النهر الأخضر أكبر حديقة مركزية في العالم بالعاصمة الجديدة

النهر الأخضر مش بس هو أكبر حديقة مركزية في العالم، هو كمان بيربط أحياء العاصمة الجديدة ببعض. فـ على مساحة ألف فدان. هتلاقي مساحات خضراء، وحدائق مركزية، ومسارات للمشي والدراجات، ومناطق ترفيهية وخدمية، يعني حياة كاملة بجودة صحية أعلى.

وعشان الاستدامة البيئية هي أكبر من مجرد شعار بالنسبة للعاصمة الجديدة، فهتلاقي إن المدينة متخططة عشان تضمن لكل فرد حوالي 15 متر مسطح من المساحات الخضراء والهواء النضيف، وده اللي بتحققه "حديقة الشعب"، والمساحات المفتوحة والحدايق، والمسطحات اللي حوالين النهر الأخضر. 

يعني ببساطة هي معادلة كسبانة من كل الإتجاهات لأنك هتحافظ على البيئة وصحتك هتبقى أحسن، والمكان اللي ساكن فيه قيمته هتبقى أعلى. ومع إن النهر الأخضر هو أكبر حديقة مركزية في العالم، إلا إن الـ 1000 فدان متقسمين على 3 مراحل مختلفة:

المرحلة الأولى حوالي 345 فدان، فيها الحديقة الإسلامية، والحديقة المغطاة، والنادي الاجتماعي الخاص، ومجمع الواحة اللي معمول للراحة والعناية بالصحة، وبحيرة القوارب، ومطعم البحيرة اللي بيخلي الخروجة ليها طعم تاني.

والمرحلة التانية على 284 فدان، دي دنيا تانية لوحدها، دنيا بتاخدك للثقافة واللعب. لأن المرحلة بتضم الحديقة الثقافية، وحديقة الألعاب، وحديقة الفن، وحديقة للفعاليات والمناسبات، عشان كل لحظة تتبسط فيها على الآخر.

أما المرحلة التالتة فمساحتها حوالي 274 فدان، ودي معمولة أكتر للعيلة. لأن فيها حديقة تعليمية للأطفال، ومكتبة مفتوحة وبحيرة، وساحة مركزية، ومنطقة مطاعم، ونادي رياضي وترفيهي.

النهر الأخضر مش مشروع ترفيهي أو منظر حلو يتشاف. ده جزء أصيل من فكرة الاستدامة اللي المدينة بتتبناها. لأن المشروع بيحسن جودة الهواء، وبيرسم شكل عمراني جميل بيمزج بين الحداثة والطبيعة، عشان تكون العاصمة الجديدة مدينة حديثة بروح عريقة.