أصل وفصل شم النسيم

من أكتر من 2700 سنة قبل الميلاد، بدأت عادة الاحتفال بشم النسيم عند قدماء المصريين، ومن وقتها ولحد النهارده أصبح العيد الشعبي الأقدم في مصر وفي التاريخ كله، لأنه العيد الوحيد اللي بيتجمع عليه كل المصريين باختلاف ديانتهم ومعتقداتهم، بيتجمعوا في جنينة من الجناين علشان ياكلوا الفسيخ والرنجة والبصل الأخضر.

ولأن أعيادنا مرتبطة بطقوس كتير، ففكرنا ناخد أشهر طقوسها ونعرف "أصل وفصل" كل واحدة منهم، وإمتى بدأت، ومين أول حد اخترعها أو أطلقها. وفي حلقة الأسبوع ده هنعرف أصل وفصل "شم النسيم" اللي تاريخه بيرجع للمصريين القدماء.

بداية الاحتفال بشم النسيم

من 2700 سنة قبل الميلاد، وتحديدًا في عصر الأسرة التالتة، بدأت عادة الاحتفال بعيد الشم النسيم، اللي كان بيرمز عند المصري القديم لتجديد الطبيعة، من خلال حصاده للزرع وتفتح الزهور، وكمان كان بيرمز لـ عيد الخلق وبداية الزمن.



تمليح السمك عند قدماء المصريين

قبل شم النسيم، المصريين القدماء كانوا متعودين يجففوا السمك البوري في الشمس، ويملحوه، وكان معروف باسم "الفسيخ" في إسنا بصعيد مصر، ووقتها كانوا بيسموا السمك قبل التمليح باسم Lathpolis وهو الاسم القديم "لإسنا"



رمزية تلوين البيض عند المصريين القدماء

من العادات القديمة للاحتفال بشم النسيم، هو تلوين البيض، لأن العادة دي بدأت عند المصريين القدماء، والبيض عند المصري القديم، كان بيرمز للحياة الجديدة، وده ظهر في كتاب الموتى الفرعوني، وفي ترنيمة إخناتون اللي بتقول: "الله واحد، خلق الحياة من الجماد وخلق فراخ من البيض".



كتابة الأمنيات على البيض

ليلة شم النسيم، المصريين القدماء كانوا بيزينوا ويلونوا البيض بأشكال مختلفة، وبعدين بيكتبوا أمنياتهم على البيض، وبيحطوه في سلة مصنوعة من سعف النخيل، وكانوا بيعلقوها على الأشجار أو على سطح بيتهم، على أمل إن الآلهة تستجيب لرغباتهم بحلول الفجر.



كلمة "شم النسيم" جاية منين؟

كلمة "شم النسيم" ارتبطت بالتقويم الزراعي المصري، فكلمة "شمو" لوحدها معناها فصل الصيف، لأن رأس السنة المصرية بتبدأ مع فصل الفيضان "آخت"، وبعدين فصل بذر البذور "برت" اللي بيبدأ في شهر نوفمبر، وبعدين فصل الصيف "شمو" اللي بيبدأ في شهر مارس وبينتهي في يوليو.



عادة أكل البصل السبب في شفاء بنت الفرعون

في يوم من الأيام، كانت واحدة من بنات الفرعون مصابة بمرض العضال، والدكاترة كانوا حيرانين في العلاج المناسب، لحد ما رئيس الكهنة أداها عصير البصل عن طريق الدواء، وبعدها حالتها اتحسنت بسرعة، ووالدها أعلن شفائها، ومن وقتها أصبح أكل البصل عادة في شم النسيم.



ارتباط شم النسيم بعيد القيامة

عيد القيامة موافق لاحتفال المصريين بشم النسيم، فالمسيحيين بيحتفلوا بعيد القيامة يوم الأحد، ويوم الاتنين بيحتفلوا بشم النسيم. لكن فيه رواية تانية بتقول إن شم النسيم كان أحيانًا بييجي في فترة الصوم الكبير، اللي كانت مدته 55 يوم، ووقتها المسيحيين ماكانوش بيقدروا ياكلوا أسماك، علشان كده أجلوا الاحتفال بشم النسم لـ بعد عيد القيامة مباشرةً، واستمر ده لحد النهارده.



مظاهر الاحتفال بشم النسيم ما بين زمان ودلوقتي

يوم شم النسيم، المصريين القدماء كانوا بيروحوا عند الهرم الأكبر علشان يشوفوا غروب الشمس، وتربعها على قمة الهرم، لأن بسبب تعامد الشمس على خط الاستواء، بيخليها تميل بالتدريج عند غروبها لحد ما تتربع قبل الغروب بدقايق عند قمة الهرم الأكبر، بعد كده بيبدأ شعاع الشمس في اختراق الهرم تدريجيًا، فبيكون كأنه مقسوم لنصين متساويين.



أما دلوقتي، فكل عيلة باختلاف ديانتها أو معتقداتها، بيبدأوا يتجمعوا في الجناين علشان ياكلوا الفسيخ والرنجة والبصل الأخضر، وحواليهم صوت بيقول الدنيا ربيع والجو بديع. وفي البيوت هتلاقي الأطفال والكبار متجمعين علشان يلونوا البيض، بألوان الصيف المبهجة.