجز بس عامل نفسك مخدتش بالك منها.

وطبعاً طبعاً مش هننسى أغنية ال situtionship الرسمية وهي قال فاكرينك لعمرودياب. كفاية بس وهو بيقول ماهو شايفنك جاية معايا ورايحة معايا.

إليانا نزلتلنا أغنية جنني في 2024 وشرحت ال situtionship في كلمتين "قربه وبعده بيتعبني".

عبير نعمة في أغنية بلا مانحس كانت مترددة تقول إنها بتحبه عشان مايخسروش بعض و يفضلوا صحاب.

و مسار إجباري عندهم أغنية تاني بتوصف مدى صعوبة العلاقة وهي "زيك أنا" ووصف قد ايه العلاقة فيها صعوبات لما قال "أوقات بحس إننا شمس و قمر طريقين سفر مابيتلاقوش أغراب مابين كل الوشوش" و بعد قال " بس الأكيد لو كنتي أقرب ليا مني أو ما بينا سنين فراق روحك هتفضل طيف ملازم سكتي" طب ليه ؟

وفي النهاية مش هننسي أغنية "أنا بخاف من الكوميتمينت" لجدل اللي فيها إعتراف صريح بأنه بيحبها بس عمره ماهيرتبط بيها عشان بيخاف من الكوميتمينت.